ປກສ ເມືອງຫຼວງນໍ້າທາ ກັກຕົວກຸ່ມມົ້ວສຸມນໍ້າໃບກະທ່ອມ

ໃນວັນທີ 19 ສິງຫາ 2024 ເຈົ້າໜ້າທີ່ຕຳຫຼວດກອງບັນຊາການ ປກສ ເມືອງຫຼວງນ້ຳທາ ແຂວງຫຼວງນ້ຳທາ ໄດ້ກັກຜູ້ທີ່ມົ້ວສຸມນໍ້າໃບກະທ່ອມ ຈຳນວນ 03 ຄົນ, ຍຶດຂອງກາງໃບກະທ່ອມ ພ້ອມນ້ຳຢາ 06 ຊຸດ ແລະ ຢາສູບໄຟຟ້າ 02 ຫຼອດ. ໃນນີ້, ທ້າວ ນຸ້ຍ ອາຍຸ 25 ປີ ປະຊາຊົນ ແລະ ທ້າວ ອາທິດ ອາຍຸ 25 ປີ ປະຊາຊົນ ພວກກ່ຽວທັງ 02 ຄົນ ຢູ່ບ້ານອຸດົມຜົນ ເມືອງໄຊທານີ ນະຄອນຫລວງວຽງຈັນ; ນາງ ສຸລານີ ອາຍຸ 19 ປີ ປະຊາຊົນ ຢູ່ບ້ານຫົວຂົວ ເມືອງຫຼວງນໍ້າທາ ແຂວງຫຼວງນໍ້າທາ.
ທ່ານ ຮ້ອຍເອກ ອານຸສັກ ອິນທະປະເສີດ ຮອງຫົວໜ້າພະແນກຕຳຫຼວດ ປກສ ເມືອງຫຼວງນ້ຳທາ ໃຫ້ຮູ້ວ່າ: ພວກກ່ຽວທັງ 03 ແມ່ນໄດ້ເຄື່ອນໄຫວບໍ່ຖືກຕ້ອງ ເຊິ່ງຜິດຕໍ່ຄຳສັ່ງ ຂອງອົງການໄອຍະການປະຊາຊົນສູງສຸດ ສະບັບເລກທີ 006/ອອປສ ກ່ຽວກັບການດຳເນີນຄະດີຕໍ່ການປູກ, ຜະລິດ, ປຸງແຕ່ງ, ຄ້າ-ຂາຍ, ຈຳ ໜ່າຍ, ຂົນສົ່ງ, ຄອບຄອງ, ນຳເຂົ້າ-ສົ່ງອອກ, ເສບພືດທີ່ມີສານເສບຕິດ ເຊັ່ນ: ໃບກະທ່ອມ, ນ້ຳທ່ອມ ຫຼື ສານລະເຫີຍທີ່ມີສານເສບຕິດ ປະເພດປຸມເປົ້າອັດແກ໊ສສານໄນຕັດອ໋ອກໄຊ ແລະ ຢາສູບໄຟຟ້າ-ຊີຊາ (ບາລາກູ). ດັ່ງນັ້ນ, ຈຶ່ງໄດ້ກັກພວກກ່ຽວ ແລະ ຍຶດຂອງກາງ ພ້ອມທັງສຶກສາອົບຮົມໃຫ້ເຂົາເຈົ້າເຂົ້າໃຈເພີ່ມຕື່ມ ເພື່ອບໍ່ໃຫ້ໄປພົວພັນ ຫຼື ມົ້ວສຸມນໍ້າໃບກະທ່ອມ ແລະ ສິ່ງເສບຕິດອື່ນໆ ອີກໃນຕໍ່ໜ້າ.
ຂ່າວ: ປກສ ເມືອງຫຼວງນໍ້າທາ

แชร์