ສະຫວັນນະເຂດ ສັ່ງໂຈະກິດຈະການໂຮງງານທີ່ບໍ່ໄດ້ມາດຕະຖານ

ເພື່ອປະຕິບັດຕາມແຈ້ງການຂອງຫ້ອງວ່າການແຂວງສະບັບເລກທີ 1297/ຫວຂ, ລົງວັນທີ 28 ພຶດສະພາ 2024 ແລະ ສະບັບເລກທີ 1571/ຫວຂ, ລົງວັນທີ 27 ມີຖຸນາ 2024 ເລື່ອງ: ທິດຊີ້ນຳກ່ຽວກັບ ການລົງຕິດຕາມກວດກາຜົນກະທົບດ້ານສິ່ງແວດລ້ອມ ແລະສັງຄົມຂອງບໍລິສັດ ຟໍຈູນ ຈຳກັດ, ເຂດບ້ານດົງຄຳຫຼວງ ນະຄອນໄກສອນພົມວິຫານ ແຂວງສະຫວັນນະເຂດ ໃຫ້ໂຈະການການເຄື່ອນໄຫວກິດຈະການຕ່າງໆ ພາຍໃນໂຮງງານ. ດັ່ງນັ້ນໃນລະຫວ່າງວັນທີ 26-28 ສິງຫາ 2024, ຄະນະສະເພາະກິດຂອງແຂວງນໍາໂດຍທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກອຸດສາຫະກຳ-ການຄ້າແຂວງ ທັງເປັນສະມາຊິກສະພາແຫ່ງຊາດ ສັງກັດໃນຄະນະກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ຂອງສະພາແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ລົງຕິດຕາມໂຮງງານຜະລິດນໍ້າມັນເຕົ໋າ ຂອງບໍລິສັດ ຟໍຈູນ ຈຳກັດ ຢູ່ບ້ານດົງຄຳຫຼວງ ເຊິ່ງມີປະຊາຊົນໄດ້ຮ້ອງຮຽນມາຍັງການຈັດຕັ້ງໃຫ້ແກ້ໄຂຢ່າງຮີບດ່ວນ ເພາະສົ່ງກິ່ນຂີວຢ່າງຮຸນແຮງ ສົ່ງຜົນກະທົບຢ່າງໜັກໜ່ວງ ຕໍ່ສິ່ງແວດລ້ອມກໍຄືຊິວິດການເປັນຢູ່ຂອງປະຊາຊົນບັນດາເຜົ່າ ທີ່ດຳລົງຊີວິດໃນເຂດດັ່ງກ່າວ. ຕໍ່ກັບປັນຫາດັ່ງກ່າວ ຄະນະກຳມະການ ໄດ້ລົງກວດກາໂດຍລະອຽດ ແລະ ເຫັນວ່າການຜະລິດນໍ້າມັນເຕົ໋າໃນເຂດດັ່ງກ່າວມີສອງໂຮງງານ ທີ່ນຳໃຊ້ທະບຽນດຽວກັນ, ໂຮງງານທີ 1 ທໍາການຜະລິດນໍ້າມັນເຕົ໋າ ໂດຍເອົານໍ້າມັນເຄື່ອງເກົ່າມາຜະລິດຄືນ, ສ່ວນໂຮງງານທີ 2 ສ້າງເປັນໂຮງງານອົບຢາງຕີນລົດເກົ່າ ເພື່ອແຍກອອກໄປ ຕົ້ມກັ່ນເປັນນໍ້າມັນເຕົ໋າ, ຖ່ານກາກບອນ ແລະ ເຫຼັກລວດ ເພື່ອສົ່ງຂາຍໃຫ້ໂຮງງານອຸດສາກະກຳຜະລິດຊີມັງ ແລະໂຮງງານເຫຼັກ.

ໃນໄລຍະຜ່ານມາການຈັດຕັ້ງພາກລັດໄດ້ອອກແຈ້ງການປິດກິດຈະການແຕ່ເນື່ອງຈາກວ່າໂຮງງານຜະລິດຄືນນໍ້າມັນເຄື່ອງຂາດມາດຕະຖານທາງດ້ານເຕັກນິກ, ສິ່ງແວດລ້ອມຈຶ່ງເຮັດໃຫ້ຍັງມີກິ່ນຂີວ ໂດຍທີ່ໄດ້ໃຫ້ຢຸດເຊົາຜະລິດມາດົນ. ມາເຖິງປັດຈຸບັນທາງຄະນະກຳມະການໄດ້ເປີດກອງປະຊຸມຮ່ວມກັບ ຜູ້ຕາງໜ້າບໍລິສັດ ແລະເຫັນດີເປັນເອກະພາບ ໃຫ້ຜູ້ລົງທຶນຮີບຮ້ອນຟື້ນຟູຄືນສະພາບແວດລ້ອມ ໃຫ້ສຳເລັດໂດຍໄວ ຫາກບໍ່ປະຕິບັດຕາມກຳນົດເວລາ ຈະເຮັດໜັງສືເລັ່ງທວງຜ່ານສະຖານທູດ ແຫ່ງ ສປ ຈີນ ປະຈຳລາວ. ນອກຈາກນັ້ນ ຄະນະກຳມະການ ເຫັນດີເປັນເອກະພາບຫ້າມມີການເຄື່ອນໄຫວໂດຍເດັດຂາດ ຈົນກວ່າຈະໄດ້ຮັບການອະນຸມັດຈາກພາກລັດ ໂດຍໄດ້ມອບໝາຍໃຫ້ ປກສ ແຂວງປະສານສົມທົບກັບກຸ່ມບ້ານ ແລະ ອຳນາດການປົກຄອງບ້ານ ຕິດຕາມການເຄື່ອນໄຫວຢ່າງໃກ້ຊິດ, ຫາກຝ່າຝືນ ແມ່ນໃຫ້ດຳເນີນມາດຕະການປັບໄໝ ໃສ່ໂທດຕາມຂະບວນການຍຸດຕິທຳ.

ຄຽງຄູ່ກັບການລົງປະຕິບັດງານຄັ້ງນີ້ທາງຄະນະກຳມະການດັ່ງກ່າວໄດ້ລົງຕິດຕາມໂຮງງານຜະລິດເມັດຢາງຫຼັກ 11 ບ້ານດົງນາຄໍາ ນະຄອນໄກສອນພົມວິຫານ, ໂຮງງານລາວຊູຢວນ ພຣາສະຕິກ ແລະ ປຸງແຕ່ງຢາງພາລາ ຕັ້ງຢູ່ບ້ານນາຈະຫຼີດ ນະຄອນໄກສອນພົມວິຫານ ແລະ ໂຮງງານຜະລິດເມັດຢາງ ໂຊກມີໄຊ ບ້ານທ່າຊະໂນ, ນະຄອນໄກສອນພົມວິຫານຊຶ່ງບັນດາໂຮງງານດັ່ງກ່າວ ໃນໄລຍະຜ່ານມາແມ່ນມີການນຳເຂົ້າ, ເກັບຊື້ສິ່ງເສດເຫຼືອເພື່ອມາຣີໄຊເຄີ້ນ ຜະລິດເປັນເມັດຢາງ ສົ່ງຂາຍທັງພາຍໃນ ແລະຕ່າງປະເທດ.
ຂ່າວ: ສະຫວັນ

แชร์