ກອງປະຊຸມຄົບຄະນະສະມາຊິກເຄືອຂ່າຍຮ່ວມມືຍຸຕິທຳພາກພື້ນອາຊີຕາເວັນອອກສ່ຽງໃຕ້

ອົງການໄອຍະການປະຊາຊົນສູງສຸດ (ອອປສ) ໄດ້ຮັບກຽດເປັນເຈົ້າພາບຈັດກອງປະຊຸມຄົບຄະນະຂອງສະມາຊິກເຄືອຂ່າຍຮ່ວມມືຍຸຕິທໍາພາກພື້ນອາຊີຕາເວັນອອກສຽງໃຕ້ (Plenary Meeting of the South East Asia Justice Network) ປະຈໍາປີ 2024 ຂຶ້ນໃນວັນທີ 27 ສິງຫາ ນີ້ ທີ່ ໂຮງແຮມຄຣາວພຣາຊາ ນະຄອນຫຼວງວຽງຈັນ, ໂດຍການເປັນປະທານຂອງ ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສຸງສຸດ ແຫ່ງ ສປປ ລາວ, ມີບັນດາຄະນະຜູ້ແທນຈາກປະເທດສະມາຊິກອາຊຽນ ແລະປະເທດທີ່ເປັນສະມາຊິກ (SEAJust) ລວມ 21 ປະເທດ ເຂົ້າຮ່ວມທັງໝົດ 70 ທ່ານ.

ໂອກາດນີ້,ທ່ານ ບຸນທັນ ບຸນທະວິໄລ ກ່າວວ່າ: ກອງປະຊຸມຄົບຄະນະຂອງສະມາຊິກເຄືອຂ່າຍຮ່ວມມືຍຸຕິທຳພາກພື້ນອາຊີຕາເວັນອອກສ່ຽງໃຕ້ (SEAJust) ປະຈໍາປີ 2024 ນີ້ ແມ່ນເພື່ອສ້າງຄວາມເຂັ້ມແຂງໃຫ້ແກ່ການຮ່ວມມືລະຫວ່າງປະເທດທາງອາຍາ ແລະ ສົ່ງເສີມບົດບາດຂອງອົງການໃຈກາງປະສານງານ ພ້ອມທັງເປັນການເສີມຂະຫຍາຍສາຍພົວພັນການຮ່ວມມືຂອງບັນດາປະເທດທີ່ເປັນສະມະຊິກ (SEAJust) ໂດຍສະເພາະການແລກປ່ຽນບົດຮຽນ, ປະສົບການທີ່ດີ ແລະ ສິ່ງທ້າທາຍຕ່າງໆ ໃນການຈັດຕັ້ງປະຕິບັດວຽກງານການຮ່ວມມືລະຫວ່າງປະເທດ Mutua LegalAssistance in Criminal Maters (MLA) ຂອງບັນດາປະເທດຕ່າງໆ ໃນໄລຍະຜ່ານມາ ເພື່ອສົ່ງເສີມການຮ່ວມມື ແລະ ສ້າງຄວາມເຂັ້ມແຂງ ໃຫ້ແກ່ອົງການໃຈກາງປະສານງານຮ່ວມມືລະຫວ່າງປະເທດທາງອາຍາຂອງພາກພື້ນ ແລະໃນໂລກໃຫ້ນັບມື້ນັບກ້າວໜ້າສູ່ລວງເລິກ ແລະມີປະສິດທິຜົນຢ່າງບໍ່ຢຸດຢັ້ງ.

ໃນກອງປະຊຸມຄັ້ງນີ້, ບັນດາຜູ້ເຂົ້າຮ່ວມກໍໄດ້ຮັບຟັງການລາຍງານຜົນສຳເລັດ, ການປືກສາຫາລື, ແລກປ່ຽນບົດຮຽນ ແລະສິ່ງທ້າທາຍໃນການຈັດຕັ້ງປະຕິບັດວຽກງານຮ່ວມມືລະຫວ່າງປະເທດທາງອາຍາຂອງສະມາຊິກອົງການ (SEAJust), ພາບລວມກ່ຽວກັບເຄືອຄ່າຍ SEAJust, ສົນທະນາແລກປ່ຽນບົດຮຽນເພື່ອສົ່ງເສີມການຮ່ວມມືກັບບັນດາປະເທດຕ່າງໆ, ການນຳໃຊ້ເຄື່ອງມືເອເລັກໂຕຣນິກເຂົ້າໃນການຮ່ວມມືສາກົນ, ສຳມະນາດ້ານວິຊາການກົດໝາຍ ກ່ຽວກັບຫົວຂໍ້ການນໍາໃຊ້ຫຼັກຖານທາງດີຈີຕອນໃນການຕ້ານອາຊະຍາກຳ ແລະຫົວຂໍ້ສິ່ງທ້າທາຍກ່ຽວກັບການເກັບກູ້ຊັບສິນຄືນໃນຂົງເຂດຊາຍແດນຮ່ວມກັນ.
ຂ່າວ: ຂປລ

แชร์