13 ແຂວງ ໃນປະເທດລາວ ໄດ້ຮັບຜົນກະທົບຈາກພາຍຸ ລວມມູນຄ່າເສຍຫາຍ 318 ຕື້ກວ່າກີບ

ບ່າຍວັນນີ້ 28 ສິງຫາ 2024, ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ເປີດກອງປະຊຸມລາຍງານສະພາບຜົນກະທົບ, ຜົນເສຍຫາຍຈາກໄພພິບັດທີ່ເກີດຂຶ້ນຈາກພະຍຸດີເປຣຊັນ(Depression), ພະຍຸເຂດຮ້ອນພຣະພິຣຸນ (Prapiroon) ແລະ ຝົນຕົກໜັກ ໃນລະຫວ່າງວັນທີ 18 ກໍລະກົດ ຫາ 21 ສິງຫາ 2024, ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ແລະ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ".

ຈາກສະພາບຜົນກະທົບພ້ອມຜົນເສຍຫາຍຈາກໄພພິບັດທີ່ເກີດຈາກພາຍຸດີເປຣຊັນ (Depression), ພາຍຸໝູນເຂດຮ້ອນພຣະພິຣຸນ (Prapiroon) ແລະ ຝົນຕົກ ໜັກ ໃນຄັ້ງວັນທີ 18 ກໍລະກົດ ຫາ 21 ສິງຫາ 2024 ທີ່ຜ່ານມາ: ມາຮອດປັດຈຸບັນມີທັງໝົດ 13 ແຂວງ ທີ່ໄດ້ຮັບຜົນກະທົບຄື: ນະຄອນຫຼວງວຽງຈັນ, ແຂວງ ສາລະວັນ, ຄໍາມ່ວນ, ຫຼວງພະບາງ, ຊຽງຂວາງ, ຫົວພັນ, ເຊກອງ, ວຽງຈັນ, ບໍ່ແກ້ວ, ໄຊຍະບູລີ, ບໍລິຄຳໄຊ, ໄຊສົມບູນ ແລະ ແຂວງ ອຸດົມໄຊ; ໃນຈໍານວນທັໝົດ 60 ເມືອງ, 541 ບ້ານ, 17.548 ຄອບຄົວ, ພົນລະເຮືອນ 36.208 ຄົນ, ຍິງ 15.384 ຄົນ, ເສຍຊີວິດ 03 ຄົນ ແລະ ສູນຫາຍ 01 ຄົນ, ຄອບຄົວຖືກຍົກຍ້າຍຊົ່ວຄາວ 72 ຄອບຄົວ, ເຮືອນ 125 ຫຼັງ, ເນື້ອທີ່ທຳການຜະລິດ 9,763,28 ເຮັກຕາ, ເສັ້ນທາງ 177 ເສັ້ນ, ຂົວ 12 ແຫ່ງ, ຊົນລະປະທານ 79 ແຫ່ງ, ສຸກສາລາ 02 ແຫ່ງ, ນໍ້າລິນ 30 ແຫ່ງ, ໜອງປາ 334 ໜອງ, ສັດລ້ຽງ (ງົວ, ຄວາຍ, ແບ້, ໝູ ແລະ ສັດປີກ ) ລວມຈໍານວນ 13.478 ໂຕ ທີ່ໄດ້ຮັບຜົນກະທົບ ແລະ ຜົນເສຍຫາຍ; ຄາດຄະເນມູນຄ່າຜົນກະທົບ, ຜົນເສຍຫາຍເບື້ອງຕົ້ນແມ່ນ 318,615,427,690 ກີບ.

ໂອກາດນີ້, ປະທານກອງປະຊຸມ ກໍໄດ້ເນັ້ນໜັກຫຼາຍບັນຫາທີ່ສໍາຄັນ ໃຫ້ຄະນະກໍາມະການຄຸ້ມຄອງໄພພິບັດຂັ້ນສູນກາງປະຕິບັດໜ້າທີ່ຂອງຕົນຢ່າງຕັ້ງໜ້າຕາມການມອບໝາຍ ພ້ອມທັງກຽມພ້ອມຕະຫຼອດເວລາ ທັງເປັນເຈົ້າການສຸມໃສ່ແກ້ໄຂຈຸດທີ່ເກີດເຫດໃຫ້ວ່ອງໄວ ແລະ ທັນເວລາ.

ພາບ-ຂ່າວ: ກອງທັບ

แชร์