6 ເດືອນ ເສດຖະກິດເມືອງດາກຈຶງ ຂະຫຍາຍຕົວ 5,4%

ຕາມການລາຍງານຂອງ ສະຫາຍ ສົມພອນ ສາຍສຸວັນ ຄະນະປະຈຳພັກເມືອງ ຮອງເຈົ້າເມືອງດາກຈຶງ ຜູ້ຊີ້ນຳຂົງເຂດເສດຖະກິດໃນກອງປະຊຸມຄົບຄະນະບໍລິຫານງານພັກເມືອງ ເປີດກ້ວາງຄັ້ງທີ 11 ສະໄໝທີ XV ໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2024 ເມືອງດາກຈຶງສຸມໃສ່ພັດທະນາພື້ນຖານໂຄງລ່າງຮັບໃຊ້ການຜະລິດ, ການບໍລິການ, ຍູ້ແຮງ ແລະ ລະດົມການລົງທຶນຈາກຫຼາຍພາກສ່ວນພ້ອມຊຸກຍູ້ໂຄງການໃຫຍ່ຂອງລັດຖະບານ ຈັດຕັ້ງປະຕິບັດໂຄງການ ແລະສົ່ງເສີມການຜະລິດຂອງປະຊາຊົນກຸ້ມກິນ ແລະ ສະໜອງສະບຽງອາຫານໃຫ້ແກ່ຫົວໜ່ວຍທຸລະກິດທີ່ລົງທຶນຢູ່ເມືອງ ເພື່ອສ້າງເງື່ອນໄຂເຮັດໃຫ້ເສດຖະກິດຂອງເມືອງຍັງສືບຕໍ່ຂະຫຍາຍຕົວສະເລ່ຍ ໃນລະດັບ 5.4% ປະຕິບັດໄດ້ 100.64%, ລະດົມການລົງທຶນບັນລຸໄດ້ 59 ຕື້ກີບ ທຽບໃສ່ແຜນການປີປະຕິບັດໄດ້ 107%, ຈັດເກັບລາຍຮັບເຂົ້າງົບປະມານ 8 ຕື້ກີບ ປະຕິບັດໄດ້ 58.4%, ສົ່ງອອກສິນຄ້າມູນຄ່າ 8 ຕື້ກີບ ປະຕິບັດໄດ້ 58% ຂອງແຜນປີ (ແຜນ 15 ຕື້ກີບ), ນໍາເຂົ້າສິນຄ້າ 10 ຕື້ກີບ ປະຕິບັດໄດ້ 89% ຂອງແຜນປີ (ແຜນ 12 ຕື້ກີບ) ແລະ ສົ່ງເສີມການແລກປ່ຽນຊື້-ຂາຍສິນຄ້າຂອງປະຊາຊົນທີ່ຢູ່ຕາມລຽບຕາມຊາຍແດນ 910 ລ້ານກີບ ປະຕິບັດໄດ້ເກີນແຜນປີ (ແຜນ 253 ລ້ານກີບ), ໂຄງການພະລັງງານລົມ ແລະ ໂຄງການອື່ນໆຂະໜາດໃຫຍ່ຂອງລັດຖະບານປະຕິບັດໂຄງການສໍາເລັດຫຼາຍກວ່າ 70% ແລະ ທະນາຄານລະດົມເງິນຝາກສະສົມ 278 ຕື້ກີບ, ປ່ອຍສິນເຊື່ອແກ້ໄຂຄວາມທຸກຍາກ 6 ຕື້ກີບ ປະຕິບັດໄດ້ 153%.

ທ່ານຮອງເຈົ້າເມືອງດາກຈຶງ ໃຫ້ຮູ້ຕື່ມວ່າ: ເພື່ອສືບຕໍ່ຜັນຂະຫຍາຍ ແລະປະຕິບັດບັນດາຄາດໝາຍສູ້ຊົນຕາມມະຕິກອງປະຊຸມໃຫຍ່ ຄັ້ງທີ XV ຂອງອົງຄະນະພັກເມືອງວາງອອກ, ກໍຄື ການຜັນຂະຫຍາຍມະຕິ XI ຂອງສູນກາງພັກ, ມະຕິ X ຂອງອົງຄະນະພັກແຂວງໃຫ້ປະກົດຜົນເປັນຈິງ; ໃນໄລຍະ 6 ເດືອນທ້າຍປີ 2024 ຄະນະພັກ-ອົງການປົກຄອງເມືອງດາກຈຶງ ຈະໄດ້ສຸມໃສ່ນໍາພາ-ຊີ້ນໍາ ແລະ ສຸມທຸກກຳລັງແຮງເຂົ້າໃນການພັດທະນາພື້ນຖານໂຄງລ່າງ; ຈະສູ້ຊົນຈັດເກັບລາຍຮັບເຂົ້າງົບປະມານທັງໝົດໃຫ້ໄດ້ 17 ຕື້ກີບ, ພູດຂອງເມືອງ 5 ຕື້ກີບ; ຄຸ້ມຄອງລາຍຈ່າຍໃຫ້ຢູ່ໃນລະດັບ 20 ຕື້ກີບ; ສົ່ງອອກສິນຄ້າຜົນຜະລິດກະສິກຳ, ເຄື່ອງປ່າຂອງດົງ ແລະອື່ນໆ ໃຫ້ບັນລຸ 9 ຕື້ກີບ, ຄຸ້ມຄອງການນຳເຂົ້າສິນຄ້າທີ່ຈຳເປັນໃຫ້ຢູ່ໃນລະດັບ 13 ຕື້ກີບ;ຊຸກຍູ້ສົ່ງເສີມປະຊາຊົນຜະລິດກະສິກໍາ (ປູກຝັງ-ລ້ຽງສັດ) ເປັນສິນຄ້າຕິດພັນກັບການບໍລິການຄ້າຂາຍເພື່ອເປັນການສ້າງວຽກເຮັດງານທໍາ ແລະສ້າງລາຍໄດ້ ເພື່ອແນໃສ່ແກ້ໄຂຄວາມທຸກຍາກຂອງປະຊາຊົນ.
ຂ່າວ-ພາບ: ພຸດທະໄຊ ຍົວມະນີ
ກວດແກ້: ອິນແປງ ພົມມະນິດ

แชร์