ທາງລົດໄຟ ຈີນ-ລາວ ກາຍເປັນເສັ້ນຄຳດ້ານການຂົນສົ່ງຜັກ ແລະໝາກໄມ້ສົດ

ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ເວລາ 16 ໂມງ ຂອງວັນທີ 23 ສິງຫານີ້, ຂະບວນຕູ້ລົດໄຟແຊ່ເຢັນ ທີ່ໄດ້ບັນທຸກຜັກ ແລະ ໝາກໄມ້ສົດ 400 ກວ່າໂຕນ ໄດ້ເດີນທາງອອກຈາກນະຄອນຢຸ້ຍຊີ ແຂວງຢຸນນານຈີນ ເດີນທາງໄປສູ່ນະຄອນຫລວງວຽງຈັນ ຂອງປະເທດລາວ ໂດຍຜ່ານທາງລົດໄຟ ຈີນ-ລາວ, ຫລັງຈາກນັ້ນ, ໄດ້ປ່ຽນຖ່າຍຂົນສົ່ງໄປຕາມທາງຫລວງ ອີກ 3 ວັນ, ຜັກ ແລະ ໝາກໄມ້ເຫລົ່ານີ້ໄດ້ຖືກປ້ອນເຂົ້າຕະຫລາດຜັກ ແລະ ໝາກໄມ້ສົດໃນນະຄອນຫລວງບາງກອກ ປະເທດໄທ ເຊິ່ງເປັນຂີດໝາຍສະແດງໃຫ້ເຫັນວ່າ: ການຂົນສົ່ງຜັກ ແລະ ໝາກໄມ້ແຊ່ເຢັນຕາມທາງລົດໄຟສາກົນ ຈີນ-ລາວ ໄດ້ກ້າວເຂົ້າສູ່ສະພາບປົກກະຕິແລ້ວ. ການຂົນສົ່ງແບບນີ້ຈະສາມາດຮັກສາຄວາມສົດ ແລະ ຄຸນນະພາບຂອງຜັກ ແລະ ໝາກໄມ້ ເຊິ່ງໄດ້ສ່ອງແສງໃຫ້ເຫັນເຖິງທາງລົດໄຟ ຈີນ-ລາວ ມີປະສິດທິພາບສູງ ແລະ ມີຄວາມສະດວກສະບາຍໃນການຂົນສົ່ງສິນຄ້າສາກົນ.

ນັບແຕ່ໄດ້ເປີດບໍລິການເປັນຕົ້ນມາ, ທາງລົດໄຟ ຈີນ-ລາວ ໄດ້ເລີ່ມປະກົດມີບົດບາດອັນພົ້ນເດັ່ນຫລາຍໃນການຂົນສົ່ງຜັກ ແລະ ໝາກໄມ້ສົດ. ນັບແຕ່ຕົ້ນປີເປັນຕົ້ນມາ, ທາງລົດໄຟ ຈີນ-ລາວ ໄດ້ຂົນສົ່ງໝາກໄມ້ທັງໝົດຫລາຍກວ່າ 1 ແສນໂຕນ, ເພີ່ມຂຶ້ນປະມານ 120% ເມື່ອທຽບໃສ່ໄລຍະດຽວກັນຂອງປີກາຍ.
ເບື້ອງຫລັງຂອງຜົນງານດັ່ງກ່າວແມ່ນ ທາງລົດໄຟ ຈີນ-ລາວ ໄດ້ຍົກຄວາມສາມາດດ້ານການຂົນສົ່ງຂອງຕົນໃຫ້ສູງຂຶ້ນເລື້ອຍໆ ແລະ ໄດ້ສ້າງລະບົບຈໍລະຈອນສິນຄ້າທີ່ນັບມື້ນັບສົມບູນຂຶ້ນ. ເພື່ອຮັບໃຊ້ການຂົນສົ່ງສິນຄ້າສາກົນໃຫ້ດີກວ່າເກົ່າ, ພາກສ່ວນທາງລົດໄຟ ໄດ້ປັບປຸງລະບົບຮາດແວ ແລະ ຊອບແວ ຕາມດ່ານທາງລົດໄຟບໍ່ຫານ ໃຫ້ສູງຂຶ້ນຢ່າງຮອບດ້ານ ເຊິ່ງໄດ້ເພີ່ມເສັ້ນທາງລົດໄຟສຳລັບການກວດກາຫລາຍສາຍ ແລະ ຍົກລະດັບອຸປະກອນໃຫ້ສູງຂຶ້ນ ເພື່ອຮັບປະກັນວຽກງານກວດກາລົດຂົນສົ່ງຫລາຍຮ້ອຍຄັນຕໍ່ມື້. ມາດຕະການເຫລົ່ານີ້ ໄດ້ຍົກຄວາມສາມາດນຳເຂົ້າ ແລະ ສົ່ງອອກສິນຄ້າຢູ່ດ່ານບໍ່ຫານ ໃຫ້ສູງຂຶ້ນຢ່າງຫລວງຫລາຍ ເຊິ່ງໄດ້ເປັນສິ່ງຄ້ຳປະກັນທີ່ແຂງແຮງໃຫ້ແກ່ການຂົນສົ່ງສິນຄ້າປະເພດຜັກ ແລະ ໝາກໄມ້.
ນອກນີ້, ພາກສ່ວນທາງລົດໄຟ ຍັງໄດ້ປະສານສົມທົບກັບພາກສ່ວນດ່ານ ແລະ ພາກສ່ວນກວດກາຊາຍແດນໃຫ້ດີກວ່າເກົ່າ, ໄດ້ຫລຸດເວລາແຈ້ງຜ່ານດ່ານລົງຮອດ 5 ຊົ່ວໂມງ ເຊິ່ງຈະເຮັດໃຫ້ຜັກ ແລະ ໝາກໄມ້ສົດ ສາມາດເຂົ້າເຖິງຕະຫລາດໄດ້ໄວກວ່າເກົ່າ.
ສິ່ງທີ່ໜ້າສົນໃຈນັ້ນກໍຄື: ໂດຍແນໃສ່ໝາກໄມ້ຕ່າງໆ ເຊັ່ນ: ໝາກຖົ່ວລຽນ ແລະ ໝາກມັງຄຸດ ທີ່ຕ້ອງການຂົນສົ່ງພາຍໃນເວລາສັ້ນ, ພາກສ່ວນທາງລົດໄຟ ໄດ້ປະຕິບັດມາດຕະການພິເສດ ທີ່ຈັດສັນໃຫ້ຂົນສົ່ງກ່ອນ ແລະ ອອກເດີນທາງກ່ອນ ພ້ອມທັງເສີມຂະຫຍາຍບົດບາດຂອງຂະບວນລົດໄຟຂົນສົ່ງສິນຄ້າສາກົນສາຍດ່ວນ ແມ່ນ້ຳລ້ານຊ້າງ-ແມ່ນ້ຳຂອງ ຢ່າງເຕັມທີ່ ເພື່ອຮັບປະກັນໃຫ້ໝາກໄມ້ທີ່ແຊບຫວານສົດຊື່ນເຫລົ່ານີ້ ສາມາດປ້ອນເຂົ້າຕະຫລາດໃຫ້ໄດ້ໄວກວ່າເກົ່າ. ໝາກໄມ້ສົດທີ່ມາຈາກລາວ, ໄທ ແລະ ປະເທດອື່ນໆໃນອາຊີຕາເວັນອອກສຽງໃຕ້ ໄດ້ເຂົ້າສູ່ຕະຫລາດຈີນ ໄດ້ໄວກວ່າເກົ່າ ໂດຍຜ່ານທາງລົດໄຟຈີນ-ລາວ, ຍອດມູນຄ່ານຳເຂົ້າໝາກໄມ້ ໄດ້ກວມ 40% ຂຶ້ນໄປ ຂອງຍອດມູນຄ່ານຳເຂົ້າຕາມທາງລົດໄຟ ຈີນ-ລາວ.
ການຂົນສົ່ງສິນຄ້າຕາມທາງລົດໄຟ ຈີນ-ລາວ ໄດ້ພັດທະນາຢ່າງວ່ອງໄວ ບໍ່ພຽງແຕ່ໄດ້ຊຸກຍູ້ການໄປມາຫາສູ່ດ້ານເສດຖະກິດການຄ້າລະຫວ່າງຈີນ ແລະ ລາວ ເທົ່ານັ້ນ, ຫາກຍັງໄດ້ສ້າງໂອກາດພັດທະນາທີ່ບໍ່ເຄີຍມີມາກ່ອນ ໃຫ້ແກ່ການຄ້າຜັກ ແລະ ໝາກໄມ້ສົດຕ່າງໆ ລະຫວ່າງສອງປະເທດ ກໍຄືລະຫວ່າງ ຈີນ ແລະ ບັນດາປະເທດໃນອາຊີຕາເວັນອອກສຽງໃຕ້ ເຊິ່ງໄດ້ກາຍເປັນເສັ້ນທາງຂົນສົ່ງຄຳ ສຳລັບການຂົນສົ່ງຜັກ ແລະ ໝາກໄມ້ສົດ. ຄຽງຄູ່ກັບປະລິມານການຂົນສົ່ງສິນຄ້າ ແລະ ລະບົບຈໍລະຈອນສິນຄ້າຕາມທາງລົດໄຟ ຈີນ-ລາວ ໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ, ທາງລົດໄຟ ຈີນ-ລາວ ຈະເສີມຂະຫຍາຍບົດບາດທີ່ເປັນຊ່ອງທາງການຈໍລະຈອນສິນຄ້າສາກົນ ທີ່ມີຄວາມປອດໄພ, ມີປະສິດທິພາບສູງ ແລະ ສະດວກວ່ອງໄວ ເຊິ່ງຈະປະກອບສ່ວນຫລາຍກວ່າເກົ່າ ເຂົ້າໃນການພັດທະນາການຄ້າ ສິນຄ້າສົດ ລະຫວ່າງ ຈີນ ແລະບັນດາປະເທດອາຊີຕາເວັນອອກສຽງໃຕ້ ໃຫ້ຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ.

แชร์