ມອບ-ຮັບໂຄງການປັບປຸງ ແລະ ຍົກລະດັບໂຮງໝໍ ແຂວງຫລວງພະບາງ

ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ພິທີມອບຮັບໂຄງການປັບປຸງ ແລະ ຍົກລະດັບ ໂຮງໝໍແຂວງຫລວງພະບາງ ຈັດຂຶ້ນໃນວັນທີ 16 ສິງຫາ 2024 ໂດຍມີ ທ່ານ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ທ່ານ ນາງ ຟ່າງຫົງ ເອກອັກຄະລັດຖະທູດ ສປ ຈີນ ປະຈໍາລາວ ພ້ອມດ້ວຍການນຳຂອງແຂວງແລະ ພາກສ່ວນກ່ຽວຂ້ອງເຂົ້າຮ່ວມ. ໂຄງການປັບປຸງ ແລະ ຍົກລະດັບໂຮງໝໍແຂວງຫລວງພະບາງ ເປັນໂຄງການສະໜັບສະໜູນຢ່າງເຕັມທີ່ ຈາກອົງການພາກລັດທຸກຂັ້ນຂອງທັງລາວ ແລະ ຈີນ, ໂຄງການດັ່ງກ່າວໄດ້ເລີ່ມປະຕິບັດການກໍ່ສ້າງໃນວັນທີ 7 ກັນຍາ 2022 ແລະ ຮອດວັນທີ 18 ກໍລະກົດ 2024, ໂຄງການໄດ້ສຳເລັດ. ການປັບປຸງ ແລະ ຍົກລະດັບໂຮງໝໍແຂວງຫລວງພະບາງ ຄັ້ງນີ້ ປະກອບມີການສ້າງໃໝ່ບັນດາອາຄານຮັບຮອງການປີ່ນປົວລວມ 50 ຕຽງ ເປັນຕົ້ນ ຕຶກພະແນກພາຍນອກ ແລະ ພະແນກເສັ້ນເລືອດຫົວໃຈ, ພ້ອມນີ້ ໄດ້ກໍ່ສ້າງຫໍພັກຊ່ຽວຊານຈີນ, ເຂດບໍາບັດນໍ້າເປື້ອນ, ອ່າງນໍ້າສໍາລັບການດັບເພີງ ແລະ ຫ້ອງຈັກປ້ຳສູບນໍ້າດັບເພີງ, ນອກນັ້ນ ໄດ້ມີການບູລະນະສ້ອມແປງຕຶກອາຄານເກົ່າ ແລະໂຄງການກາງແຈ້ງຂອງໂຮງໝໍ, ທັງໄດ້ສະໜອງເຄື່ອງອຸປະກອນການແພດທີ່ຈຳເປັນຈຳນວນໜຶ່ງ, ພ້ອມນີ້ ໂຮງໝໍປະຊາຊົນເລກໜຶ່ງແຂວງຢຸນນານ ຈະໃຫ້ການຊ່ວຍເຫລືອດ້ານເຕັກນິກການແພດເປັນເວລາ 03 ປີ ພ້ອມທັງຈັດສົ່ງຄະນະຊ່ຽວຊານມາປະຈຳຢູ່ໂຮງໝໍຫລວງພະບາງ ເພື່ອໃຫ້ບໍລິການດ້ານການແພດ ແລະ ສົ່ງພະນັກງານພະຍາບານຂອງໂຮງໝໍແຂວງຫລວງພະບາງ ໄປຮັບການຝຶກອົບຮົມຢູ່ຈີນອີກດ້ວຍ.

ການປັບປຸງ ແລະ ຍົກລະດັບໂຮງໝໍແຂວງຫລວງພະບາງ ຄັ້ງນີ້ ຈະເຮັດໃຫ້ການບໍລິການດ້ານສາທາລະນະສຸກຂອງລາວ ໂດຍສະເພາະບັນດາແຂວງພາກເໜືອ ໄດ້ຮັບການພັດທະນາຫລາຍຂຶ້ນ ແລະ ເປັນອີກໂຄງການ ຂີດໝາຍດ້ານການຮ່ວມມື ແບບຕິດແທດຕົວຈິງ ລະຫວ່າງ ສອງປະເທດລາວ-ຈີນ ຕື່ມອີກ.

แชร์