ສປປ ລາວ ເລັ່ງພັດທະນາມາດຕະຖານເຊື່ອມຕໍ່ລັດດິຈິຕອນ

ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມສຳມະນາ ການພັດທະນາມາດຕະຖານເຊື່ອມຕໍ່ລັດດິຈິຕອນ ຂອງ ສປປ ລາວ ຂຶ້ນໃນວັນທີ 28 ສິງຫາ 2024, ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ພາຍໃຕ້ການເປັນປະທານຂອງທ່ານນາງ ວັນນະພາ ພົມມະທັນສີ, ຮອງຫົວໜ້າສູນບໍລິຫານລັດດິຈິຕອນ.

ຈຸດປະສົງຂອງການຈັດກອງປະຊຸມ ແມ່ນເພື່ອສ້າງຄວາມຮັບຮູ້ ແລະ ຄວາມເຂົ້າໃຈກ່ຽວກັບມາດຕະຖານເຊື່ອມໂຍງພາກລັດ, ນຳສະເໜີບັນດາມາດຕະຖານສາກົນ, ຄວາມຈໍາເປັນໃນການພັດທະນາມາດຕະຖານການເຊື່ອມຕໍ່ ລັດດິຈິຕອນ ແລະ ແນະນໍາແບບສອບຖາມ ໃນການເກັບກໍາຂໍ້ມູນເພື່ອພັດທະນາຂອບມາດຕະຖານການເຊື່ອມຕໍ່ລັດດິຈິຕອນ ສໍາລັບ ສປປ ລາວ ແລະ ຍົກລະດັບຄວາມຮູ້ຄວາມສາມາດຂອງພະນັກງານ-ລັດຖະກອນ ຂອງກະຊວງເຕັກໂນໂລຊີ ແລະ ການສື່ສານ ແລະ ບັນດາກະຊວງອ້ອມຂ້າງ ໃນຂົງເຂດດິຈິຕອນ ໃຫ້ເຂົ້າໃຈວຽກງານມາດຕະຖານລະບົບໃຫ້ຫຼາຍຂຶ້ນ.
ກອງປະຊຸມ ຍັງໄດ້ເປີດເວທີສົນທະນາ ແລກປ່ຽນ ແລະ ປຶກສາຫາລືປະກອບຄໍາຄິດເຫັນ, ຮັບຟັງຂໍ້ສະເໜີຕ່າງໆຈາກບັນດາກະຊວງອ້ອມຂ້າງ ແລະ ແຂກທີ່ເຂົ້າຮ່ວມ ໂດຍສະເພາະສະພາບການພັດທະນາ ເຕັກນິກຂອງບັນດາລະບົບ, ສິ່ງທ້າທາຍ, ຂໍ້ສະເໜີ ເພື່ອການຮ່ວມມື ລະຫວ່າງພາກລັດໃນການສ້າງມາດຕະຖານ ຮ່ວມກັນ ເພື່ອຮັບປະກັນການເຊື່ອມໂຍງຂໍ້ມູນ, ຄວາມປອດໄພ ແລະ ເພື່ອຫຼຸດຜ່ອນການລົງທິນທີ່ຊໍ້າຊ້ອນ ແລະ ເພື່ອສາມາດຕໍ່ຍອດການພັດ ທະນາ ບັນດາລະບົບ ແລະ ແພຼັດຟອມ ທີ່ມີປະສີດທິພາບ ແລະ ຄວາມຍືນຍົງໃນອະນາຄົດ.

ຂ່າວ: ຂ່າວສານເຕັກໂນໂລຊີ ແລະ ການສື່ສານ

แชร์