ປກສ ເມືອງໄຊເສດຖາ ສຶກສາອົບຮົມໄວໜຸ່ມ 21 ຄົນ ທີ່ມົ້ວສຸມສິ່ງເສບຕິດ

ໃນວັນທີ 26 ສິງຫາ 2024 ທີ່ສະໂມສອນກອງບັນຊາການ ປ້ອງກັນຄວາມສະຫງົບ ເມືອງໄຊເສດຖາ ແຂວງອັດຕະປື ໄດ້ມີການສຶກສາອົບຮົມກຸ່ມໄວໜຸ່ມທີ່ມົ້ວສຸມສິ່ງເສບຕິດ ໂດຍການເປັນປະທານຂອງ ທ່ານ ພັນໂທ ບຸນດົ້ງ ພິຈິດ ຮອງກອງບັນຊາການ ປ້ອງກັນຄວາມສະຫງົບເມືອງ, ມີອຳນາດການປົກຄອງບ້ານ, ພໍ່ແມ່ຜູ້ປົກຄອງ ແລະ ເປົ້າໝາຍກຸ່ມມົ້ມສຸມສິ່ງເສບຕິດເຂົ້າຮ່ວມ.
ໃນພິທີ ທ່ານ ພັນຕີ ທອງພູນ ພຸດທະພັນ ຫົວໜ້າພະແນກຕຳຫຼວດ ກອງບັນຊາການປ້ອງກັນຄວາມສະຫງົບເມືອງ ໄດ້ລາຍງານໃຫ້ຮູ້ວ່າ: ໃນວັນທີ 23 ສິງຫາ 2024 ທາງເຈົ້າໜ້າທີ່ ປ້ອງກັນຄວາມສະຫງົບເມືອງໄຊເສດຖາ ໄດ້ຮັບແຫຼ່ງຂ່າວຈາກພົນລະເມືອງດີວ່າມີໄວໜຸ່ມຈໍານວນໜຶ່ງມົ້ວສຸມສິ່ງເສບຕິດ ດັ່ງນັ້ນ ທາງເຈົ້າໜ້າທີ່ ຈຶ່ງໄດ້ປະສານກັບ ປກສ ກຸ່ມບ້ານ ໂພໄຊ ແລະ ອົງການຈັດຕັ້ງ ບ້ານຊ້າຍ ພ້ອມກັນລົງກວດກາຕົວຈິງຢູ່ທີ່ເຮືອນຂອງນາງ ຈັນສະໄໝ ອາຍຸ 58 ປີ, ອາຊີບປະຊາຊົນ, ບ້ານຊ້າຍ ເຫັນວ່າມີມູນຄວາມຈິງແທ້ ຈິ່ງໄດ້ກັກຕົວກຸ່ມໄວໜຸ່ມ ຈໍານວນ 21 ຄົນ, ຍິງ 17 ຄົນ ແລະ ຍຶດຂອງກາງປະກອບ ມີ: ຢາສູບໄຟຟ້າ 8 ອັນ, ຄໍລາເຈນ 26 ຊອງ, ນ້ຳກະທ້ອມຕົ້ມຈຳນວນ 1 ໝໍ້, ຜ່ານການສືບສວນ-ສອບສວນ ຢ່າງລະອຽດ, ພາວະວິໃສ ແລະຖືກຕ້ອງຕາມກົດໝາຍ ພວກກ່ຽວໄດ້ຮັບສາລະພາບວ່າ ໄດ້ມີການຊຸມແຊວດື່ມເບຍ ແລະ ດື່ມນ້ຳກະທ້ອມແທ້. ດັ່ງນັ້ນ ທາງເຈົ້າໜ້າທີ່ຈຶ່ງໄດ້ນໍາຕົວກຸ່ມມົ້ມສຸມສິ່ງເສບຕິດຈໍານວນດັ່ງກ່າວມາທໍາການສຶກສາອົບຮົມກ່າວເຕືອນ ແລະ ເຮັດບົດບັນທຶກ ເພື່ອບໍ່ໃຫ້ມີການກັບຄືນໄປເຮັດໃນສິ່ງທີ່ບໍ່ດີນັ້ນອີກ.
ໂອກາດດັ່ງກ່າວໃນພິທີ ທ່ານ ພັນໂທ ບຸນດົ້ງ ພິຈິດ ຮອງກອງບັນຊາການ ປ້ອງກັນຄວາມສະຫງົບເມືອງໄຊເສດຖາ ໄດ້ໂອ້ລົມ ເພື່ອເປັນການສຶກສາອົບຮົມ ແລະ ກ່າວເຕືອນ ຕໍ່ກຸ່ມເປົ້າໝາຍ ໃຫ້ຮູ້ເຖິງຄວາມຜິດຂອງຕົນເອງ ເພື່ອບໍ່ໃຫ້ກະທຳຊ້ຳອີກ ແລະ ຮຽກຮ້ອງໃຫ້ພໍ່ແມ່ຜູ້ປົກຄອງ ຕ້ອງໄດ້ເອົາໃຈໃສ່ຕິດຕາມການເຄື່ອນໄຫວຂອງລູກຫຼານຢ່າງໃກ້ຊິດ, ຮຽກຮ້ອງໃຫ້ລູກຫຼານຜູ້ທີ່ຍັງໜຸ່ມນ້ອຍ, ທີ່ເປັນກໍາລັງແຮງອັນສໍາຄັນຂອງປະເທດຊາດ ຈົ່ງຢ່າໄດ້ໄປມົ້ວສຸມກັບສິ່ງເສບຕິດອີກ ເພາະວ່າຖ້າຕິດສິ່ງເສບຕິດຂື້ນມາກໍຈະພາໃຫ້ເສຍເງິນ, ເສຍສຸຂະພາບ ແລະ ເສຍອະນາຄົດ.
ຂ່າວ: ຖວທ ເມືອງໄຊເສດຖາ

แชร์