ເຈົ້າແຂວງພ້ອມຄະນະ ອວຍພອນກົງສຸນ ສສ ຫວຽດນາມ ເນື່ອງໃນໂອກາດວັນຊາດ ສສ ຫວຽດນາມ ຄົບຮອບ 79 ປີ

ໃນວັນທີ 22 ສິງຫາ 2024 ຜ່ານມານີ້, ທີ່ຫ້ອງປະຊຸມກົງສຸນໃຫຍ່ ສສ ຫວຽດນາມ ປະຈໍາແຂວງສະຫວັນນະເຂດ; ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ພ້ອມຄະນະນຳຂອງແຂວງໄດ້ເຂົ້າອວຍພອນທ່ານ ນາງ ດັ້ງ ຖິ ຫາຍ ເຕິມ ກົງສຸນໃຫຍ່ ສສ ຫວຽດນາມ ປະຈຳແຂວງສະຫວັນນະເຂດ, ພ້ອມຄະນະເນື່ອງໃນໂອກາດສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 79 ປີ (2 ກັນຍາ 1945-2 ກັນຍາ 2024) ຄົບຮອບ 79 ປີ.

ໃນໂອກາດນີ້, ທ່ານ ກົງສຸນໃຫຍ່ ສສ ຫວຽດນາມ ປະຈຳແຂວງສະຫວັນນະເຂດກໍ່ໄດ້ທົບທວນຄືນປະຫວັດຄວາມເປັນມາໃນການຕໍ່ສູ້ປົດປ່ອຍປະເທດຊາດຫວຽດນາມທີ່ຜ່ານເສັ້ນທາງອັນລະອິດລະອ້ຽວ ແລະ ຕໍ່ສູ້ເປັນໄລຍະເວລາທີ່ຍາວນານຈົນສາມາດນຳເອົາອິດສະຫຼະພາບ ແລະ ສິດເປັນເຈົ້າຂອງປະເທດຊາດມາໃຫ້ປະຊາຊົນຫວຽດນາມໃນວັນທີ 2 ກັນຍາ 1945.

ໃນໂອກາດສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 79 ປີ ໃນປີນີ້, ທ່ານເຈົ້າແຂວງສະຫວັນນະເຂດ ພ້ອມຄະນະນຳຂອງແຂວງໄດ້ນຳເອົາກະຕ່າດອກໄມ້ເຂົ້າອວຍພອນທ່ານກົງສຸນ,ພ້ອມນັ້ນທ່ານເຈົ້າແຂວງຍັງໄດ້ມອບແຄນ, ເຊິ່ງເປັນເຄື່ອງດົນຕີທີ່ສັນຍາລັກຂອງ ສປປ ລາວ ໃຫ້ທ່ານກົງສຸນໃຫຍ່ ສສ ຫວຽດນາມປະຈຳແຂວງສະຫວັນນະເຂດອີກດ້ວຍ.

ໃນໂອກາດນີ້, ທ່ານເຈົ້າແຂວງກໍ່ໄດ້ທົບທວນຄືນສາຍພົວພັນມິດຕະພາບ ແລະການຮ່ວມມືແບບພິເສດລະຫວ່າງລາວ-ຫວຽດນາມ ທີ່ມີມາເປັນໄລຍະເວລາອັນຍາວນານ, ຮ່ວມກັນສູ້ຮົບໃນໄລຍະຕໍ່ສູ້ກູ້ຊາດຈົນໄດ້ຮັບໄຊ ຊະນະເປັນຂັ້ນໆມາ ແລະພາຍຫຼັງປະເທດຊາດໄດ້ຮັບການປົດປ່ອຍ ສສ ຫວຽດນາມ ໄດ້ໃຫ້ການການຊ່ວຍເຫຼືອດ້ານຕ່າງໆຕໍ່ ສປປ ລາວ ແລະ ຮ່ວມມືກັນໃນດ້ານຕ່າງໆ.

ພ້ອມນັ້ນ, ທ່ານເຈົ້າແຂວງສິະຫວັນນະເຂດໄດ້ແຈ້ງໃຫ້ຮູ້ກ່ຽວກັບການພັດທະນາເສດຖະກິດ-ສັງຄົມຂອງແຂວງສະຫວັນນະເຂດໃຫ້ທ່ານກົງສຸນຊາບໂດຍສັງເຂບ. ໃນນີ້, ລວມມີຄວາມຄືບໃນການຮ່ວມມືທາງດ້ານເສດຖະກິດ ແລະການລົງທຶນຂອງ ສສ ຫວຽດນາມເຂົ້າໃນໂຄງການຕ່າງໆຢູ່ແຂວງສະຫວັນນະເຂດ, ການຮ່ວມມືດ້ານການສຶກສາ, ການຮ່ວມມືດ້ານການຄ້າຊາຍແດນ ແລະ ການຮ່ວມມືດ້ານອື່ນໆລະຫວ່າງສອງປະເທດລາວ-ຫວຽດນາມກໍ່ຄືລະຫວ່າງ ແຂວງສະຫວັນນະເຂດກັບແຂວງອື່ນໆຂອງ ສສ ຫວຽດນາມ. ຈາກນັ້ນ, ກໍ່ມີຄະນະພັກ-ຄະນະພະແນກການ ແລະອົງການຈັດຕັ້ງມະຫາຊົນຂອງແຂວງເຂົ້າອວຍພອນທ່ານກົງສຸນ ສສ ຫວຽດນາມ ປະຈຳແຂວງສະຫວັນນະເຂດໃນຄັ້ງນີ້ນໍາອີກດ້ວຍ.

แชร์