ບໍລິສັດ ວັງຕັດ ສະໜັບສະໜູນການເປັນປະທານອາຊຽນ ຂອງ ສປປ ລາວ ໃນປີ 2024

ໃນວັນທີ 14 ສິງຫານີ້, ທີ່ກະຊວງການຕ່າງປະເທດ ໄດ້ມີພິທີມອບ-ຮັບການສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2024 ຈໍານວນ 20 ຕື້ກີບ ຈາກ ບໍລິສັດ ວັງຕັດ ມາຍນິງກຣຸບ. ຕາງໜ້າໃຫ້ລັດຖະບານ ແຫ່ງ ສປປ ລາວ ແມ່ນ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ຮອງປະທານ, ຜູ້ປະຈໍາການຄະນະຊີ້ນໍາລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນ ຂອງ ສປປ ລາວ ໃນປີ 2024 ເປັນຜູ້ຮັບ ແລະ ທ່ານ ນາງ ສີລີວັນ ປັດທຳມະວົງ, ຮອງຜູ້ອໍານວຍການບໍລິສັດວັງຕັດ ມາຍນິງກຣຸບ ຕາງໜ້າໃຫ້ບໍລິສັດ ເປັນຜູ້ມອບການສະໜັບສະໜູນດັ່ງກ່າວ.
ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຂອບໃຈບໍລິສັດຕໍ່ການສະໜັບສະໜູນດັ່ງກ່າວໂດຍຈະນໍາໃຊ້ເຂົ້າໃນວຽກງານການດໍາເນີນການເປັນປະທານອາຊຽນ ຂອງ ສປປ ລາວ ໃນປີ 2024, ລວມທັງການກະກຽມ ແລະ ດໍາເນີນກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ພາຍໃຕ້ຄໍາຂວັນ “ເພີ່ມທະວີກນເຊື່ອມຈອດ ແລະ ຄວາມເຂັ້ນແຂງອາຊຽນ” ທີ່ຈະຈັດຂຶ້ນໃນວັນທີ 8-11 ຕຸລາ 2024 ທີ່ນະຄອນຫຼວງວຽງຈັນ, ຊຶ່ງຈະມີປະມຸກລັດ ຫຼື ຫົວໜ້າລັດຖະບານ ຂອງບັນດາປະເທດສະມາຊິກອາຊຽນ, ຄູ່ເຈລະຈາອາຊຽນ ແລະ ຄູ່ຮ່ວມມືອື່ນໆຂອງອາຊຽນ ເຂົ້າຮ່ວມ.
ຂ່າວ: ກະຊວງການຕ່າງປະເທດ

แชร์