ເຈົ້າແຂວງສະຫວັນນະເຂດຊຸກຍູ້ການຜະລິດກະສິກຳເປັນສິນຄ້າ

ໃນວັນທີ 19 ສິງຫານີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດພ້ອມທ່ານ ປະສົງສິນ ຈະເລີນສຸກ ເຈົ້ານະຄອນໄກສອນພົມວິຫານແລະຄະນະນຳຈາກພະແນກກະສິກຳ-ປ່າໄມ້ແຂວງໄດ້ເຄື່ອນໄຫວຊຸກຍູ້ສູນພັດທະນາ ແລະ ບໍລິການກະສິກຳ-ປ່າໄມ້ໜອງເຕົ່າ ແລະ ກຸ່ມປູກຜັກບ້ານໂພນສິມ ນະຄອນໄກສອນພົມວິຫານ.

ໃນໂອກາດນີ້, ທ່ານເຈົ້າແຂວງໄດ້ມີຄຳເຫັນໃຫ້ທິດຊີ້ນຳພ້ອມທັງຈະໄດ້ຊອກຊ່ອງທາງໃນການຊຸກຍູ້ສົ່ງເສີມເປັນຕົ້ນດ້ານທຶນຮອນ, ເນື້ອທີ່ການຜະລິດ, ນໍ້າ ແລະອື່ນໆ ເພື່ອຍົກລະດັບການຜະລິດເປັນສິນຄ້າໃຫ້ຫຼາຍກວ່າເກົ່າ ແລະສາມາດສະໜອງພຽງພໍກັບຄວາມຕ້ອງການພາຍໃນແຂວງເວົ້າສະເພາະນະຄອນໄກສອນພົມວິຫານ ແລະ ເຮັດໃຫ້ຊີວິດການເປັນຢູ່ຂອງຊາວກະສິກອນດີຂຶ້ນເປັນກ້າວໆ ກັບຄວາມຕ້ອງການຂອງຕະຫຼາດ.

ກຸ່ມການປູກຜັກບ້ານໂພນສິມ ສ້າງຕັ້ງມາແຕ່ປີ 2012 ປັດຈຸບັນ ພາຍໃນກຸ່ມມີສະມາຊິກ 13 ຄອບຄົວ(ສະເພາະບ້ານໂພນສິມມີ 9 ຄອບຄົວ) ໂດຍໄດ້ປູກຜັກໃນຫຼາຍໆຊະນິດ ເພື່ອສະໜອງຕະຫຼາດພາຍໃນ ແລະ ສົ່ງບໍລິສັດ ຊຶ່ງສາມາດສ້າງລາຍຮັບແກ່ຄອບຄົວໄດ້ 5-8 ລ້ານກີບຕໍ່ເດືອນ ແລະປັດຈຸບັນທາງກຸ່ມກຳລັງຂະຫຍາຍສະມາຊິກເພີ່ມ ໂດຍໄດ້ແລ້ວຈຳນວນ 27 ຄອບຄົວ, ລວມເປັນທັງໝົດ 40 ຄອບຄົວ ແລະຍັງຈະສືບຕໍ່ຂະຫຍາຍຕື່ມອີກ, ກຸ່ມປູກຜັກມີເນື້ອທີ່ການຜະລິດຈຳນວນ 5,5 ເຮັກຕາ ແລະ ຍັງມີເນື້ອທີ່ລວມຂອງບ້ານທີ່ມີແຜນຈະຂະຫຍາຍເປັນສວນປູກຂອງກຸ່ມ.
ທີ່ມາ: ປະຊາຊົນ

แชร์