ລາວ ເປັນເຈົ້າພາບ ຈັດກອງປະຊຸມສຸດຍອດການນໍາແມ່ຍິງອາຊຽນ ຄັ້ງທີ III

ໃນວັນທີ 23 ສິງຫາ 2024 ນີ້, ສປປ ລາວ ໄດ້ເປັນເຈົ້າພາບຈັດກອງປະຊຸມສຸດຍອດການນໍາແມ່ຍິງອາຊຽນ ຄັ້ງທີ III ຢູ່ນະຄອນຫລວງວຽງຈັນ ພາຍໃຕ້ຫົວຂໍ້: “ສົ່ງເສີມວຽກງານເສດຖະກິດການດູແລເບິ່ງແຍງ ແລະ ຄວາມເຂັ້ມແຂງ ເພື່ອກ້າວສູ່ປະຊາຄົມອາຊຽນທີ່ຍືນຍົງ ຫລັງປີ 2025” ໂດຍການເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໂດຍມີບັນດາຜູ້ນຳອາຊຽນ, ບັນດາລັດຖະມົນຕີຮັບຜິດຊອບວຽກແມ່ຍິງ ອາຊຽນ ແລະ ຕີມໍແລັດສະເຕ, ເລຂາທິການໃຫຍ່ອາຊຽນ, ຜູ້ຕາງໜ້າຈາກຄູ່ຮ່ວມພັດທະນາ, ພ້ອມດ້ວຍຫົວໜ້າຂະແໜງການທີ່ກ່ຽວຂ້ອງຂອງ 10 ປະເທດອາຊຽນ ເຂົ້າຮ່ວມແບບເຊິ່ງໜ້າ ແລະ ແບບທາງໄກ.

ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ຂຶ້ນກ້າວເປີດກອງປະຊຸມຢ່າງເປັນທາງການວ່າ: ກອງປະຊຸມໃນຄັ້ງນີ້, ສະແດງເຖິງຄວາມໝາຍໝັ້ນຂອງບັນດາປະເທດສະມາຊິກອາຊຽນ ທີ່ຈະສືບຕໍ່ເສີມຂະຫຍາຍການຮ່ວມມືໃຫ້ເລິກເຊິ່ງ ແລະເປັນຮູບປະທຳຫລາຍຂຶ້ນ, ເພື່ອຍົກສູງການຮ່ວມມືຄຽງຄູ່ກັບການສົ່ງເສີມບົດບາດຂອງແມ່ຍິງ ໃນພາກພື້ນອາຊຽນ ແລະ ນອກພາກພື້ນ ເພື່ອຮັດແໜ້ນປະຊາຄົມອາຊຽນ, ກ້າວໄປເຖິງການບັນລຸເປົ້າໝາຍການພັດທະນາແບບຍືນຍົງ (SDGs) ແລະ ສົ່ງເສີມຄວາມກ້າວໜ້າຂອງແມ່ຍິງ, ທັງຈະເປັນໂອກາດອັນດີ ສຳລັບບັນດາຜູ້ນຳອາຊຽນ ແລະ ບັນດາລັດຖະມົນຕີ ຮັບຜິດຊອບວຽກງານແມ່ຍິງ ອາຊຽນ ໃນການຈັດຕັ້ງຜັນຂະຫຍາຍຄຳໝາຍໝັ້ນຂອງອາຊຽນເຂົ້າໃນວຽກງານສົ່ງເສີມຄວາມກ້າວໜ້າຂອງແມ່ຍິງໂດຍສະເພາະການສ້າງຄວາມເຂັ້ມແຂງໃຫ້ກັບແມ່ຍິງ ທີ່ເຮັດວຽກເສດຖະກິດການດູແລເບິ່ງແຍງໄປສູ່ລວງເລິກ ແລະ ເປັນຮູບປະທໍາ,ທັງເປັນການປະກອບສ່ວນສຳຄັນເຂົ້າໃນການສົ່ງເສີມການພັດທະນາ, ການແລກປ່ຽນບົດຮຽນທີ່ດີຮ່ວມກັນໃນການລິເລີ່ມພິຈາລະນາ, ແກ້ໄຂບັນດາຂໍ້ຈໍາກັດໃນຂົງເຂດວຽກງານການດູແລເບິ່ງແຍງທີ່ບໍ່ໄດ້ຮັບຄ່າຈ້າງໃນອາຊຽນ ໄປພ້ອມກັບການຈັດຕັ້ງປະຕິບັດບັນດາແຜນງານພາກພື້ນ ແລະ ແຜນດຳເນີນງານເພື່ອຜັນຂະຫຍາຍບັນດາຖະແຫລງການອາຊຽນ ທີ່ກ່ຽວຂ້ອງໃຫ້ບັນລຸຄຳໝາຍໝັ້ນຂອງອາຊຽນ ໃນການສົ່ງເສີມຄວາມສະເໝີພາບ ຍິງ-ຊາຍ ແລະການສ້າງຄວາມເຂັ້ມແຂງໃຫ້ແມ່ຍິງ ແລະເດັກຍິງທຸກຄົນໄດ້ຮັບການພັດທະນາ.

ທ່ານ ສອນໄຊ ສີພັນດອນ ຍັງໄດ້ສະແດງຄວາມເຊື່ອໝັ້ນວ່າ “ຖະແຫລງການອາຊຽນ ວ່າດ້ວຍການສົ່ງເສີມວຽກງານເສດຖະກິດການດູແລເບິ່ງແຍງ ແລະຄວາມເຂັ້ມແຂງ ເພື່ອກ້າວສູ່ປະຊາຄົມອາຊຽນທີ່ຍືນຍົງ ຫລັງປີ 2025” ທີ່ຈະຖືກຮັບຮອງເອົາ ໃນກອງປະຊຸມສຸດຍອດອາຊຽນ ຄັ້ງທີ 44 ແລະ 45 ໃນເດືອນຕຸລາ 2024 ທີ່ຈະມາເຖິງນີ້ ທີ່ນະຄອນຫລວງວຽງຈັນ ແລະ ຈະປະກອບສ່ວນອັນສຳຄັນໃນການແກ້ໄຂບາງຂໍ້ຈຳກັດ ກ່ຽວກັບວຽກງານການດູແລເບິ່ງແຍງທີ່ບໍ່ໄດ້ຮັບຄ່າຈ້າງເພື່ອສ້າງຄວາມເປັນເອກະພາບໃນການສືບຕໍ່ຜັນຂະຫຍາຍ ແລະຈັດຕັ້ງປະຕິບັດຖະແຫລງການຮ່ວມກັນໂດຍສະເພາະສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບ ຍິງ-ຊາຍ ແລະ ຄວາມເຂັ້ມແຂງໃຫ້ແມ່ຍິງ-ເດັກຍິງ ໃນພາກພື້ນອາຊຽນ ໃຫ້ປະກົດຜົນເປັນຈິງ.

ກອງປະຊຸມໃນຄັ້ງນີ້, ບັນດາການນຳອາຊຽນ ແລະບັນດາລັດຖະມົນຕີ ຮັບຜິດຊອບວຽກແມ່ຍິງອາຊຽນ ໄດ້ພ້ອມກັນປຶກສາຫາລືໃນຫລາຍຫົວຂໍ້ທີ່ສຳຄັນຕໍ່ແມ່ຍິງ ແລະ ເດັກຍິງ ໃນທົ່ວອາຊຽນ ເພື່ອກຳນົດບັນດາສິ່ງທ້າທາຍ, ແບ່ງປັນການປະຕິບັດທີ່ດີ ແລະ ຕົກລົງບັນດາບົດແນະນຳນະໂຍບາຍທີ່ກ່ຽວຂ້ອງແນໃສ່ສ້າງການສົນທະນາ ແລະ ຖະແຫລງການທີ່ຜ່ານມາ ເພື່ອຄົ້ນຄວ້າລະອຽດຕື່ມກ່ຽວກັບສິ່ງທ້າທາຍສະເພາະທີ່ມີຜົນກະທົບຕໍ່ແມ່ຍິງ ແລະ ເດັກຍິງ ໃນດ້ານເສດຖະກິດການດູແລ ໃນທົ່ວອາຊຽນ ເພື່ອສ້າງຖະແຫລງການ ໃນບົດສະຫລຸບຂອງແມ່ຍິງອາຊຽນ ຄັ້ງທີ 3. ພ້ອມນີ້, ກອງປະຊຸມ ຍັງໄດ້ຮັບຮູ້ບົດບາດສຳຄັນ, ທ່າແຮງ ແລະ ຄວາມເຂັ້ມແຂງຂອງຜູ້ນຳແມ່ຍິງ ແລະ ແມ່ຍິງທຸກຄົນໃນອາຊຽນ ໃນການວາງທິດທາງການຟື້ນຟູ ແລະ ການສ້າງອະນາຄົດຂອງພາກພື້ນອາຊຽນ ພາຍຫລັງມີການລະບາດຂອງພະຍາດ. ພ້ອມນີ້,ກອງປະຊຸມຍັງໄດ້ຢືນຢັນຄືນຄວາມມຸ່ງໝັ້ນຂອງອາຊຽນໃນການສະໜັບສະໜູນແມ່ຍິງ ແລະເດັກຍິງ ຢູ່ໃນເສດຖະກິດການເບິ່ງແຍງດູແລ ທີ່ໄດ້ຮັບຄ່າຈ້າງ ແລະ ບໍ່ໄດ້ຮັບຄ່າຈ້າງທີ່ເປັນວາລະສຳຄັນຂອງພາກພື້ນ ແລະໄດ້ຮັບຮູ້ສິ່ງທ້າທາຍສະເພາະ, ໂອກາດເພື່ອສະໜັບສະໜູນແມ່ຍິງ ແລະເດັກຍິງໃນສະພາບການສ້າງຄວາມເຂັ້ມແຂງ, ພ້ອມທັງໄດ້ຮັບຮອງຖະແຫລງການສະບັບສຸດທ້າຍທີ່ກໍານົດຂໍ້ສະເໜີແນະສະເພາະສໍາລັບການແກ້ໄຂສິ່ງທ້າທາຍທີ່ແມ່ຍິງ ແລະ ດັກຍິງຜະເຊີນໃນສະພາບການຂອງເສດຖະກິດການເບິ່ງແຍງດູແລທີ່ໄດ້ຮັບຄ່າຈ້າງ, ບໍ່ໄດ້ຮັບຄ່າຈ້າງ ແລະການກໍ່ສ້າງຄວາມເຂັ້ມແຂງ.

ກອງປະຊຸມສຸດຍອດການນໍາແມ່ຍິງອາຊຽນຄັ້ງທີ 3 ຈະໄດ້ຮັບການພິຈາລະນາຈາກຜູ້ນຳອາຊຽນ ໃນກອງປະຊຸມສຸດຍອດອາຊຽນຄັ້ງທີ 44, 45 ແລະ ກອງປະຊຸມສຸດຍອດທີ່ກ່ຽວຂ້ອງທີ່ຈະຈັດຂຶ້ນໃນເດືອນຕຸລາ 2024 ທີ່ຈະມາເຖິງນີ້, ທີ່ນະຄອນຫລວງວຽງຈັນ ສປປ ລາວ.


แชร์