ລົດຈັກໄຟຟ້າຂອງຈີນ ຊ່ວຍເພີ່ມການສັນຈອນແບບສີຂຽວ ໃຫ້ແກ່ປະຊາຊົນ ອາຊີຕາເວັນອອກສ່ຽງໃຕ້

ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ລົດຈັກເປັນພາຫະນະຄົມມະນາຄົມທີ່ນິຍົມໃຊ້ກັນຫລາຍຢູ່ປະເທດຕ່າງໆ ຂອງອາຊີຕາເວັນອອກສ່ຽງໃຕ້. ໂດຍສະເພາະຢູ່ ຫວຽດນາມ ທີ່ມີປະຊາກອນບໍ່ຮອດ 100 ລ້ານຄົນນັ້ນ, ແຕ່ພັດມີລົດຈັກ ເຖິງ 45 ລ້ານຄັນ, ໝາຍຄວາມວ່າ ເກືອບທຸກ 2 ຄົນ ມີລົດຈັກຄັນໜຶ່ງ. ຢູ່ອິນໂດເນເຊຍ, ໄທ, ມາເລເຊຍ ແລະລາວ ກໍມີຜູ້ໃຊ້ລົດຈັກເປັນພາຫະນະຈຳນວນມະຫາສານ.

ເພື່ອຮັບມືກັບຜົນກະທົບຈາກການປ່ຽນແປງຂອງດິນຟ້າອາກາດ, ລັດຖະບານປະເທດຕ່າງໆ ຂອງອາຊີຕາເວັນອອກສ່ຽງໃຕ້ ໄດ້ຕັ້ງໜ້າ ຊຸກຍູ້ການຫັນປ່ຽນຈາກລົດທີ່ໃຊ້ນ້ຳມັນເຊື້ອໄຟໃນປັດຈຸບັນ ໄປເປັນລົດ ໄຟຟ້າແທນ. ອິນໂດເນເຊຍ, ໄທ ແລະ ຫວຽດນາມ ໄດ້ອອກນະໂຍບາຍ ຕ່າງໆເພື່ອຊ່ວຍສະໜັບສະໜູນການຫັນປ່ຽນລົດໃຊ້ນ້ຳມັນເຊື້ອໄຟ ໃຫ້ເປັນລົດໄຟຟ້າເທື່ອລະກ້າວ, ສົ່ງເສີມໃຫ້ປະຊາຊົນຊື້ລົດຈັກໄຟຟ້າ ດ້ວຍການເບີກເງິນອຸດໜູນ ແລະຮູບແບບອື່ນໆ, ເພື່ອຫລຸດປະລິມານ ລົດຈັກທີ່ໃຊ້ນ້ຳມັນເຊື້ອໄຟລົງເທື່ອລະກ້າວ. ຍີ່ຫໍ້ລົດຈັກ ໃນອາຊີ ຕາເວັນອອກສ່ຽງໃຕ້ ກຳລັງກ້າວເຂົ້າສູ່ການນຳໃຊ້ພະລັງງານໃໝ່ ໂດຍຮ່ວມມືກັບ ບໍລິສັດສາກົນ ເຊິ່ງລວມທັງບໍລິສັດຈີນ ຫລືອອກແບບ ຜະລິດລົດລຸ້ນໃໝ່ດ້ວຍຕົນເອງ. ໃນປີ 2019, ລົດໄຟຟ້າຍີ່ຫໍ້ yadea ຂອງຈີນ ໄດ້ໄປພັດທະນາຢູ່ອາຊີຕາເວັນອອກສ່ຽງໃຕ້, ໂດຍໄດ້ສ້າງໂຮງງານ ຂຶ້ນຢູ່ຕ່າງປະເທດເປັນແຫ່ງທຳອິດຢູ່ ຫວຽດນາມ. ໃນເດືອນພຶດສະພາປີນີ້, ບໍລິສັດ yadea ໄດ້ສ້າງໂຮງງານແຫ່ງໃໝ່ຢູ່ ອິນໂດເນເຊຍ, ຄາດວ່າ ຈະລົງທຶນຫລາຍກວ່າ 150 ລ້ານໂດລາ. ບໍລິສັດ Aima ທີ່ເປັນບໍລິສັດ ລົດຈັກໄຟຟ້າລາຍໃຫຍ່ອີກແຫ່ງໜຶ່ງຂອງຈີນ ກໍໄດ້ສ້າງຖານຜະລິດຢູ່ ອິນໂດເນເຊຍ ໂດຍໄດ້ເລີ່ມຕົ້ນຜະລິດຢ່າງເປັນທາງການໃນເດືອນມີນາປີນີ້. ຢູ່ປະເທດລາວ, ວິສາຫະກິດຈີນ ທີ່ຜະລິດລົດຈັກໄຟຟ້າ ກໍໄດ້ສ້າງຊ່ອງທາງ ຈຳໜ່າຍກັບຄູ່ຮ່ວມມືທ້ອງຖິ່ນ.

ໃນຊຸມປີຜ່ານມານີ້, ຄຽງຄູ່ກັບຕະຫລາດພະລັງງານໃໝ່ຂອງອາຊີຕາ ເວັນອອກສ່ຽງໃຕ້ ພັດທະນາຢ່າງວ່ອງໄວ, ລົດຈັກໄຟຟ້າຂອງຈີນ ນັບມື້ ນັບຮັບຄວາມນິຍົມຊົມຊອບຢູ່ບັນດາປະເທດອາຊີຕາເວັນອອກສ່ຽງໃຕ້. ໃນເວລາບໍ່ທໍ່ໃດປີມານີ້, ຮ້ານຂາຍລົດຈັກໄຟຟ້າທີ່ຜະລິດໂດຍຈີນ ກໍໄດ້ເປີດບໍລິການຢູ່ປະເທດຕ່າງໆ ເຊິ່ງລວມທັງ ຫວຽດນາມ. ໃນນັ້ນ, ເຄືອຂ່າຍບໍລິການຂອງບໍລິສັດ yadea ຢູ່ ຫວຽດນາມ ມີຫລາຍກວ່າ 700 ຮ້ານ. ລົດຈັກໄຟຟ້າຫລາຍລຸ້ນໄດ້ກາຍເປັນຍານພາຫະນະທີ່ໄດ້ຮັບຄວາມ ນິຍົມຫລາຍໃນການຮັບສົ່ງລູກໄປໂຮງຮຽນຢູ່ຫລາຍປະເທດອາຊີຕາເວັນອອກສ່ຽງໃຕ້, ຢູ່ອ້ອມຂ້າງໂຮງຮຽນ ແລະຖະໜົນຫົນທາງ ຈະມັກເຫັນປະຊາຊົນ ຂີ່ລົດຊ້ອນລູກດ້ວຍລົດຈັກໄຟຟ້າຈີນ. ສາມາດເວົ້າໄດ້ວ່າ ການເດີນທາງ ໂດຍລົດຈັກໄຟຟ້າທີ່ຜະລິດໂດຍຈີນນັ້ນໄດ້ກາຍເປັນຄວາມນິຍົມໃໝ່ ຢູ່ປະເທດອາຊີຕາເວັນອອກສ່ຽງໃຕ້.

ລົດຈັກໄຟຟ້າຂອງຈີນ ໄດ້ກາຍເປັນທີ່ຍອມຮັບຈາກຜູ້ບໍລິໂພກ ຢູ່ປະເທດອາຊີຕາເວັນອອກສຽງໃຕ້, ຕົ້ນຕໍແມ່ນຍ້ອນວ່າ ວິສາຫະກິດຈີນ ມີທ່າແຮງຫລາຍດ້ານ. ລົດຈັກໄຟຟ້າຂອງຈີນ ມີຕ່ອງໂສ້ອຸດສາຫະກຳ ທີ່ຄົບຖ້ວນ ແລະສົມບູນ, ວິສາຫະກິດຢູ່ຍ່ານໃຕ້ ແລະຍ່ານເໜືອ ສາມາດສະໜັບສະໜູນກຳລັງການຜະລິດທີ່ແຂງແຮງ. ກຳລັງການຜະລິດ ອັນໃຫຍ່ຫລວງເຫລົ່ານີ້ສາມາດຫລຸດຜ່ອນຕົ້ນທຶນຕື່ມອີກ, ເຮັດໃຫ້ລາຄາ ຈຳໜ່າຍມີກຳລັງແຂ່ງຂັນຫລາຍ.

ການໄດ້ຮັບການບຸກທະລຸທີ່ສຳຄັນໃນຂົງເຂດເຕັກໂນໂລຊີທີ່ເປັນຫົວໃຈ ສຳຄັນ ເປັນສິ່ງວິເສດອີກຢ່າງໜຶ່ງຂອງວິສາຫະກິດລົດຈັກໄຟຟ້າຂອງຈີນ. ບໍລິສັດyadea ບໍລິສັດ Aima ບໍລິສັດ Ninebot ແລະ ບໍລິສັດ Niu Technologies ໄດ້ຄົ້ນຄວ້າໃນຂົງເຂດລົດຈັກໄຟຟ້າເປັນເວລາດົນນານ ແລ້ວ, ມີຊັບສິນທາງປັນຍາຂອງຕົນໃນຂົງເຂດສຳຄັນຕ່າງໆເຊັ່ນ: ເຕັກນິກໝໍ້ໄຟຟ້າ ລະບົບຄວບຄຸມຈັກໄຟຟ້າ, ລະບົບອັດສະລິຍະ ແລະອື່ນໆ. ໂດຍຖືບໍລິສັດ yadea ເປັນຕົວຢ່າງ, ລົດຈັກໄຟຟ້າ yadea ລຸ້ນກ້ວນເນີງ ໄດ້ນຳໃຊ້ເຕັກໂນໂລຊີໝໍ້ໄຟ Graphene TTFAR ທີ່ຄົ້ນຄວ້າຜະລິດເອງ, ເຊິ່ງໄດ້ເພີ່ມໄລຍະທາງຂອງການແລ່ນລົດ ແລະປະສິດທິພາບຂອງການ ສາກໄຟຢ່າງພົ້ນເດັ່ນ. ໃນດ້ານລະບົບແຮງຈັກຂັບເຄື່ອນ, ບໍລິສັດNiu Technologies ໄດ້ຜ່ານລະບົບຄວບຄຸມແບບອັດສະລິຍະ, ໄດ້ບັນລຸເປົ້າ ໝາຍທີ່ນຳໃຊ້ພະລັງງານຢ່າງມີປະສິດທິພາບສູງ ແລະຂັບຂີ່ແບບ ອັດສະລິຍະ.

ລົດຈັກໄຟຟ້າຂອງຈີນ ຍັງໄດ້ຕອບສະໜອງກັບຄວາມຊິນເຄີຍດ້ານ ການຊົມໃຊ້ຂອງຜູ້ບໍລິໂພກໃນປະເທດອາຊີຕາເວັນອອກສຽງໃຕ້. ຜູ້ຊົມໃຊ້ຢູ່ປະເທດອາຊີຕາເວັນອອກສ່ຽງໃຕ້ ທີ່ຕ້ອງການແລ່ນລົດ ໃນເສັ້ນທາງອ່າວໄກແດ່, ກໍມີຄວາມຕ້ອງການລົດທີ່ມີຄວາມໄວສູງ ແລະແລ່ນໄດ້ໄກ ສຳລັບການສາກແບັດເຕີຣີເທື່ອໜຶ່ງ. ບໍລິສັດ yadea ບໍລິສັດ Aima ແລະບໍລິສັດອື່ນໆຂອງຈີນ ໄດ້ພາກັນນຳສະເໜີ ຜະລິດຕະພັນລົດຈັກໄຟຟ້າທີ່ມີຄວາມໄວສູງສຸດເຖິງ 50 ກວ່າກິໂລແມັດ ຕໍ່ຊົ່ວໂມງ ແລະສາມາດແລ່ນໄດ້ໃນໄລຍະທາງຫລາຍກວ່າ 100 ກິໂລແມັດ ຕໍ່ການສາກແບັດເຕິຣີເທື່ອໜຶ່ງ.

ປັດຈຸບັນນີ້, ລົດຈັກໄຟຟ້າຂອງຈີນ ໄດ້ຊ່ວຍເພີ່ມການສັນຈອນ ແບບສີຂຽວຢ່າງສະດວກສະບາຍຕໍ່ປະຊາຊົນປະເທດອາຊີຕາເວັນອອກສ່ຽງໃຕ້ນັບມື້ນັບຫລາຍຂຶ້ນ. ເຊື່ອໝັ້ນວ່າຄຽງຄູ່ກັບການພັດທະນາຂອງ ເຕັກໂນໂລຊີພະລັງງານໃໝ່ແລະຕະຫລາດ, ການຮ່ວມມືລະຫວ່າງ ຈີນ ແລະບັນດາປະເທດໃນອາຊີຕາເວັນອອກສ່ຽງໃຕ້ ໃນຂົງເຂດລົດໄຟຟ້າ ຈະປະກອບສ່ວນຫລາຍກວ່າເກົ່າເຂົ້າໃນການພັດທະນາແບບສີຂຽວຂອງທົ່ວໂລກ.

แชร์