ປກສ ແຂວງຫຼວງນໍ້າທາ ສຶກສາອົບຮົມຜູ້ທີ່ຊື້ - ຂາຍ ໃບກະທ່ອມ ແລະຕຳນິວິຈານເຈົ້າໜ້າທີ່

ວັນທີ 12 ສິງຫາ 2024 ນີ້ກອງພັນປ້ອງກັນເຄື່ອນທີ່ ປກສ ແຂວງຫຼວງນໍ້າທາ ໄດ້ນຳເອົາຜູ້ກະທຳຜິດ ຊື້-ຂາຍໃບກະທ່ອມ 2 ຄົນ ແລະ ຕຳນິວິຈານ, ໃສ່ຮ້າຍການປະຕິບັດໜ້າທີ່ຂອງເຈົ້າໜ້າທີ່ຕຳຫຼວດ 1 ຄົນ ມາສຶກສາອົບຮົມຢູ່ກອງພັນປ້ອງກັນເຄື່ອນທີ່ ປກສ ແຂວງ. ໂດຍການເຂົ້າຮ່ວມຂອງ ທ່ານ ພັນໂທ ສິງຄຳ ອຸດົມພອນ ຫົວໜ້າກອງພັນປ້ອງກັນເຄື່ອນທີ່ ປກສ ແຂວງຫຼວງນໍ້າທາ, ມີຫົວໜ້າໝວດ - ຮອງຫົວໜ້າໝວດ, ພະນັກງານວິຊາສະເພາະ ແລະ ຜູ້ປົກຄອງເຂົ້າຮ່ວມ.

ທ່ານ ພັນໂທ ສິງຄຳ ອຸດົມພອນ ໄດ້ລາຍງານໃຫ້ຮູ້ວ່າ: ໃນວັນທີ 9 ສິງຫາ 2024 ໄດ້ຮັບແຫຼ່ງຂ່າວຈາກພົນລະເມືອງດີວ່າ ມີກຸ່ມໄວລຸ້ນ ຊື້-ຂາຍ, ມົ້ວສຸມນໍ້າກະທ່ອມຢູ່ຫ້ອງແຖວ ເຂດບ້ານທົ່ງໃຈ້ໃຕ້ ເມືອງ ແລະ ແຂວງຫຼວງນໍ້າທາ. ຈາກນັ້ນ, ຈີ່ງໄດ້ແຕ່ງຕັ້ງພະນັກງານວິຊາສະເພາະລົງພື້ນທີ່ຕົວຈິ່ງ ພົບເຫັນໄວລຸ້ນ 2 ຄົນ ທີ່ເຊົ່າຫ້ອງແຖວນັ້ນ ຈີ່ງໄດ້ຂໍອະນຸຍາດກວດກາ ພົບເຫັນຂອງກາງໃບກະທ່ອມພ້ອມກັບນໍ້າຢາ ຈຳນວນ 22 ຊຸດ ພ້ອມນັ້ນ ກໍ່ໄດ້ນຳເອົາພວກກ່ຽວມາສອບສວນ. ເຊິ່ງທັງ 2 ຄົນ ໄດ້ໃຫ້ການວ່າ: ໃບກະທ່ອມດັ່ງກ່າວແມ່ນຂອງພວກກ່ຽວແທ້, ໄດ້ສັ່ງຊື້ທາງອອນລາຍ ແລະ ໄດ້ຝາກມາທາງບໍລິສັດຂົນສົ່ງແຫ່ງໜຶ່ງ ເພື່ອນຳມາຂາຍໃຫ້ກຸ່ມໄວລຸ້ນ (ຂາຍໄປແລ້ວ 3 ຊຸດ).

ທ່ານ ພັນໂທ ສິງຄຳ ອຸດົມພອນ ໃຫ້ຮູ້ຕື່ມອີກວ່າ: ຕໍ່ກັບເຫດການດັ່ງກ່າວ, ແມ່ນການເຄື່ອນໄຫວທີ່ລະເມີດຕໍ່ຄຳສັ່ງ ຂອງອົງການໄອຍະການປະຊາຊົນສູງສຸດ ສະບັບເລກທີ່ 006 ວ່າດ້ວຍການດຳເນີນຄະດີ ຕໍ່ການຜະລິດປຸງແຕ່ງ, ຄ້າ-ຂາຍ, ຈໍາໜ່າຍ, ມີໄວ້ຄອບຄອງ ແລະ ເສບ, ພືດມີສານເສບຕິດ ເຊັ່ນ: ໃບກະທ່ອມ,ນໍ້າກະທ່ອມ ຫຼື ສານລະເຫີຍ ທີ່ມີສານເສບຕິດ. ສະນັ້ນ, ຈຶ່ງໄດ້ສຶກສາອົບຮົມກ່າວເຕື່ອນ ໄວລຸ້ນ ແລະຜູ້ທີ່ມົ້ວສຸມດື່ມນໍ້າໃບກະທ່ອມ, ໃຫ້ຢຸດເຊົາພຶດຕິກຳດັ່ງກ່າວເຊິ່ງເປັນການສ້າງຄວາມບໍ່ສະຫງົບຢູ່ໃນສັງຄົມ ຜິດລະບຽບກົດໜາຍ ແລະ ລະເມີດຕໍ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.

ສຳລັບຜູ້ທີ່ວິຈານ, ໃສ່ຮ້າຍການປະຕິບັດໜ້າທີ່ວຽກງານຂອງເຈົ້າໜ້າທີ່ຕຳຫຼວດແມ່ນໃຫ້ຢຸດເຊົາການສ້າງຄວາມປັ່ນປ່ວນໃຫ້ແກ່ສັງຄົມ ຮັບຮູ້ໃນທາງທີ່ຜິດ; ໃນນີ້ກໍ່ໄດ້ແນະນຳທາງຄອບຄົວກໍ່ຄືພໍ່ແມ່ ຫຼື ຜູ້ປົກຄອງໃຫ້ເປັນເຈົ້າການຕິດຕາມກວດກາສຶກສາອົບຮົມລູກ- ຫຼານ ບໍ່ໃຫ້ເຂົາເຈົ້າໄປພົວພັນກັບສິ່ງເສບຕິດທຸກປະເພດ.
ຂ່າວ: ປກສ ແຂວງຫຼວງນ້ຳທາ

แชร์