4 ພາກສ່ວນ ສະຫລຸບຕີລາຄາ ການດຳເນີນຄະດີຕາມຂະບວນຍຸຕິທຳ

ກອງປະຊຸມ 4 ພາກສ່ວນ ກ່ຽວກັບການດຳເນີນຄະດີຕາມຂະບວນຍຸຕິທຳ ຄັ້ງທີ VII ໄດ້ໄຂຂຶ້ນ ຢ່າງເປັນທາງການ ໃນວັນທີ 21 ສິງຫາ 2024 ນີ້ ຢູ່ ອົງການໄອຍະການປະຊາຊົນສູງສຸດໂດຍການເປັນປະທານຮ່ວມຂອງ ທ່ານ ພົອ. ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ທ່ານນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ, ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ແລະທ່ານ ໄພວີ ສີບົວລິພາ ກໍາມະການສູນກາງພັກ ລັດຖະມົນຕີກະຊວງຍຸຕິທໍາ, ໃຫ້ກຽດເຂົ້າຮ່ວມຂອງທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ມີຜູ້ຕາງໜ້າຈາກບັນດາກະຊວງ, ອົງການທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, 4 ພາກສ່ວນ ໄດ້ພ້ອມກັນສະຫລຸບຕີລາຄາ ແລະ ປະກອບຄຳເຫັນ ຕໍ່ການຈັດຕັ້ງປະຕິບັດບົດບັນທຶກກອງປະຊຸມ 4 ພາກສ່ວນ ກ່ຽວກັບການດໍາເນີນຄະດີຕາມຂະບວນຍຸຕິທໍາ ຄັ້ງທີ VI ນັບແຕ່ເດືອນ ກໍລະກົດ 2021 ເປັນຕົ້ນມາ, ເຊິ່ງເຫັນໄດ້ວ່າ ເຖິງຈະມີຂໍ້ຫຍຸ້ງຍາກ, ສິ່ງທ້າທາຍ, ທົດສອບຫລາຍດ້ານ, ແຕ່ທັງ 4 ພາກສ່ວນ ກໍສາມາດຍາດມາໄດ້ຜົນສໍາເລັດຫລາຍດ້ານ ເປັນຕົ້ນ, ໄດ້ສຸມໃສ່ປັບປຸງກົງຈັກການຈັດຕັ້ງ, ສັບຊ້ອນພະນັກງານ ໃຫ້ແທດເໝາະກັບຕົວຈິງ, ສຶກສາອົບຮົມແນວຄິດ-ການເມືອງ, ຍົກລະດັບຄວາມຮູ້ຄວາມສາມາດທາງດ້ານວິຊາສະເພາະໃຫ້ແກ່ສະມາຊິກພັກ, ພະນັກງານ-ລັດຖະກອນ, ຍົກສູງສະຕິເຄົາລົບ ແລະ ປະຕິບັດກົດໝາຍ ຕາມຂອບເຂດສິດ ແລະ ໜ້າທີ່ຂອງຕົນ ເປັນຢ່າງດີ; ໄດ້ສຸມໃສ່ເຮັດວຽກໂຄສະນາເຜີຍແຜ່ກົດໝາຍ ແລະ ນິຕິກໍາທີ່ກ່ຽວຂ້ອງນັບແຕ່ຂັ້ນສູນກາງ ຮອດຂັ້ນທ້ອງຖິ່ນ, ໄດ້ເອົາໃຈໃສ່ ປັບປຸງກົນໄກປະສານສົມທົບ ເຊິ່ງກັນ ແລະ ກັນ, ໄດ້ຮ່ວມກັບພາກສ່ວນອື່ນທີ່ກ່ຽວຂ້ອງ, ພ້ອມກັນປຶກສາຫາລື, ແລກປ່ຽນບົດຮຽນ ເພື່ອແກ້ໄຂຄະດີ ທີ່ມີຄວາມຫຍຸ້ງຍາກສັບສົນ ໃຫ້ມີຄວາມຖືກຕ້ອງ ແລະ ສອດຄ່ອງກັບກົດໝາຍ, ສ້າງຄວາມເຊື່ອໝັ້ນ ແລະ ໄວ້ວາງໃຈຈາກພັກ-ລັດ, ປະຊາຊົນລາວບັນດາເຜົ່າ ຕໍ່ການດໍາເນີນຄະດີຕາມຂະບວນຍຸຕິທໍາ ກໍຄື ລະບົບຍຸຕິທໍາ ຂອງ ສປປ ລາວ ຫລາຍຂຶ້ນ.
ກອງປະຊຸມ ຍັງໄດ້ຕົກລົງເປັນເອກະພາບໃນບັນຫາກົດໝາຍ ແລະ ການດຳເນີນຄະດີທັງໝົດທີ່ເປັນບັນຫາສະເພະ ຂອງແຕ່ລະພາກສ່ວນ ແລະ ບັນຫາລວມຂອງ 4 ພາກສ່ວນ ທີ່ຕ້ອງໄດ້ພ້ອມກັນປະຕິບັດໃນຕໍ່ໜ້າ ໂດຍກຳນົດເປັນບົດບັນທຶກຮ່ວມ 4 ພາກສ່ວນ ກ່ຽວກັບການດໍາເນີນຄະດີຕາມຂະບວນຍຸຕິທໍາຄັ້ງທີ VII ແລະ ໄດ້ລົງນາມຮ່ວມກັນ ເພື່ອເປັນບ່ອນອີງໃນການປະສານງານ, ການແກ້ໄຂຄະດີໃຫ້ຖືກຕ້ອງ ແລະ ປະຕິບັດເປັນເອກະພາບ ນັບແຕ່ສູນກາງລົງຮອດທ້ອງຖິ່ນ.
ໂອກາດດັ່ງກ່າວ, ທ່ານ ບຸນທອງ ຈິດມະນີ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ-ຄະນະນໍາ ຂອງອົງການໄອຍະການປະຊາຊົນສູງສຸດ, ກະຊວງປ້ອງກັນຄວາມສະຫງົບ, ສານປະຊາຊົນສູງສຸດ ແລະ ກະຊວງຍຸດຕິທໍາ ທີ່ໄດ້ເອົາໃຈໃສ່ຊີ້ນໍາ-ນໍາພາ ການດໍາເນີນຄະດີຕາມຂະບວນຍຸຕິທໍາ ນັບແຕ່ຂັ້ນຕອນການສືບສວນ-ສອບສວນ, ການຕິດຕາມກວດກາ ແລະ ສັ່ງຟ້ອງຂຶ້ນສານ, ການພິຈາລະນາຕັດສິນຂອງສານ ແລະ ການປະຕິບັດຄໍາຕັດສິນຂອງສານ ໃຫ້ມີຄວາມຖືກຕ້ອງ, ວ່ອງໄວ, ໂປ່ງໃສ, ຍຸຕິທໍາ ແລະ ມີຄຸນນະພາບ, ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ. ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ຄະນະພັກ-ຄະນະນໍາ 4 ພາກສ່ວນ ເອົາໃຈໃສ່ບາງບາງບັນຫາສຳຄັນ ເປັນຕົ້ນ, ໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ ທີ່ຢູ່ໃນຄວາມຮັບຜິດຊອບຂອງຕົນ (ເຈົ້າໜ້າທີ່ຕໍາຫລວດ, ໄອຍະການປະຊາຊົນ, ຜູ້ພິພາກສາ ແລະ ພະນັກງານປະຕິບັດຄໍາຕັດສິນຂອງສານ) ໃຫ້ມີນໍ້າໃຈຮັກຊາດ, ຮັກປະຊາຊົນ ແລະ ຮັກຄວາມຍຸຕິທໍາ ຢ່າງແທ້ຈິງ, ຮັກສາຈັນຍາບັນ, ຈັນຍາທໍາ, ຄວາມບໍລິສຸດສັດຊື່ ຕໍ່ພັກ, ຕໍ່ລັດ, ຕໍ່ປະຊາຊົນ ແລະ ຕໍ່ປະເທດຊາດ; ປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງ ແລະ ແໜ້ນ ເພື່ອສາມາດປະຕິບັດພາລະບົດບາດ, ສິດ ແລະ ໜ້າທີ່ ຂອງແຕ່ລະພາກສ່ວນໃນການດໍາເນີນຄະດີຕາມຂະບວນຍຸຕິທໍາ. ພ້ອມກັນນັ້ນ, ກໍຕ້ອງໄດ້ເອົາໃຈໃສ່ ກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ ໂດຍຕິດພັນກັບການປະຕິກົດລະບຽບຂອງພັກໃຫ້ຖືກຕ້ອງ ແລະ ເຂັ້ມງວດ; ສຸມໃສ່ສ້າງພະນັກງານດໍາເນີນຄະດີໃຫ້ມີຄວາມຮູ້ ຄວາມສາມາດ, ມີຄວາມຊ່ຽວຊານ ແລະ ເປັນມືອາຊີບໃນສະເພາະດ້ານ; ເອົາໃຈໃສ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິວ່າດ້ວຍການຍົກສູງປະສິດທິພາບໃນການຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍ, ມະຕິິວ່າດ້ວຍການຍົກສູງປະສິດທິພາບໃນການດໍາເນີນຄະດີຕາມຂະບວນຍຸຕິທໍາ ໃຫ້ເປັນນິຕິກໍາ ແລະ ລະບຽບການທີ່ລະອຽດ, ຈະແຈ້ງ ແລະ ຊັດເຈນ ເພື່ອຮັບປະກັນການຈັດຕັ້ງປະຕິບັດໃຫ້ມີຄວາມເປັນເອກະພາບ, ຖືກຕ້ອງ ແລະ ທັນກັບສະພາບການ; ເອົາໃຈໃສ່ປັບປຸງແບບແຜນ, ກົນໄກປະສານງານໃນການດໍາເນີນຄະດີຢູ່ແຕ່ລະຂັ້ນຕອນໃຫ້ມີຄວາມວ່ອງໄວ, ໂປ່ງໃສ ແລະ ຖືກຕ້ອງຕາມກົດໝາຍ ໃຫ້ສາມາດກວດສອບໄດ້ທຸກຂັ້ນຕອນການດໍາເນີນຄະດີ, ປະຕິບັດຕາມກົດໝາຍກໍານົດ ຢ່າງເຄັ່ງຄັດ;ໂຄສະນາເຜີຍແຜ່ກົດໝາຍໃຫ້ກວ້າງຂວາງ ແລະ ທົ່ວເຖິງ ໃນສັງຄົມ ເພື່ອໃຫ້ປະຊາຊົນຮັບຮູ້-ເຂົ້າໃຈຕໍ່ກົດໝາຍ, ຍົກສູງສະຕິກົດໝາຍຢູ່ໃນສັງຄົມໃຫ້ສູງຂຶ້ນ; ເພີ່ມທະວີຄວາມຮັບຜິດຊອບໃນການປະຕິບັດໜ້າທີ່ວິຊາສະເພາະຂອງແຕ່ລະພາກສ່ວນໃຫ້ເຂັ້ມງວດຕາມກົດໝາຍ ເຮັດໃຫ້ການດໍາເນີນຄະດີມີຄວາມໂປ່ງໃສ, ວ່ອງໄວ ແລະ ມີຄຸນນະພາບ ເພື່ອປົກປ້ອງສິດຜົນ ປະໂຫຍດອັນຊອບທໍາຂອງລັດ, ຂອງພົນລະເມືອງ; ຮັບປະກັນສິດເສລີພາບ ແລະ ຊິວິດຂອງພົນລະເມືອງຢູ່ໃນທຸກຂັ້ນຕອນຂອງການດຳເນີນຄະດີຕາມຂະບວນຍຸຕິທໍາ.
ຂ່າວ-ພາບ: ອອປສ

แชร์