ທ່ານ ລັດຖະມົນຕີ ກະຊວງກະສິກໍາ ແລະປ່າໄມ້ ລົງຕິດຕາມຄວາມຄືບໜ້າໃນການກໍ່ສ້າງ ໂຮງຂ້າສັດທັນສະໄໝ

ໃນຕອນເຊົ້າວັນທີ 21 ສິງຫາ 2024 ທ່ານ ລິນຄໍາ ດວງສະຫວັນ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ລົງຕິດຕາມຄວາມຄືບໜ້າໃນການກໍ່ສ້າງໂຮງຂ້າສັດທັນສະໄໝ ຂອງບໍລິສັດ ຄຸນເຊິງສາກົນ ຈໍາກັດ ທີ່ຕັ້ງຢູ່ບ້ານ ສິມມະໂນ, ເມືອງຫາດຊາຍຟອງ, ນະຄອນຫຼວງວຽງຈັນ. ໂດຍການຕ້ອນຮັບຂອງທ່ານ ຄໍາແສງ ສຸດທະລີ ປະທານບໍລິສັດ ຄໍາແສງພັດທະນາກະສິກໍາຄົບວົງຈອນ ຈໍາກັດຜູ້ດຽວ. ພ້ອມນີ້ມີຫົວໜ້າ-ຮອງຫົວໜ້າກົມ, ຫົວໜ້າພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ, ຮອງເຈົ້າເມືອງໆຫາດຊາຍຟອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ຈຸດປະສົງໃນການລົງຕິດຕາມຄັ້ງນີ້ແມ່ນເພື່ອຊຸກຍູ້ວຽກງານການຄໍ້າປະກັນສະບຽງອາຫານ ແລະ ວຽກງານການຜະລິດເປັນສິນຄ້າ ໂດຍສະເພາະແມ່ນວຽກງານຂອງ ບໍລິສັດ ຄຸນເຊິງສາກົນ ຈໍາກັດ ທີ່ກໍາລັງມີການກໍ່ສ້າງໂຮງຂ້າສັດທັນສະໄໝ ຊື່ງຈະກາຍເປັນໂຄງການໃຫຍ່ຊັ້ນນໍາລະດັບສາກົນ ໜຶ່ງດຽວໃນ ສປປ ລາວ ແລະ ໃນເຂດອາຊີຕາມເວັນອອກຊຽງໃຕ້. ໃນເວລາຕໍ່ມາ ຄະນະດັ່ງກ່າວ ໄດ້ສືບຕໍ່ຈັດກອງປະຊຸມປຶກສາຫາລື ເພື່ອກະກຽມຄວາມພ້ອມໃຫ້ແກ່ການຈັດຕັ້ງປະຕິບັດວຽກງານຂອງບໍລິສັດດັ່ງກ່າວ ຢູ່ທີ່ ຫ້ອງປະຊຸມຫ້ອງການກະຊວງກະສິກໍາ ແລະປ່າໄມ້ ໂດຍການເປັນປະທານຂອງທ່ານ ລິນຄໍາ ດວງສະຫວັນ ລັດຖະມົນຕີ ກະຊວງກະສິກໍາ ແລະປ່າໄມ້. ໂອກາດນີ້ ຕ່າງໜ້າ ບໍລິສັດ ໄດ້ລາຍງານກ່ຽວກັບສະພາບລວມຂອງໂຄງການ ໂຮງຂ້າສັດທັນສະໄໝ  ໂດຍສະເພາະແມ່ນຄວາມຄືບໜ້າຂອງໂຄງການ ຊື່ງຄາດຄະເໜຈະເລັດການກໍ່ສ້າງ ໃນທ້າຍປີ 2024 ແລະ ກຽມເປີດນໍາໃຊ້ໃນຕົ້ນປີ 2025 ໂດຍໂຮງງານມີຂະໜາດ 68m x 258m, ມີກໍາລັງແຮງການຜະລິດ 1 ພັນໂຕ/ວັນ (ເຮັດວຽກ 2 ກະ 16 ຊົ່ວໂມງ) ມູນຄາການລົງທຶນທັງໝົດ ແມ່ນ 500 ລ້ານໂດລາສະຫາລັດ. ໂອກາດນີ້, ທ່ານ ລັດຖະມົນຕີ ກະຊວງກະສິກໍາ ແລະປ່າໄມ້ ໄດ້ໃຫ້ກຽດໂອ້ລົມຊີ້ນໍາຕໍ່ກອງປະຊຸມສະເໜີໃຫ້ກົມວິຊາການກ່ຽວຂ້ອງເອົາໃຈໃສ່ ອໍານວຍຄວາມສະດວກ ແລະ ຕ້ອງມີການປະສານງານທີ່ລະອຽດ ໂດຍສະເພາະແມ່ນກົມລ້ຽງສັດ ແລະ ການປະມົງ, ກົມປູກຝັງ ແລະ ກົມສົ່ງເສີມກະສິກໍາ ແລະ ສະຫະກອນ ລວມທັງພາກສ່ວນທີ່ກ່ຽວຂ້ອງ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າຂອງບໍລິສັດ ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.

ໂດຍ: ສອຍເພັດ ສຸລິພອນ

แชร์