ປະຊາຊົນ ແຂວງໄຊສົມບູນ 21 ຄົນ ລັກລອບຂຸດຄົ້ນແຮ່ຄໍາ ເຈົ້າຫນ້າທີ່ ນໍາໄປສຶກສາອົບຮົມ

ໃນວັນທີ 26 ສິງຫາ 2024 ທີສະໂມສອນກອງບັນຊາການ ປກສ ເມືອງລ້ອງແຈ້ງ ໄດ້ຈັດພິທີ ສຶກສາອົບຮົມ ຜູ້ກະທໍາຜິດ ທີ່ເຂົ້າມາລັກລອບຂຸດຄົ້ນແຮ່ທາດ (ແຮ່ຄໍາ) ແບບບໍ່ຖືກຕ້ອງຕາມກົດໝາຍ ໂດຍການເປັນປະທານຂອງທ່ານ ພັອ ອິນປັນ ຍາດຕິວົງ ຮອງຫົວໜ້າກອງບັນຊາການປ້ອງກັນຄວາມສະຫງົບ ແຂວງໄຊສົມບູນ, ມີທ່ານ ບຸນຜອງ ຄຳມະນີວົງ ເຈົ້າເມືອງເມືອງລ້ອງແຈ້ງ, ທ່ານ ພອນໄຊ ຕາໂນວັນ ຮອງພະແນກພະລັງງານ ແລະ ບໍ່ແຮ່ ແຂວງໄຊສົມບູນ ພ້ອມດ້ວຍພາກສ່ວນກ່ຽວຂ້ອງ.

ຄະນະປະທານໄດ້ພັດປ່ຽນກັນໂອ້ລົມ ຕໍ່ຜູ້ທີ່ເຂົ້າມາລັກລອບຂຸດຄົ້ນແຮ່ທາດ (ປະເພດແຮ່ຄໍາ) ແບບບໍ່ຖືກຕ້ອງຕາມກົດໝາຍ ຢູ່ຂອບເຂດສຳປະທານຂອງບໍລິສັດເອທີໂອ ຈຳກັດ ທີ່ບ້ານພູກອງເຂົ້າ, ເມືອງລ້ອງແຈ້ງ, ແຂວງໄຊສົມບູນ ທີ່ໄດ້ມີກຸ່ມຄົນລະເມີດເຂົ້າໄປຂຸດຄົ້ນແຮ່ທາດ (ປະເພດແຮ່ຄຳ ) ຈໍານວນ 21 ຄົນ ຕໍ່ກັບສະພາບດັ່ງກ່າວ ແມ່ນໄດ້ກໍ່ໃຫ້ເກີດຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຂອງສັງຄົມ ການລັກລອບຂຸດຄົ້ນແຮ່ທາດໃນເຂດສຳປະທານເຊິ່ງເປັນການກະທຳຜິດຕໍ່ປະມວນກົດໝາຍອາຍາ ມາດຕາ 340.

ການສຶກສາອົບຮົມຄັ້ງນີ້ກໍເພື່ອຮັບປະກັນບໍ່ໃຫ້ເກີດຄວາມອັນຕະລາຍຮ້າຍແຮງ ຕໍ່ສຸຂະພາບ, ຊີວິດ, ຊັບສິນ ຂອງພວກກ່ຽວເອງ ແລະ ໃຫ້ເຂົາເຈົ້າໄດ້ຮັບຮູ້, ເຂົ້າໃຈ ຢ່າງເລິກເຊິ່ງ ຕໍ່ແນວທາງນະໂຍບາຍ ຂອງພັກ ແລະ ລະບຽບກົດໝາຍຂອງລັດ ພ້ອມນັ້ນ ທ່ານຍັງໄດ້ເນັ້ນໜັກໃຫ້ຜູ້ກະທໍາຜິດດັ່ງກ່າວ ຈົ່ງເອົາໃຈໃສ່ປັບປຸງຕົນເອງ ໄປໃນທາງທີ່ດີ ກໍຄືການທໍາມາຫາກິນ ດ້ວຍອາຊີບທີ່ສຸດຈະລິດ ບໍ່ຜິດຕໍ່ລະບຽບກົດໝາຍຂອງບ້ານເມືອງ ເພື່ອຫັນເຂົ້າສູ່ການກະທໍາທີ່ຖືກຕ້ອງຕາມລະບຽບຫຼັກການ ແນໃສ່ຮັບປະກັນ ໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ຢ່າງໜັກແໜ້ນ.ຈາກນັ້ນທາງເຈົ້າໜ້າທີ່ໄດ້ສ້າງບົດບັນທຶກໃຫ້ຢຸດເຊົາການເຄື່ອນໄຫວລັກລອບຂຸດຄົ້ນແຮ່ທາດ ໃນຂອບເຂດສຳປະທານ ແລະ ບໍ່ໃຫ້ເກີດເຫດການນີ້ໃນຄັ້ງຕໍ່ໄປ.

แชร์