ເຈົ້າໜ້າທີ່ ສືບຕໍ່ກວດກາ ກຸ່ມເປົ້າໝາຍ ເຄື່ອນໄຫວບໍ່ຖືກຕ້ອງ ຢູ່ສາມຫຼ່ຽມຄຳ

ໃນວັນທີ 27 ສິງຫາ 2024, ເຈົ້າໜ້າທີ່ ປ້ອງກັນຄວາມສະຫງົບ ເຂດເສດຖະກິດພິເສດສາມຫຼ່ຽມຄໍາ ສົມທົບກັບ ສະພາບໍລິຫານເຂດ, ຄະນະປະສານງານທະຫານເຂດ, ຄະນະຄຸ້ມຄອງເຂດ ແລະ ບໍລິສັດຈັດການໄຊເບີລາວ ຈໍາກັດ ສືບຕໍ່ລົງເຄື່ອນໄຫວ ດໍາເນີນການກວດກາ ແລະລົບລ້າງກຸ່ມແກ້ງສໍ້ໂກງທາງໂທລະຄົມ (Call Center) ຢູ່ 4 ຈຸດ ໃນ 46 ຄຸ້ມ, ໃນ 16 ບໍລິສັດ ທີ່ເຄື່ອນໄຫວບໍ່ຖືກຕ້ອງຕາມກົດໝາຍ ຢູ່ເຂດເສດຖະກິດພິເສດສາມຫຼ່ຽມຄໍາ. ຜ່ານການຈັດຕັ້ງປະຕິບັດໜ້າທີ່ຕົວຈິງ ຂອງເຈົ້າໜ້າທີ່ ໃນວັນທີ 26 ສິງຫາ 2024 ສາມາດຄວບຄຸມ ຫລືກັກຕົວ ກຸ່ມແກ້ງສໍ້ໂກງທາງໂທລະຄົມ ໄດ້ຫລາຍສົມຄວນ. ໃນນັ້ນ, ຄົນຕ່າງປະເທດ ໄດ້ 60 ກວ່າຄົນ ແລະ ຄົນລາວ ອີກຈຳນວນໜຶ່ງ, ຢຶດຂອງກາງ ເປັນຕົ້ນ ຄອມພິວເຕີ, ໂນດບຸກ, ຕູ້ເຊັບ, ໂທລະສັບມືຖື ແລະ ອື່ນໆ ໄດ້ຫລາຍສົມຄວນ.

ໂອກາດນີ້, ທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການປ້ອງກັນຄວາມສະຫງົບ ເຂດເສດຖະກິດພິເສດສາມຫລ່ຽມຄຳ ໃຫ້ສຳພາດວ່າ: ການຈັດຕັ້ງປະຕິບັດ ດໍາເນີນການກວດກາ ແລະ ລົບລ້າງກຸ່ມແກ້ງສໍ້ໂກງທາງໂທລະຄົມ ໃນຄັ້ງນີ້, ຖືເປັນຄັ້ງທີ 11 ພາຍຫລັງ ເລີ່ມມາແຕ່ຕົ້ນປີ 2023 ເຊິ່ງສາມາດ ຮື້ຖອນ ໄດ້ ທັງໝົດ 240 ກວ່າບໍລິສັດ ແລະ ການຈັດຕັ້ງປະຕິບັດງານ ໃນຄັ້ງນີ້ ແມ່ນສືບຕໍ່ປະຕິບັດຕາມບົດບັນທຶກກອງປະຊຸມ ການດໍາເນີນການລົບລ້າງກຸ່ມແກ້ງສໍ້ໂກງທາງໂທລະຄົມ ຢູ່ເຂດເສດຖະກິດພິເສດສາມຫລ່ຽມຄໍາ ໃນຄັ້ງວັນທີ 9 ສິງຫາ 2024 ຜ່ານມາ ເຊິ່ງໄດ້ກຳນົດວ່າ ນັບແຕ່ວັນທີ 9-25 ສິງຫາ 2024 ໃຫ້ຜູ້ປະກອບການທີ່ເຄື່ອນໄຫວບໍ່ຖືກຕ້ອງຕາມກົດໝາຍໃຫ້ຢຸດເຊົາ,ຍົກເລີກ, ຮື້ຖອນ ແລະຫັນມາເຂົ້າສູ່ສະບຽບກົດໝາຍ, ຫລັງຈາກນັ້ນ, ໃນວັນທີ 26-27 ສິງຫາ 2024 ກອງບັນຊາການ ປກສ ເຂດເສດຖະກິດພິເສດສາມຫລ່ຽມຄໍາ ໄດ້ສົມທົບກັບ ພາກສ່ວນທີ່ກ່ຽວຂ້ອງ ດໍາເນີນການກວດກາ ແລະ ລົບລ້າງກຸ່ມແກ້ງສໍ້ໂກງທາງໂທລະຄົມ ກໍຄື ກຸ່ມເປົ້າໝາຍ ທີ່ເຄື່ອນໄຫວບໍ່ຖືກຕ້ອງ ຢູ່ 4 ຈຸດ ໃນ 46 ຄຸ້ມ, ຜ່ານການປະຕິບັດຕົວຈິງ ເຫັນວ່າບາງບໍລິສັດ ໄດ້ຍົກຍ້າຍ ຫລື ຮື້ຖອນ ອອກແລ້ວ, ແຕ່ຍັງມີບາງບໍລິສັດ ຍັງສືບຕໍ່ດຳເນີນຢູ່ ເຊິ່ງ ເຈົ້າໜ້າທີ່ສາມາດຄວບຄຸມ ຫລື ກັກຕົວ ຜູ້ທີ່ຍັງສືບຕໍ່ດຳເນີນທຸລະກິດທີ່ຜິດກົດໝາຍ, ພ້ອມຢຶດຂອງກາງ ໄດ້ຫລາຍສົມຄວນ. ຢ່າງໃດກໍຕາມ ເຈົ້າໜ້າທີ່ ປ້ອງກັນຄວາມສະຫງົບເຂດເສດຖະກິດພິເສດສາມຫລ່ຽມຄຳ ຍັງຈະສືບຕໍ່ ຮ່ວມກັບພາກສ່ວນທີ່ກ່ຽວຂ້ອງ ດຳເນີນການກວດກາ ແລະ ລົບລ້າງກຸ່ມແກ້ງສໍ້ໂກງທາງໂທລະຄົມ ຕື່ມອີກ ຈົນກວ່າຈະສຳເລັດ ທັງໝົດ 46 ຄຸ້ມ ແລະ ຍັງຈະສືບຕໍ່ ກວດກາ ຄຸ້ມອື່ນໆຕື່ມອີກ ທີ່ສົງໄສວ່າ ເຄື່ອນໄຫວກິດຈະການບໍ່ຖືກຕ້ອງ. ທັງນີ້, ກໍເພື່ອແນໃສ່ເຮັດໃຫ້ເຂດເສດຖະກິດພິເສດສາມຫລ່ຽມຄຳ ເປັນເຂດທີ່ມີຄວາມໂປງໃສ, ຍຸຕິທຳ ເພື່ອດຶງດູດ ເອົານັກທ່ອງທ່ຽວ, ນັກລົງທຶນທັງພາຍໃນ ແລະຕ່າງປະເທດ ເຂົ້າມາທ່ອງທ່ຽວ ແລະລົງທຶນ ຢູ່ ສປປ ລາວ ກໍຄື ເມືອງຕົ້ນເຜິ້ງ ແຂວງບໍ່ແກ້ວ ໃຫ້ຫລາຍຂຶ້ນໃນອະນາຄົດ ແລະຍາວນານ.

ສຳລັບການກັກຕົວຜູ້ນຳເນີນທຸລະກິດທີ່ຜິດກົດໝາຍນອກຈາກຜູ້ທີ່ມີການເຄື່ອນໄຫວຜິດຮ້າຍແຮງເປັນຕົ້ນການຄ້າຂາຍອາວຸດ ຫລື ສິ່ງເສບຕິດ, ການເຂົ້າເມືອງຜິດກົດໝາຍ, ອາຊະຍາກອນຂ້າມຊາດ ຕ້ອງໄດ້ສົ່ງໄປຍັງຄ້າຍຄຸມຂັງ ເພື່ອສືບຕໍ່ແກ້ໄຂຕາມລະບຽບການ ແລະ ຂັ້ນຕອນ. ສ່ວນພະນັງການ ຫລື ແຮງງານຕອບແຊັດທົ່ວໄປແມ່ນມອບໃຫ້ບໍລິສັດ, ຜູ້ໃຊ້ແຮງງານສົມທົບກັບບໍລິສັດຜູ້ຄຸ້ມຄອງຕຶກ ແລະ ລປພ ຂອງຕຶກເປັນຜູ້ຮັບຜິດຊອບໃນການຕິດຕາມ ແລະສືບຕໍ່ສະໜອງສະຖານທີ່ພັກເຊົາ ແລະອາຫານການກິນຈົນກວ່າຜູ້ກ່ຽວສາມາດກັບຄືນປະເທດ.
ທີ່ມາ: ຂປລ.

แชร์