ຜົນກອງປະຊຸມສະໄໝສາມັນ ລັດຖະບານ ປະຈໍາເດືອນສິງຫາ 2024 ຫາລື ຫຼາຍບັນຫາສໍາຄັນ ເພື່ອແກ້ໄຂ

ໃນວັນທີ 27 ສິງຫາ 2024 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສິດພະໄຊ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ໂຄສົກລັດຖະບານ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຜົນກອງປະຊຸມສະໄໝສາມັນ ຂອງລັດຖະບານ ປະຈໍາເດືອນສິງຫາ 2024 ວ່າ: ກອງປະຊຸມດັ່ງກ່າວ ໄດ້ໄຂຂຶ້ນໃນວັນທີ 26 ແລະ ອັດລົງ ໃນຕອນບ່າຍວັນທີ 27 ສິງຫາ 2024 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ແຂກຖືກເຊີນ ເຂົ້າຮ່ວມແບບເຊິ່ງໜ້າ, ເຂົ້າຮ່ວມຜ່ານລະບົບກອງປະຊຸມທາງໄກ ເພື່ອຮັບຟັງ ແລະ ປະກອບຄຳເຫັນ ຕໍ່ການລາຍງານສະພາບພົ້ນເດັ່ນ ປະຈຳເດືອນສິງຫາ ແລະ ທິດທາງແຜນວຽກຈຸດສຸມ ປະຈຳເດືອນກັນຍາ 2024.

ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າ, ປຶກສາຫາລື ແລະ ປະກອບຄໍາເຫັນໃສ່ບັນດາຫົວຂໍ້ສຳຄັນ ຄື: ຮ່າງບົດສະຫຼຸບການຈັດຕັ້ງປະຕິບັດວຽກງານຈຸດສຸມປະຈຳເດືອນສິງຫາ ແລະ ທິດທາງແຜນ ການປະຈຳເດືອນກັນຍາ 2024 ຂອງລັດຖະບານ, ການສະເໜີຂໍອະນຸມັດ ເພີ່ມເງິນອຸດໜູນຄ່າຄອງຊີບ ໃຫ້ແກ່ຜູ້ອອກແຮງງານໃນພາກທຸລະກິດ, ຜົນການຄົ້ນຄວ້າໂຄງສ້າງລາຄາໄຟຟ້າໃໝ່ ໄລຍະປີ 2024-2028; ຮ່າງດຳລັດ ວ່າດ້ວຍການຫັນຊັບສິນຂອງລັດເປັນທຶນ; ຮ່າງດຳລັດ ວ່າດ້ວຍການເຄື່ອນຍ້າຍ ແລະ ການນຳເຂົ້າ, ສົ່ງອອກ, ສົ່ງຜ່ານສັດ, ສັດນໍ້າ, ຜະລິດ ຕະພັນສັດ ແລະ ສັດນໍ້າ; ຮ່າງກົດໝາຍ ວ່າດ້ວຍທີ່ຢູ່ອາໄສ; ຮ່າງກົດໝາຍ ວ່າດ້ວຍທະນາຄານແຫ່ງ ສປປ ລາວ (ສະບັບປັບປຸງ); ຮ່າງກົດໝາຍ ວ່າດ້ວຍການກວດສອບອິດສະຫລະ (ສະບັບປັບປຸງ); ຮ່າງກົດໝາຍ ວ່າດ້ວຍການສຶກສາ (ສະບັບປັບປຸງ).

ຜ່ານການຄົ້ນຄວ້າປຶກສາຫາລື, ກອງປະຊຸມເຫັນດີດ້ານຫລັກການຮັບຮອງເອົາບັນດາເນື້ອໃນ ກໍຄື ຫົວຂໍ້ທີ່ໄດ້ນຳມາພິຈາລະນາ ແລະ ມອບໃຫ້ກະຊວງ-ອົງການກ່ຽວຂ້ອງ ນຳໄປປັບປຸງຕາມການປະກອບຄຳເຫັນຂອງສະມາຊິກລັດຖະບານ ເປັນຕົ້ນ ຕໍ່ຮ່າງບົດສະຫລຸບການຈັດຕັ້ງປະຕິບັດວຽກງານຈຸດສຸມປະຈຳເດືອນສິງຫາ ແລະ ທິດທາງແຜນ ການປະຈຳເດືອນກັນຍາ 2024 ຂອງລັດຖະບານ: ໃຫ້ບັນດາກະຊວງ-ອົງການ ແລະ ພາກສ່ວນກ່ຽວຂ້ອງ ເອົາໃຈໃສ່ປະຕິບັດແຜນວຽກຈຸດສຸມ ປະຈຳເດືອນກັນຍາ 2024 ໃຫ້ປະກົດຜົນເປັນຈິງ ຊຶ່ງບັນດາວຽກຈຸດສຸມດັ່ງກ່າວ ນອກຈາກສະເໜີຜ່ານກອງປະຊຸມແລ້ວ ຍັງໄດ້ຊີ້ນຳຫ້ອງວ່າການສຳນັກງານນາຍົກລັດຖະມົນຕີ ໃຫ້ກຳນົດເຂົ້າໃນມະຕິກອງປະຊຸມປະຊຸມລັດຖະບານຄັ້ງນີ້ ເພື່ອເປັນບ່ອນອີງ ໃນການຈັດຕັ້ງປະຕິບັດ. ສຳລັບການສະເໜີຂໍອະນຸມັດ ເພີ່ມເງິນອຸດໜູນຄ່າຄອງຊີບ ໃຫ້ແກ່ຜູ້ອອກແຮງງານໃນພາກທຸລະກິດ: ກອງປະຊຸມເຫັນດີດ້ານຫລັກການ ແລະ ມອບໃຫ້ກະຊວງແຮງງານ ແລະ ສະຫວັດດີການສັງຄົມ ສົມທົບກັບພາກສ່ວນກ່ຽວຂ້ອງກ່ຽວ ກ່ຽວກັບການປະຕິບັດຕົວຈິງ ເພື່ອເຮັດໃຫ້ນະໂຍບາຍດັ່ງກ່າວ ສາມາດຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ ປະສິດທີຜົນ. ສ່ວນຜົນການຄົ້ນຄວ້າໂຄງສ້າງລາຄາໄຟຟ້າໃໝ່ ໄລຍະປີ 2024-2028: ກອງປະຊຸມໄດ້ຊີ້ນໍາໃຫ້ກະຊວງພະລັງງານ ແລະ ບໍ່ແຮ່ ໃຫ້ນຳໄປຄົ້ນຄວ້າຈັດສຳມະນາລະດົມຄວາມຄິດເຫັນຕື່ມ ໂດຍສະເພາະ ວິທີການກຳນົດໂຄງສ້າງລາຄາໄຟຟ້າ ໃຫ້ມີຫລາຍລະດັບ, ປັບດ້ວຍຈັງຫວະທີ່ເໝາະສົມ ກັບສະພາບເສດຖະກິດແລະ ສັງຄົມ ໃນແຕ່ລະໄລຍະ, ພ້ອມທັງສອດຄ່ອງກັບນະໂຍບາຍສົ່ງເສີມການລົງທຶນ ແລະ ອື່ນໆ.

ຕໍ່ຮ່າງດຳລັດ ວ່າດ້ວຍການຫັນຊັບສິນຂອງລັດເປັນທຶນ: ການໃຫ້ນິຍາມບາງຄໍາສັບ ຕ້ອງຈະແຈ້ງ ແລະ ຮັດກຸມຕື່ມ ໂດຍສະເພາະ ວັດຖຸສິ່ງຂອງຕ່າງໆ ທີ່ເປັນຊັບສິນຂອງລັດ; ການຈັດລຽງເນື້ອໃນ ຕ້ອງໃຫ້ສອດຄ່ອງກັບບັນດາໝວດ ແລະ ສອດຄ່ອງກັບຫລັກການສ້າງນິຕິກຳ; ກໍານົດສິດ, ໜ້າທີ່ ຂອງຂະແໜງການເງິນ ແລະ ພາກສ່ວນຕ່າງໆ ໃຫ້ຄົບຖ້ວນສົມບູນ; ກຳນົດອາຍຸການເຊົ່າ ຫລື ສຳປະທານ ໃຫ້ລະອຽດຈະແຈ້ງ, ຊັດເຈນ ເພື່ອຫລີກລ່ຽງຊ່ອງຫວ່າງຕ່າງໆ; ການແບ່ງຄວາມຮັບຜິດຊອບ ພິຈາລະນາຫັນຊັບສິນເປັນທຶນ ໃຫ້ແທດເໝາະກັບລະດັບມູນຄ່າຊັບສິນ ແລະ ຈຸດທີ່ຕັ້ງຂອງຊັບສິນຕື່ມ; ເພີ່ມເຕີມບາງເນື້ອໃນກ່ຽວກັບຂໍ້ຫ້າມ ໃຫ້ເໝາະສົມ. ພ້ອມກັນນີ້ ໃຫ້ກວດກາບັນດາເນື້ອໃນໃຫ້ສອດຄ່ອງກັບກົດໝາຍ ແລະ ນິຕິກຳ ທີ່ກ່ຽວຂ້ອງ ເປັນຕົ້ນ ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍຊັບສິນຂອງລັດ; ພາຍຫລັງ ປະກາດໃຊ້ແລ້ວ ສາມາດຈັດຕັ້ງປະຕິບັດ ໄດ້ຢ່າງມີປະສິດທິຜົນ ແລະ ເກີດຜົນປະໂຫຍດສູງສຸດໃຫ້ແກ່ລັດ.

ຕໍ່ຮ່າງດຳລັດ ວ່າດ້ວຍການເຄື່ອນຍ້າຍ ແລະ ການນຳເຂົ້າ, ສົ່ງອອກ, ສົ່ງຜ່ານສັດ, ສັດນໍ້າ, ຜະລິດ ຕະພັນສັດ ແລະ ສັດນໍ້າ:​ ກໍານົດເນື້ອໃນໃຫ້ຈະແຈ້ງລະອຽດຕື່ມ ໂດຍສະເພາະ ກ່ຽວກັບການນໍາເຂົ້າ, ການສົ່ງອອກ, ການສົ່ງຜ່ານ, ຜູ້ສາມາດຂົນສົ່ງເຄື່ອນຍ້າຍ ແລະ ຂົນສົ່ງສັດປະເພດຕ່າງໆ ລວມທັງນິຍາມຄຳສັບ; ກໍານົດລະອຽດ ກ່ຽວກັບເນື້ອໃນຂອງການຂົນສົ່ງຜ່ານ, ການຂົນສົ່ງລະຫວ່າງເມືອງຕໍ່ເມືອງ, ແຂວງຕໍ່ແຂວງ ເພື່ອເຮັດໃຫ້ການຈັດຕັ້ງປະຕິບັດຖືກຕ້ອງສອດຄ່ອງ ແລະ ຫລຸດຜ່ອນຂອດຂັ້ນ; ລວມທັງ ເນື້ອໃນການຂົນສົ່ງສັດ ປະເພດສັດຫວງຫ້າມ ຕ້ອງໃຫ້ສອດຄ່ອງກັບສົນທີິສັນຍາສາກົນ ໄຊເຕັສ (CITES).

ຕໍ່ຮ່າງກົດໝາຍ ວ່າດ້ວຍທີ່ຢູ່ອາໄສ: ກໍານົດໃຫ້ແຈ້ງ ແລະ ຄົບຖ້ວນຕື່ມ ປະເພດທີ່ຢູ່ອາໄສ ລວມທັງ ການນິຍາມຄຳສັບ, ການນໍາໃຊ້ບັນດາຄໍາສັບ ໃຫ້ຖືກຕ້ອງສອດຄ່ອງ, ລະອຽດຊັດເຈນ ແລະ ເຂົ້າໃຈງ່າຍ; ການກຳນົດການແບ່ງຂັ້ນຄຸ້ມຄອງປະເພດທີ່ຢູ່ອາໄສ ຕ້ອງໃຫ້ຈະແຈ້ງ. ພ້ອມກັນນັ້ນ, ບັນດາເນື້ອໃນ ກໍໃຫ້ສອດຄ່ອງກັບບັນດານິຕິກໍາ ທີ່ໄດ້ປະກາດໃຊ້ກ່ອນແລ້ວ; ສໍາລັບກອງທຶນທີ່ຢູ່ອາໄສ ໃຫ້ພິຈາລະນາສ້າງເປັນນິຕິກຳໜຶ່ງຕ່າງຫາກ.

ຕໍ່ຮ່າງກົດໝາຍ ວ່າດ້ວຍທະນາຄານແຫ່ງ ສປປ ລາວ: ໃຫ້ນິຍາມບັນດາຄຳສັບ ທີ່ກ່ຽວຂ້ອງໃຫ້ຄົບຖ້ວນ; ກໍານົດສິດໃນການອອກ ແລະ ຄຸ້ມຄອງເງິນດີຈິຕອນ; ໃຫ້ແຍກຈະແຈ້ງ ພາລະບົດບາດ, ສິດໜ້າທີ່ ແລະ ການເຄື່ອນໄຫວວຽກງານວິຊາສະເພາະຂອງທະນາຄານແຫ່ງ ສປປ ລາວ; ໃຫ້ຄົ້ນຄວ້າກຳນົດເນື້ອໃນກ່ຽວກັບ ຄະນະຮັບຜິດຊອບຄຸ້ມຄອງວຽກງານ ທະນາຄານຄຳ, ຊັບສິນດີຈິຕອນ ເຂົ້າຕື່ມ; ການແຕ່ງຕັ້ງຄະນະກໍາມະການທີ່ກ່ຽວຂ້ອງ ຕ້ອງໃຫ້ສອດຄ່ອງກັບສະພາບຄວາມເປັນຈິງ ໃນປັດຈຸບັນ ລວມທັງ ການກໍານົດສິດ ແລະ ໜ້າທີ່ ການເຄື່ອນໄຫວຂອງຄະນະດັ່ງກ່າວ; ກຳນົດຄວາມຮັບຜິດຊອບ ໃນການຄຸ້ມຄອງ ແລະ ຊໍາລະສະສາງ ຊັບສິນຂອງທະນາຄານ ທີ່ໄດ້ມາຈາກງົບປະມານຂອງຕົນ ໃຫ້ສອດຄ່ອງກັບກົດໝາຍກ່ຽວຂ້ອງ; ກຳນົດແຈ້ງ ກ່ຽວກັບພາກສ່ວນຮັບຜິດຊອບຄຸ້ມຄອງທຸລະກິດຄຳປະເພດຕ່າງໆ.

ຕໍ່ຮ່າງກົດໝາຍ ວ່າດ້ວຍການກວດສອບອິດສະຫລະ: ໃຫ້ກຳນົດພາລະບົດບາດ ແລະ ຄວາມຮັບຜິດຊອບ ຂອງພາກສ່ວນທີ່ເຮັດໜ້າທີ່ກວດສອບອິດສະຫລະ ໃຫ້ສອດຄ່ອງກັບວຽກງານຕົວຈິງ ເພື່ອຫລິກລ່ຽງການກຳນົດໜ້າທີ່ຊໍ້າຊ້ອນກັບອົງການກວດກາລັດຖະບານ ແລະ ອົງການກວດສອບທີ່ມີແລ້ວ, ທັງຈຳກັດຊ່ອງວ່າງ ທີ່ບໍ່ທັນກຳນົດໄວ້ ໃນນິຕິກຳ; ພ້ອມກັນນີ້ ເນື້ອໃນໃຫ້ສອດຄ່ອງກັບຮ່າງກົດໝາຍກ່ຽວຂ້ອງ ທີ່ໄດ້ປະກາດໃຊ້ແລ້ວ.

ຕໍ່ຮ່າງກົດໝາຍ ວ່າດ້ວຍການສຶກສາ: ໃຫ້ປັບປຸງບາງເນື້ອໃນ, ບາງມາດຕາ ໃຫ້ຊັດເຈນ ຄົບຖ້ວນຂຶ້ນຕື່ມ; ຄົ້ນຄວ້າກໍານົດກ່ຽວກັບຜູ້ຊົງຄຸນວຸທິ ຢູ່ໃນສະພາທີ່ປຶກສາການສຶກສາ; ປັບປຸງເນື້ອໃນຂໍ້ຫ້າມສຳລັບຄູ ໃຫ້ສອດຄ່ອງກວ່າເກົ່າ.

ສຳລັບວຽກຈຸດສຸມຂອງລັດຖະບານ ແຕ່ນີ້ຮອດທ້າຍເດືອນກັນຍາ ແມ່ນສືບຕໍ່ສຸມໃສ່ປະຕິບັດແຜນວຽກຈຸດສຸມ 6 ເດືອນທ້າຍປີ 2024 ທີ່ໄດ້ກຳນົດໄວ້ ໃນມະຕິກອງປະຊຸມລັດຖະບານ ເປີດກວ້າງ ຄັ້ງທີ I ປີ 2024 ຕາມມະຕິ ສະບັບເລກທີ 08/ລບ, ລົງວັນທີ 24 ກໍລະກົດ 2024 ກໍຄືຄຳເຫັນທີ່ເລຂາທິການໃຫຍ່, ປະທານປະເທດ ໄດ້ຊີ້ນໍາ ກ່ຽວກັບການແກ້ໄຂບັນຫາເຄັ່ງຮ້ອນທາງດ້ານເສດຖະກິດ- ການເງິນ, ມາດຕະການແກ້ໄຂໃໝ່ ເພື່ອແກ້ໄຂ 6 ບັນຫາເຄັ່ງຮ້ອນ, ບຸກບືນປະຕິບັດໃຫ້ບັນລຸ 9 ຄາດໝາຍສູ້ຊົນ ໂດຍເອົາໃຈໃສ່ 5 ວິທີເຮັດວຽກແບບບຸກທະລຸ. ໃນນັ້ນ, ວຽກຕົວຈິງ ຮີບດ່ວນຈໍານວນໜຶ່ງ ທີ່ຕ້ອງໄດ້ສຸມໃສ່ ມີຄື:

ສືບຕໍ່ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະການປ້ອງກັນ, ຮັກສາຄວາມສະຫງົບ ແລະ ຮັກສາຄວາມເປັນລະບຽບຮຽບຮ້ອຍ ໃນໄລຍະກະກຽມກອງປະຊຸມສຸດຍອດອາຊຽນ. ພ້ອມນີ້ ໃຫ້ເອົາໃຈໃສ່ຊີ້ນໍາການຮັກຄວາມຄວາມເປັນລະບຽບຮຽບຮ້ອຍການຈາລະຈອນຕາມຖະໜົນ ໃນໄລຍະອາທິດທຳອິດຂອງການເປີດສົກຮຽນໃໝ່; ສືບຕໍ່ແກ້ໄຂປະກົດການຫຍໍ້ທໍ້ໃນສັງຄົມ ໂດຍສະເພາະບັນຫາຢາເສບຕິດ, ກຸ່ມແກ້ງສໍ້ໂກງທາງໂທລະຄົມ ຫລື ຄອນເຊັນເຕີ.

ສືບຕໍ່ປະຕິບັດຕາມແຜນວຽກຈຸດສຸມ ຂອງຄະນະສະເພາະກິດ 19/ກມສພ ໂດຍສະເພາະ ແກ້ໄຂບັນຫາເງິນເຟີ້, ຄຸ້ມຄອງອັດຕາແລກປ່ຽນ ແລະ ລາຄາສິນຄ້າ, ໃນນີ້ ສຸມໃສ່ສະກັດກັ້ນການຄ້ານອກລະບົບ, ການຄ້າຊາຍແດນທີ່ບໍ່ຖືກຕ້ອງຕາມລະບຽບກົດໝາຍ; ຊຸກຍູ້ຜູ້ນຳເຂົ້າ-ສົ່ງອອກ ໃຫ້ຈົດທະບຽນ ແລະ ຊໍາລະສະສາງຜ່ານລະບົບທະນາຄານ; ຊຸກຍູ້ການນຳໃຊ້ເງິນກີບ ໃນທົ່ວສັງຄົມ ແລະ ເດັດຂາດບໍ່ໃຫ້ຮັບເງິນຕາ; ດຶງເອົາເງິນຢູ່ນອກລະບົບ ເຂົ້າສູ່ລະບົບເພື່ອເພີ່ມຄັງສໍາຮອງ; ສຸມໃສ່ແກ້ໄຂບັນຫາໜີ້ສິນ ດ້ວຍການເຈລະຈາປັບໂຄງສ້າງໜີ້ ແລະ ຂະຫຍາຍໄລຍະເວລາຊຳລະໜີ້, ແກ້ໄຂເດັດຂາດໂຄງການກູ້ຢືມບໍ່ເກີດດອກອອກຜົນ; ເລັ່ງທວງໜີ້ ຈາກບັນດາບໍລິສັດ ຢ່າງເຂັ້ມງວດ ແລະ ເດັດຂາດ; ສຸມໃສ່ຈັດຕັ້ງປະຕິບັດ ການຄຸ້ມຄອງຄຳ ແລະ ທຸລະກິດຄຳ. ໃນນີ້, ເກັບກໍາສັງລວມບັນດາຮ້ານຊື້-ຂາຍຄຳ ແລະ ຮີບຮ້ອນສ້າງນິຕິກຳ ເພື່ອຄຸ້ມຄອງແຕ່ສູນກາງຮອດທ້ອງຖິ່ນ; ໃຫ້ທະນາຄານ ແຫ່ງ ສປປ ລາວ ສົມທົບກັບຂະແໜງການກ່ຽວຂ້ອງ ຄົ້ນຄວ້າລະບຽບການ ກຳນົດສິດ, ພາລະບົດບາດ ແລະ ໜ້າທີ່ ລວມທັງ ກົນໄກການປະສານງານ ໃນການຄຸ້ມຄອງທຸລະກິດຄຳ ໃຫ້ຈະແຈ້ງ; ກວດກາບັນດາບໍລິສັດ ທີ່ໄດ້ອະນຸຍາດໃຫ້ຂຸດຄົ້ນຄຳສົ່ງອອກ ແລະ ຈຳໜ່າຍພາຍໃນ.

ແກ້ໄຂບັນຫາພາຫະນະລົດນຳເຂົ້າບໍ່ຖືກຕ້ອງ ແລະ ພາຫະນະຕົກຄ້າງ ຢູ່ເຂດພິເສດສາມຫລ່ຽມຄຳ. ໃນນີ້, ກວດກາ ແລະ ປະເມີນຄືນການຈັດຕັ້ງປະຕິບັດການແກ້ໄຂພາຫະນະທີ່ນໍາເຂົ້າບໍ່ຖືກຕ້ອງ ຕາມຄຳສັ່ງເລກທີ 20/ນຍ ໂດຍສະເພາະ ກຳນົດເວລາການແຈ້ງເສຍພາສີ-ອາກອນ; ກວດກາ ແລະ ເກັບກຳຂໍ້ມູນຕື່ມພາຫະນະລົດລັດ (ປ້າຍຟ້າ) ທີ່ມີການສວຍໃຊ້ບໍ່ຖືກລະບຽບ ພ້ອມທັງສັງລວມຂຶ້ນບັນຊີລະອຽດ. ສືບຕໍ່ຕິດຕາມ ການຈັດຕັ້ງປະຕິບັດບັນດາໂຄງການຂະໜາດໃຫຍ່ ເປັນຕົ້ນໂຄງການທາງດ່ວນ, ໂຄງການໄຟຟ້າເພື່ອສົ່ງຂາຍໄປກຳປູເຈຍ, ໂຄງການທາງລົດໄຟ; ສືບຕໍ່ສຸມໃສ່ແກ້ໄຂກ່ຽວກັບບັນດາຊັບສິນທີ່ລັດຍຶດໄດ້ຈາກຄະດີຕ່າງໆ ໂດຍສະເພາະພາຫະນະ, ທີ່ດິນ, ເຮືອນ ແລະ ອື່ນໆ; ສືບຕໍ່ສຸມໃສ່ສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030), ພ້ອມທັງຮີບຮ້ອນຈັດສັນການລົງທຶນຂອງລັດ ປະຈຳປີ 2025 ໃຫ້ສໍາເລັດ ເພື່ອລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ໃນເດືອນກັນຍາ 2024.

ສຸມໃສ່ແກ້ໄຂຜົນກະທົບໄພທຳມະຊາດ ຈາກຝົນຕົກໜັກ, ເອົາໃຈໃສ່ການຊ່ວຍເຫລືອບັນເທົາທຸກໃຫ້ປະຊາຊົນທີ່ໄດ້ຮັບຜົນກະທົບ ເປັນຕົ້ນການຊ່ວຍເຫລືອສຸກເສີນເບື້ອງຕົ້ນ, ການປະເມີນຜົນກະທົບ ແລະ ສ້າງແຜນຟື້ນຟູ ໂດຍສະເພາະ ເລັ່ງຟື້ນຟູເຂດພື້ນທີ່ທໍາການຜະລິດຂອງປະຊາຊົນ. ພ້ອມນີ້ ກໍສືບຕໍ່ຕິິດຕາມເຝົ້າລະວັງສະພາບດິນຟ້າອາກາດ ເພື່ອກຽມແຜນຮອງຮັບໄພພິບັດທີ່ອາດຈະເກີດຂຶ້ນໃຫ້ທັນການ, ເອົາໃຈໃສ່ຕິດຕາມລະດັບນ້ຳໃນອ່າງເກັບນ້ຳ ຂອງເຂື່ອນໄຟຟ້າຕ່າງໆ ແລະ ມີການບໍລິຫານຈັດການນ້ຳໃຫ້ດີ; ສືບຕໍ່ກະກຽມຄວາມພ້ອມໃນການໄຂສົກຮຽນໃໝ່ໃຫ້ດີ; ສືບຕໍ່ແກ້ໄຂບັນຫາການຂາດແຄນຄູ, ການປະລະການຮຽນ ແລະ ອື່ນໆ ທີ່ຕິດພັນກັບສະຖາບັນການສຶກສາ ໃຫ້ດີຂຶ້້ນ; ສືບຕໍ່ຕິດຕາມເຝົ້າລະວັງ, ປ້ອງກັນ ແລະ ແກ້ໄຂການລະບາດຂອງພະຍາດໄຂ້ເລືອດອອກ, ພະຍາດໄຂ້ເລືອດດຳ ແລະ ພະຍາດຕາມລະດູການອື່ນໆ ທີ່ຈະກະທົບຕໍ່ສຸຂະພາບ, ຊີວິດການເປັນຢູ່ຂອງປະຊາຊົນ

ແຕ່ລະກະຊວງ, ອົງການ ຮີບຮ້ອນສົ່ງແຜນການສ້າງ ແລະ ປັບປຸງກົດໝາຍ 5 ປີ (2026-2030) ພ້ອມທັງນະໂຍບາຍໃນການສ້າງກົດໝາຍ ແລະ ບົດປະເມີນຜົນກະທົບຂອງນະໂຍບາຍໃນການສ້າງກົດໝາຍ ໃຫ້ກະຊວງຍຸຕິທຳ; ສືບຕໍ່ກະກຽມຄວາມພ້ອມຮອບດ້ານໃຫ້ແກ່ການເດີນທາງໄປຢ້ຽມຢາມ ແລະ ເຄື່ອນໄຫວວຽກງານຕ່າງປະເທດຂອງການນຳພັກ-ລັດ ໂດຍສະເພາະ ການຢ້ຽມຢາມລັດຖະກິດ ຢູ່ ສສ ຫວຽດນາມ ຂອງເລຂາທິການໃຫຍ່, ປະທານປະເທດ ແລະ ການເຂົ້າຮ່ວມກອງປະຊຸມສອງກົມການເມືອງ ລາວ-ຫວຽດນາມ ໃນເດືອນກັນຍາ;​ ສືບຕໍ່ສຸມໃສ່ກຽມຄວາມພ້ອມໃຫ້ແກ່ການເປັນເຈົ້າພາບກອງປະຊຸມສຸດຍອດອາຊຽນ.

แชร์