ເທີນ-ຫີນບູນ ສຶກສາຄວາມເປັນໄປໄດ້ພັດທະນາໂຄງການໄຟຟ້ານ້ຳຕົກ

ໃນຕອນແລງຂອງວັນທີ 22 ສິງຫາ 2024, ຢູ່ທີ່ກະຊວງແຜນການ ແລະ ການລົງທຶນ, ທ່ານ ສະຖາບັນດິດ ອິນສີຊຽງໃໝ່, ຮອງລັດຖະມົນຕີກະຊວງແຜນການ ແລະ ການລົງທຶນ, ຕາງໜ້າໃຫ້ລັດຖະບານ ແຫ່ງ ສປປ ລາວ ແລະ ທ່ານ ຈີ່ຊົ່ງ ຈື່ຫວ່າໄຊກິ, ຜູ້ອຳນວຍການໃຫຍ່ບໍລິສັດ ເທີນ-ຫີນບູນ ພາວເວີ ຈຳກັດ ໄດ້ເຊັນສັນຍາບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ໃນການພັດທະນາໂຄງການໄຟຟ້ານໍ້າຕົກທ້າຍເຮືອນຈັກ ເທີນ-ຫີນບູນ, ຢູ່ບ້ານນ້ຳສະນາມ, ເມືອງຄູນຄຳ, ແຂວງຄຳມ່ວນ. ໂດຍການເປັນສັກຂີພິຍານຂອງທ່ານ ທອງພັດ ອິນທະວົງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່; ທ່ານ ປອ ສົມສະອາດ ອຸ່ນສີດາ, ຮອງເຈົ້າແຂວງ ແຂວງຄຳມ່ວນ; ທ່ານ ໝັ້ນຍືນ ຄີນສະໝອນ, ຫົວໜ້າພະແນກແຜນການ ແລະ ການລົງທຶນແຂວງຄຳມ່ວນ; ບັນດ່າຜູ້ຖືຮຸ້ນຂອງບໍລິສັດ, ພ້ອມທັງມີບັນດາກົມກອງທີ່ກ່ຽວຂ້ອງຂອງຫ້ອງວ່າການສຳນັກງານນາຍົກລັດຖະມົນຕີ, ກະຊວງແຜນການ ແລະ ການລົງທຶນ, ກະຊວງພະລັງງານ ແລະ ບໍ່ແຮ່, ອົງການປົກຄອງແຂວງຄຳມ່ວນ, ເມືອງຄູນຄຳ ແລະ ບັນດາຜູ້ບໍລິຫານຂອງບໍລິສັດ ເທີນ-ຫີນບູນ ພາວເວີ ຈຳກັດ ເຂົ້າຮ່ວມຢ່າງພ້ອມພຽງ.
ໂຄງການດັ່ງກ່າວ ຕັ້ງຢູ່ຄອງນ້ຳທ້າຍເຮືອນຈັກ ຂອງບໍລິສັດ ເທີນ-ຫີນບູນ ພາວເວີ ຈຳກັດ, ຢູ່ເຂດບ້ານນ້ຳສະນາມ, ເມືອງຄູນຄຳ, ແຂວງຄຳມ່ວນ. ພາຍຫຼັງສຳເລັດການກໍ່ສ້າງ, ໂຄງການດັ່ງກ່າວຈະມີກຳລັງຕິດຕັ້ງ ປະມານ 8 MW ໂດຍນໍາໃຊ້ນໍ້າທີ່ຜະລິດໄຟຟ້າແລ້ວທີ່ປ່ອຍອອກຈາກໂຮງຈັກຜະລິດໄຟຟ້າຂອງບໍລິສັດເທີນ-ຫີນບູນ ພາວເວີ ຈຳກັດ, ເປັນການນຳໃຊ້ນໍ້າຄືນອີກເທື່ອໜຶ່ງມາຜະລິດພະລັງງານໄຟຟ້າ ເພື່ອຊົມໃຊ້ຢູ່ພາຍໃນປະເທດໂດຍຜ່ານລັດວິສາຫະກິດໄຟຟ້າລາວ ເພື່ອສະໜອງໄຟຟ້າໃຫ້ພຽງພໍ ແລະ ເປັນປົກກະຕິ ພ້ອມທັງປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນ ແລະການ ພັດທະນາເສດຖະກິດ-ສັງຄົມໃນທ້ອງຖີ່ນ.

ບໍລິສັດ ເທີນ-ຫີນບູນ ພາວເວີ ຈຳກັດ ມີຄວາມມຸ່ງໝັ້ນໃນການພັດທະນາໂຄງການໄຟຟ້າແບບຍືນຍົງ, ເປັນມິດກັບສິ່ງແວດລ້ອມ ແລະ ກ້າວໄປສູ່ການຄຸ້ມຄອງ ແລະ ການບໍລິຫານໂຄງການໃຫ້ໄດ້ມາດຖານສາກົນ.

ບໍລິສັດ ເທີນ-ຫີນບູນ ພາວເວີ ຈຳກັດ ປະກອບມີສອງເຂື່ອນຄື: ເຂື່ອນເທີນ-ຫີນບູນ ແລະ ເຂື່ອນນ້ຳຍວງ ຊຶ່ງຕັ້ງຢູ່ແຂວງບໍລິຄຳໄຊ ແລະ ແຂວງຄຳມ່ວນ, ມີ ກຳລັງຕິດຕັ້ງລວມ 520 ເມກາວັດ. ນອກຈາກການຜະລິດໄຟຟ້າເປັນບຸລິມະສິດຕົ້ນຕໍແລ້ວ ບໍລິສັດຍັງໄດ້ຈັດຕັ້ງປະຕິບັດກິດຈະກຳທາງດ້ານສັງຄົມ ແລະ ສິ່ງແວດລ້ອມຢູ່ 05 ຕົວເມືອງ ພາຍໃນ 02 ແຂວງ ຕື່ມອີກ. ນັບຕັ້ງແຕ່ການຜະລິດໄຟຟ້າຂອງໂຄງການ ໃນປີ 1998 ຫາ 2023, ບໍລິສັດ ເທີນ-ຫີນບູນ ພາວເວີ ຈຳກັດ ໄດ້ປະຕິບັດພັນທະໃຫ້ລັດຖະບານ ຫຼາຍກວ່າ 795 ລ້ານໂດລາສະຫາລັດ ຊຶ່ງລວມມີ: ເງິນປັນຜົນ 487.36 ລ້ານໂດລາສະຫະລັດ, ອາກອນກຳໄລ 150.08 ລ້ານໂດລາສະຫະລັດ ແລະ ເງິນຄ່າພາກຫຼວງ 125.46 ລ້ານໂດລາສະຫະລັດ.

แชร์