ກຸ່ມບໍລິສັດ RMA Lao ຂະຫຍາຍສາຂາໃໝ່ ຢູ່ແຂວງຄຳມ່ວນ

ກຸ່ມບໍລິສັດ RMA Lao ຂະຫຍາຍສາຂາບໍລິການໃໝ່ເພື່ອຈຳໜ່າຍລົດໃຫຍ່ໃນເຄືອເມື່ອບໍ່ດົນມານີ້ທີ່ເມືອງທ່າແຂກ ແຂວງຄຳມ່ວນ ໂດຍມີທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງໆຄຳມ່ວນ, ທ່ານ ບີຈູ່ ນາລາຍະນານ ຜູ້ຈັດການທົ່ວໄປທັງເປັນຫົວໜ້າບໍລິຫານກຸ່ມບໍລິສັດລົດໃຫຍ່ ພ້ອມດ້ວຍແຂກຖືກເຊີນເຂົ້າຮ່ວມ.

ກຸ່ມບໍລິສັດດັ່ງກ່າວ ເປັນໜຶ່ງກຸ່ມບໍລິສັດທີ່ຈັດຈຳໜ່າຍລົດໃຫຍ່ທີ່ໃຫຍ່ທີ່ສຸດໃນລາວໂດຍເລີ່ມໃຫ້ບໍລິການຢູ່ໃນປະເທດແຕ່ປີ 1994 ເປັນຕົ້ນມາ ຊຶ່ງບໍລິການທາງດ້ານລົດໃຫຍ່, ອາຫານ, ລົດເຊົ່າ, ສິນເຊື່ອ ແລະຮັບເໝົາກໍ່ສ້າງ. ຜະລິດຕະພັນລົດໃຫຍ່ໃນເຄືອ ມີທັງລົດທີ່ມີມູນຄ່າສູງ, ລົດໃຊ້ໃນຄອບຄົວ, ລົດໃຊ້ໃນທຸລະກິດ ແລະ ໃຊ້ໃນອຸດສາຫະກຳ ເຊັ່ນ: ຜະລິດຕະພັນລົດຍີ່ຫໍ້ຟອດ, ແລນໂລເວີ, ມາຮີນດຣາ, ຄາຍຍີ, ຈອນເດຍ, JCB ແລະ TCM. ນອກນນີ້, ຍັງມີສູນບໍລິການສ້ອມແປງທົ່ວໄປ ສຳລັບລົດທຸກຮຸ່ນທຸກຍີ່ຫໍ້ຈາກ Quick Lane ທີ່ມີອຸປະກອນເຄື່ອງມືທີ່ທັນສະໄໝ ໄວ້ບໍລິການໃຫ້ທຸກທ່ານ. ກຸ່ມຜະລິດຕະພັນເຫລົ່ານີ້ຈະສາມາດຕອບໂຈດກັບທຸກຄວາມຕ້ອງການຂອງບັນດາລູກຄ້າຢູ່ແຂວງຄຳມ່ວນ ໄດ້ເປັນຢ່າງດີ.

ທ່ານ ບີຈູ່ ນາລາຍະນານ ໄດ້ຍົກໃຫ້ເຫັນເຖິງຄວາມພ້ອມໃນການໃຫ້ບໍລິການ ແລະຄວາມສະດວກສະບາຍແກ່ລູກຄ້າໃນຄັ້ງນີ້. ນອກຈາກສາຂາແຂວງຄຳມ່ວນແລ້ວ ພວກເຮົາຍັງມີແຜນທີ່ຈະສືບຕໍ່ຂະຫຍາຍສາຂາໄປທາງພາກເໜືອຕື່ມອີກເພື່ອໃຫ້ລູກຄ້າສາມາດເຂົ້າເຖິງກຸ່ມຜະລິດຕະພັນຂອງພວກເຮົາໄດ້ຢ່າງທົ່ວເຖິງທຸກທີ່ທົ່ວປະເທດ. ພ້ອມກັນນີ້, ຍັງເປັນການປະກອບສ່ວນທີ່ສຳຄັນໃນການສ້າງຄວາມເຂັ້ມແຂງໃຫ້ບັນດາຫົວໜ່ວຍທຸລະກິດກໍຄືເສດຖະກິດຂອງແຂວງມີການຂະຫຍາຍຕົວຕື່ມອີກ.

ຂ່າວ-ພາບ: ກອງຄໍາ

แชร์