ເຮັດແຈ່ວປາບໍ້າຂາຍ ສ້າງລາຍຮັບໄດ້ 180 ລ້ານກີບຕໍ່ເດືອນ

ແຈ່ວປາບໍ້າເປັນອາຫານພື້ນບ້ານປະເພດໜຶ່ງຂອງຊາວແຂວງຫົວພັນເວົ້າລວມ, ເວົ້າສະເພາະແມ່ນເມືອງຊໍາເໜືອ. ເຊິ່ງໃນປະຈຸບັນ, ແຈ່ວປາບໍ້າໄດ້ຮັບຄວາມນິຍົມຢ່າງກວ້າງຂວາງຈາກຜູ້ບໍລິໂພກທັງພາຍໃນ ແລະ ຕ່າງປະເທດ ແລະ ຍັງໄດ້ຖືກຮັບຮອງເປັນສິນຄ້າໜຶ່ງເມືອງໜຶ່ງຜະລິດຕະພັນ ຂອງເມືອງຊຳເໜືອ. ຍ້ອນແນວນັ້ນ, ຈິ່ງມີຫຼາຍຄອບຄົວຍຶດຖືເອົາການຜະລິດແຈ່ວປາບໍ້າ ເພື່ອເປັນສິ້ນຄ້າ ແລະ ສ້າງລາຍຮັບເຂົ້າສູ່ຄອບຄົວ. ດັ່ງຄອບຄົວ ນ. ກອງຄຳ ປະຊາຊົນ ບ້ານນາວຽງ ເມືອງຊຳເໜືອ ແຂວງຫົວພັນ ກໍ່ແມ່ນຄອບຄົວໜຶ່ງທີ່ໄດ້ຖືເອົາການເຮັດແຈ່ວປາບໍ້າເປັນອາຊີບຫຼັກເຊິ່ງສາມາດສ້າງລາຍຮັບໄດ້ 180 ລ້ານກີບຕໍ່ເດືອນ.

ທ່ານ ນ. ກອງຄຳ ໃຫ້ຮູ້ວ່າ: ພາຍໃນຄອບຄົວຂອງຕົນມີສະມາຊິກທັງໝົດ 4 ຄົນ, ຍິງ 2 ຄົນ, ແຮງງານຕົ້ນຕໍ 3 ຄົນ. ແຕ່ກ່ອນຕົນມີອາຊີບເຮັດນາ, ຕັດຫຍິບ ເຊິ່ງພໍພຽງແຕ່ກຸ້ມກິນເທົ່ານັ້ນ. ຍ້ອນສະພາບເສດຖະກິດມີການປ່ຽນແປງບວກໃສ່ຄວາມເປັນເອພະພາບຂອງທຸກຄົນໃນຄອບຄົວເພື່ອຊອກລາຍຮັບເພີ່ມເຂົ້າສູ່ຄອບຄົວ, ດັ່ງນັ້ນຕົນຈິ່ງໄດ້ເລີ່ມເຮັດແຈ່ວປາບໍ້າຂາຍນັບແຕ່ປີ 2010 ເປັນຕົ້ນມາ, ໂດຍເຮັດຂາຍຢູ່ພາຍໃນບ້ານ ແລະ ບ້ານອ້ອມຂ້າງ ໃນໄລຍະນັ້ນຂາຍ 50.000 ກີບ/1 ກິໂລ. ຈາກການຂາຍແຈ່ວປ້າບໍ້າມາໃນໄລຍະໜຶ່ງ ເຫັນວ່າໄດ້ຮັບຄວາມນິຍົມຈາກລູກຄ້າຫຼາຍຂຶ້ນ. ດັ່ງນັ້ນຕົນ ແລະ ຄອບຄົວຈິ່ງໄດ້ຍຶດຖືເອົາອາຊີບນີ້ເປັນຫຼັກ ແລະ ຄ່ອຍໆພັດທະນາສູດ ແລະ ວິທີການຜະລິດໃຫ້ດີຂຶ້ນ. ສ່ວນປະກອບຫຼັກຂອງແຈ່ວມີ: ໝາກເພັດແຫ້ງ, ຜັກທຽມແຫ້ງ, ໝາກມາດ, ເກືອ-ແປ້ງນົວ ແລະ ປາບໍ້າ (ປາແດກຊຳເໜືອ ). ສ່ວນວິທີການຜະລິດເຮັດແບບດັ່ງເດີມໃຊ້ແຮງຄົນເປັນຫຼັກ, ສໍາລັບການຈໍາໜ່າຍແມ່ນເຮັດຕາມລູກຄ້າສັ່ງ ( ບໍ່ມີໜ້າຮ້ານ ) ເຮັດແລ້ວລູກຄ້າຈະມາເອົາຢູ່ເຮືອນເລີຍ ແລະ ຍັງມີລູກຄ້າຕ່າງແຂວງຈໍານວນໜຶ່ງທີ່ສັ່ງ ແລະ ເອົາໄປຂາຍຕໍ່. ເຊິ່ງມາຮອດປະຈຸບັນ, ໃນໜຶ່ງມື້ສາມາດປຸງແຕ່ງແຈ່ວໄດ້ປະມານ 30 ກິໂລ, ຂາຍໃນລາຄາກິໂລລະ 200,000 ກີບ, ສາມາດສ້າງລາຍຮັບເຂົ້າສູ່ຄອບຄົວໄດ້ ປະມານ 180 ລ້ານກີບຕໍ່ເດືອນ.

ນອກຈາກເຮັດແຈ່ວປາບໍ້າແລ້ວຄອບຄົວ ນ. ກອງຄຳ ຍັງໄດ້ເຮັດໜັງແຊ່ເພ້ຍຂາຍຕື່ມ. ພາຍໃນ 1 ເດືອນໄດ້ປະມານ 130 ກິໂລກຣາມ, ຂາຍໃນລາຄາກິໂລລະ 80,000 ກີບ, ສາມາດສ້າງລາຍຮັບເພີ່ມ 10 ລ້ານກວ່າກີບ. ລວມລາຍຮັບທັງໝົດຈາກການຂາຍເຈ້ວປາບໍ້າ ແລະ ໜັງແຊ່ເພ້ຍເດືອນໜຶ່ງໄດ້ 190 ລ້ານກີບ. ຈາກການເຮັດອາຊີບດັ່ງກ່າວ, ມາຮອດປະຈຸບັນເຫັນວ່າຊີວິດການເປັນຢູ່ຂອງຄອບຄົວໄດ້ຮັບການພັດທະນາດີຂຶ້ນກວ່າເກົ່າ.

ໂດຍ: ສີອຳພອນ

แชร์