ເຈົ້າແຂວງຄຳມ່ວນ ເນັ້ນໃຫ້ຜູ້ບໍລິຫານການສຶກສາສ້າງເງື່ອນໄຂໃຫ້ນັກຮຽນເຂົ້າຮຽນຫຼາຍຂຶ້ນ

ແຫລ່ງຂ່າວ ແຂວງຄຳມ່ວນ ໃຫ້ຮູ້ວ່າ: ທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນ ໄດ້ໂອ້ລົມໃນວະລະການດຳເນີນກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳສົກຮຽນ 2023-2024 ໃນວັນທີ 26 ສິງຫາ 2024 ໂດຍໄດ້ເນັ້ນໃຫ້ບັນດາຜູ້ບໍລິຫານການສຶກສາ, ອຳນາດການປົກຄອງບ້ານ ແລະ ພະນັກງານ ຄູ-ອາຈານ ໃນທົ່ວເມືອງທ່າແຂກ ໃນແຕ່ລະໂຮງຮຽນສ້າງເງື່ອນໄຂດຶງດູດເຮັດໃຫ້ນັກຮຽນຢາກຮຽນໜັງສືຫລາຍຂຶ້ນເປັນຕົ້ນການປົກປັກຮັກສາໂຮງຮຽນໃຫ້ມີຄວາມສະອາດ, ສວຍງາມ, ມີການປັບປຸງ, ປະດັບປະດາ ລວມເຖິງການສ້າງສະພາບແວດລ້ອມທີ່ດີຢູ່ພາຍໃນໂຮງຮຽນ, ມີການປັບປຸງທາງດ້ານລະບົບການຮຽນ-ການສອນ ໂດຍໃຫ້ນັກຮຽນໄດ້ມີສ່ວນຮ່ວມ ແລະໃຫ້ຫັນເຂົ້າສູ່ລະບຽບການ.

ທ່ານເຈົ້າແຂວງໆຄຳມ່ວນ ກ່າວວ່າ: ຕ້ອງສ້າງສະຕິຄວາມເປັນເຈົ້າ ຂອງຄູ-ອາຈານ ໂດຍມີການຕິດຕາມການຮຽນ-ການສອນ ເພື່ອປະເມີນທາງດ້ານຄຸນນະພາບ ພ້ອມທັງມີການປັບປຸງແກ້ໄຂດ້ານອ່ອນໃຫ້ດີຂຶ້ນ, ເອົາໃຈໃສ່ຍົກລະດັບ ຄູ-ອາຈານ ໃນແຕ່ລະໂຮງຮຽນ ໃຫ້ມີຄວາມຮູ້, ຄວາມສາມາດ ດ້ວຍຮູບການຝຶກອົບຮົມ ຫລື ໄປຍົກລະດັບ ເພື່ອເຮັດໃຫ້ການສິດສອນມີຄຸນນະພາບ, ຍົກສູງຄວາມຮັບຜິດຊອບ, ຄວາມເປັນເຈົ້າການຂອງຜູ້ບໍລິຫານການສຶກສາໃຫ້ສູງຂຶ້ນເພື່ອເປັນຫລັກແຫລ່ງໃນການຊອກຫາວິທີແກ້ໄຂບັນຫາການປະລະການຮຽນ ແລະບັນຫາອື່ນໆ ພ້ອມນັ້ນ, ກໍໃຫ້ມີການຄັດເລືອກພະນັກງານຄູດີເດັ່ນ, ຄູສອນດີສອນເກັ່ງ ພ້ອມມີການຍ້ອງຍໍສັນລະເສີນ ເພື່ອເປັນການກະຕຸ້ນຈິດໃຈ ໃນການປະຕິບັດໜ້າທີ່ວຽກງານ, ໃຫ້ອຳນາດການປົກຄອງບ້ານ, ຄອບຄົວ ເຮັດໜ້າທີ່ ຕິດຕາມ, ກວດກາລູກ-ຫລານ, ມີການຄົ້ນຄວ້າສາເຫດຂອງການປະລະການຮຽນ ແລະມີກົນໄກໂຄສະນາ ໃຫ້ລູກ-ຫລານ ເຫັນໄດ້ຄວາມສຳຄັນຂອງການຮຽນ-ການສຶກສາໃຫ້ຫລາຍຂຶ້ນ.

แชร์