ງານພົບປະ ແລະເສີມສ້າງເຄືອຂ່າຍກັບນັກລົງທຶນຈາກຫົວໜ່ວຍທຸລະກິດຍີ່ປຸ່ນ

ທ່ານ ໂຄອິຊີມີ ເອກອັກຄະຣາຊະທູດ ວິສາມັນຜູ້ມີອໍານາດເຕັມ ແຫ່ງປະເທດຍີ່ປຸ່ນ ປະຈໍາ ສປປ ລາວ ໄດ້ຈັດງານລ້ຽງເສີມສ້າງເຄືອຂ່າຍ ລະຫວ່າງນັກລົງທຶນຂຶ້ນ ໃນວັນທີ 26 ສິງຫານີ້ ທີ່ບ້ານພັກທ່ານທູດ ນະຄອນຫຼວງວຽງຈັນ, ເພື່ອສົ່ງເສີມເປົ້າໝາຍການມາເຄື່ອນໄຫວຂອງກຸ່ມ ນັກລົງທຶນຍີ່ປຸ່ນ ໃນຂະແໜງອຸດສາຫະກຳການຜະລິດທີ່ສະໜັບສະໜູນໂດຍອົງການ JETRO (ອົງການສົ່ງເສີມການຄ້າຍີ່ປຸ່ນ). ເປັນກຽດໃນພິທີມີ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະການຄ້າ, ມີບັນດາຮອງລັດຖະມົນຕີ, ແຂກຖືກເຊີນ ພ້ອມດ້ວຍພະນັກງານ-ວິຊາການເຂົ້າຮ່ວມ.

ປັດຈຸບັນການສົ່ງເສີມການລົງທຶນຈາກຕ່າງປະເທດແມ່ນນະໂຍບາຍເສດຖະກິດທີ່ເປັນບຸລິມະສິດໜຶ່ງ ຂອງລັດຖະບານລາວ ຊຶ່ງຈໍານວນບໍລິສັດຍີ່ປຸ່ນທີ່ໃຫ້ຄວາມສົນໃຈ ແລະ ຊອກຫາໂອກາດໃນການ ດໍາເນີນທຸລະກິດດ້ານການຜະລິດ, ຂົນສົ່ງ, ກະສິກຳ ແລະ ອຸດສາຫະກຳອື່ນໆທີ່ກ່ຽວຂ້ອງໃນປະເທດລາວ ແມ່ນກຳລັງມີທ່າອ່ຽງເພີ່ມຫຼາຍຂຶ້ນ.

ອົງການ JETRO ໄດ້ວາງເປົ້າໝາຍຂອງການມາເຄື່ອນໄຫວຂອງກຸ່ມນັກລົງທຶນຍີ່ປຸ່ນໃນຄັ້ງນີ້ແມ່ນເພື່ອການຂະຫຍາຍທຸລະກິດດ້ານອຸດສາຫະກຳການຜະລິດໃນປະເທດລາວ ໂດຍເນັ້ນໃສ່ການລົງທຶນ ໃນເຂດເສດຖະກິດພິເສດ, ທ່າບົກ ແລະ ອື່ນໆ ຊຶ່ງສະຖານທີ່ໆກຸ່ມນັກລົງທຶນຈະໄປເຄື່ອນໄຫວ VITA PARK ຢ້ຽມຢາມແມ່ນລວມມີ: ເຂດເສດຖະກິດພິເສດ, ເຂດເສດຖະກິດພິເສດແບບກວມລວມ ໄຊເສດຖາ, ເຂດເສດຖະກິດພິເຂດປາກເຊ-ຍີ່ປຸ່ນ, ທ່າບົກທ່ານາແລ້ງ ເປັນຕົ້ນ.

ໃນໂອກາດນີ້, ທ່ານ ມະໄລທອງ ກົມມະສິດ ກ່າວວ່າ: ການຈັດງານຄັ້ງນີ້ ເປັນການເສີມຂະຫຍາຍສາຍພົວພັນຮ່ວມມືທີ່ມີມູນເຊື້ອທີ່ມີມາແລ້ວນັ້ນໃຫ້ນັບມື້ດີຂຶ້ນ. ໂອກາດທ່າແຮງທີ່ໜ້າສົນໃຈດຶງດູດນັກລົງທຶນໃນ ສປປ ລາວ ຍ້ອນວ່າປະເທດລາວມີສະຖຽນລະພາບທາງດ້ານການເມືອງ, ເປັນປະເທດທີ່ມີແຮງງານໜຸ່ມ, ເປັນປະເທດທີ່ມີທີ່ຕັ້ງຕິດກັບບັນດາປະເທດທີ່ມີພົນລະເມືອງຫຼາຍເປັນຕົ້ນ ສປ ຈີນ, ຫວຽດນາມ, ຣາຊະອານາຈັກໄທ ແລະປະເທດອື່ນໆ. ພ້ອມກັນນັ້ນໃນເງື່ອນການເຊື່ອມໂຍງພາກພື້ນ-ສາກົນ ໂດຍສະເພາະແມ່ນການເຊື່ອມໂຍງເສດຖະກິດ, ການເຊື່ອມຈອດດ້ານພື້ນຖານໂຄງລ່າງ, ມາຮອດປັດຈຸບັນ ສປປ ລາວ ເປັນປະເທດທີ່ມີໂອກາດໃນການດຶງດູດເອົາການລົງທຶນຫຼາຍຂຶ້ນຕື່ມ ແລະເພື່ອສືບຕໍ່ດຶງດູດນັກລົງທຶນເຂົ້າມາລົງທຶນ ໃນ ສປປ ລາວ ລັດຖະບານ ໄດ້ຄົ້ນຄວ້າ, ປັບປຸງກົດໝາຍ ວ່າດ້ວຍການລົງທຶນໃນປີ 2024 ຊຶ່ງສະພາແຫ່ງຊາດ ກໍໄດ້ຮັບຮອງແລ້ວ ແລະວຽກງານອື່ນໆ. ງານພົບປະລະຫວ່າງນັກລົງທຶນທີ່ຈັດໂດຍອົງການ JETRO ທີ່ປະເທດລາວໃນຄັ້ງນີ້ນັບເປັນຄັ້ງທີ 4 ແລ້ວ ຫຼັງຈາກສະຖານະການ COVID-19 ໄດ້ຜ່ອນຄາຍລົງ.

ຂ່າວ: ແສງຈັນ

แชร์