ທ່ານ ໂພໄຊ ສີພອນແກ້ວປະເສີດ ໃຫ້ຮູ້ວ່າ: ໃນຄອບຄົວມີສະມາຊິກທັງໝົດ 7 ຄົນ, ໃນນັ້ນ ມີແຮງງານຫຼັກ 4 ຄົນ, ໄດ້ເລີ່ມປະກອບອາຊີບປູກຝັງ-ລ້ຽງສັດແບບປະສົມປະສານ ມາແຕ່ປີ 2007, ໂດຍເລີ່ມຈາກການປູກເຂົ້າທັງ ນາປີ-ນາແຊງ ໃນເນື້ອທີ່ 5-6 ເຮັກຕາ, ສະມັດຕະພາບ 4 ໂຕນ/ເຮັກຕາ, ເຮັດສວນໝາກແຕງ, ໝາກໂມ, ຖົ່ວ, ລ້ຽງງົວຂຸນ ທຳອິດ ມີງົວ 8 ໂຕ ໃນນັ້ນແມ່ພັນ 4 ໂຕ ລ້ຽງແບບຂາຍໄປນຳ ແລະ ຂະຫຍາຍແມ່ພັນໄປພ້ອມ (ນຳໃຊ້ລູກງົວຂອງເຮົາເອງມາຂຸນຂາຍ), ຮອດປັດຈຸບັນ ມີງົວທັງໝົດ 30 ໂຕ, ໃນນັ້ນມີແມ່ພັນ 20 ໂຕ. ຕໍ່ມາໄດ້ເຫັນຊ່ອງທາງການສ້າງລາຍຮັບໃໝ່ຄືການລ້ຽງໝູຂຸນ ຈຶ່ງໄດ້ສຶກສາຂໍ້ມູນຈາກສື່ອອນລາຍ ແລະ ຈາກຜູ້ທີ່ເຮັດມາກ່ອນ ທຳອິດໄດ້ເລີ່ມລ້ຽງ 1 ຄອກ (ໝູນ້ອຍ 10 ກວ່າໂຕ) ເກືອຫົວອາຫານສົດ, ໃຊ້ເວລາລ້ຽງ 4 ເດືອນກວ່າກໍອອກຈຳໜ່າຍໄດ້ເຫັນວ່າພໍມີກຳໄລ ກໍເລີຍລ້ຽງໝູແມ່ພັນເພື່ອຂະຫຍາຍລູກແລ້ວເອົາໄວ້ຂຸນເອງ ຈຳນວນ 2 ໂຕ ແລ້ວຂະຫຍາຍເພີ່ມອີກ, ປັດຈຸບັນ ມີໝູແມ່ພັນ 6 ໂຕ ພ້ອມທັງຂະຫຍາຍຄອກໝູຂຸນຈາກ 1 ຄອກ ມາເປັນ 4 ຄອກ. ສຳລັບຕະຫຼາດ ແມ່ນຈຳໜ່າຍຢູ່ພາຍເມືອງໂພນໂຮງ ແລະ ຕ່າງແຂວງຈຳນວນໜຶ່ງ. ນອກຈາກປູກຝັງ-ລ້ຽງສັດແລ້ວ ຍັງໄດ້ຮັບບໍລິການລົດໄຖນາໄຖສວນ ຮັບບໍລິການກ່ຽວເຂົ້າດ້ວຍກົນຈັກຕາມລະດູການ. ສະເລ່ຍລາຍຮັບຈາກການຂາຍເຂົ້າ, ຂາຍ ເຄື່ອງສວນ, ໝູຂຸນ, ງົວຂຸນ ແລະ ບໍລິການລົດໄຖນາໄຖສວນ ຮັບບໍລິການກ່ຽວເຂົ້າດ້ວຍກົນຈັກ ໄດ້ປະມານ 700-800 ລ້ານກີບຕໍ່ປີ. ຍ້ອນຄວາມດຸໝັ່ນຂະຫຍັນພຽນ ແລະ ເຮັດແທ້ທຳຈິງ ໃນການປະກອບອາຊີບກະສິກຳຂອງ ທ່ານ ໂພໄຊ ສີພອນແກ້ວປະເສີດ ທີ່ມີຄວາມໂດດເດັ່ນກວ່າຄົນອື່ນ ຂັ້ນເທິງຈິ່ງໄດ້ຍົກໃຫ້ເປັນຄອບຄົວຕົວແບບ ໃນປີ 2017 ຈົນເຖິງປັດຈຸບັນ.

ສຳລັບແຜນການໃນອະນາຄົດ ທ່ານ ໂພໄຊ ບອກວ່າ: ມີແຜນຢາກຈະຂະຫຍາຍການລ້ຽງໝູຂຸນ ງົວຂຸນ ແລະ ຊື້ລົດກ່ຽວເຂົ້າອີກ 1 ຄັນເພື່ອພຽງພໍກັບຄວາມຕ້ອງການຂອງລູກຄ້າໃນອະນາຄົດ.

ທ່ານ ບຸນເພັງ ທິພົມມະຈັນ ຮອງນາຍບ້ານໂພນທັນ ບອກວ່າ: ຄອບຄົວຂອງທ່ານ ໂພໄຊ ສີພອນແກ້ວປະເສີດ ເປັນປະຊາຊົນພາຍໃນບ້ານໂພນທັນ ເປັນຄອບຄົວທີ່ມີຄວາມຫ້າວຫັນ ດຸໝັ່ນຂະຫຍັນພຽນ ເຮັດແທ້ທຳຈິງໃນການປະກອບອາຊີບກະສິກຳ ມີຄວາມສາມັກຄີກັບທຸກຄົນ ຊ່ວຍເຫຼືອຊຸກຍູ້ດ້ານຊັບ ແລະເຫື່ອແຮງເຂົ້າໃນວຽກງານຕ່າງໆຂອງບ້ານເປັນຢ່າງດີ ແລະ ມີຄວາມໂດດເດັ່ນ, ເປັນຕົວແບບທີ່ດີໃຫ້ແກ່ຄົນອື່ນໆ ໃນການເຮັດກະສິກຳ ປູກຝັງ-ລ້ຽງສັດ ແບບປະສົມປະສານ ຈົນໄດ້ຮັບໃບຢັ້ງຢືນຕົວແບບຈາກຂັ້ນເທິງ ຄັ້ງທຳອິດໃນປີ 2017 ແລະ ອີກຫຼາຍປີຕິດຕໍ່ກັນຈົນເຖິງປັດຈຸບັນ.

ພາບ+ຂ່າວ: ບຸນທະວີ ພົມມະສິດ