ເຄິ່ງປີ ດ່ານສາກົນປາງ ມີຄົນເຂົ້າ-ອອກ 93,533 ຄົນ, ເກັບລາຍຮັບໄດ້ 6,20 ຕື້ກວ່າກີບ

ດ່ານສາກົນປາງມອນເມືອງຄອບ ແຂວງໄຊຍະບູລີ ໄດ້ເປີດຢ່າງເປັນທາງການໃນວັນທີ 1 ກຸມພາ 2020 ມີພະນັກງານລັດຖະກອນທັງໝົດ 29 ຄົນ ລັດຖະກອນ 28 ຄົນ ຍິງ 2 ຄົນ ແລະ ອາສາສະໜັກ 1 ຄົນ ດ່ານສາກົນປາງມອນຕິດກັບປະເທດໄທເຊິ່ງໜ້າດ່ານບ້ານຮວກ ອໍາເພີພູຊາງ ແຂວງພະເຍົາ ຣາຊະນາຈັກໄທ ມີໄລຍະທາງ 500 ແມັດ.

ທ່ານ ພັນໂທ ບົວເງິນ ໄຊວຸດ ຫົວໜ້າຄຸ້ມຄອງດ່ານສາກົນປາງມອນໄດ້ເປີດເຜີຍຕໍ່ສື່ມວນຊົນແຂວງໄຊຍະບູລີ ເມື່ອບໍ່ດົນມານີ້ວ່າໃນ 6 ເດືອນ ຕົ້ນປີພວກເຮົາກໍ່ໄດ້ເອົາໃຈໃສ່ເຄື່ອນໄຫວວຽກງານວິຊາສະເພາະແຕ່ລະຂະແໜງການຕາມຄວາມຮັບຜິດຊອບເຊິ່ງສະແດງໃນ 6 ເດືອນ ຜ່ານມາມີຄົນເຂົ້າ-ອອກ ດ່ານທັງໝົດ 93,533 ຄົນ ຍິງ 45,581 ເດັກ 4810 ຄົນ ສະເລ່ຍມື້ໜຶ່ງເຂົ້າ-ອອກດ່ານ 610 ຄົນ, ຄົນເຂົ້າມີທັງໝົດ 47.858 ຄົນ ຍິງ 23,629 ຄົນ ເດັກນ້ອຍ 2535 ຄົນ, ຄົນອອກດ່ານມີ 45,675 ຄົນ ຍິງ 21,952 ຄົນ, ເດັກ 2,275 ຄົນ ມີພາຫະນະເຂົ້າ-ອອກ ທັງໝົດ 29,053 ຄັນ ໃນນີ້ພາຫະນະອອກ 14,070 ຄັນ, ພາຫະນະຕ່າງປະເທດເຂົ້າ 14.346 ຄັນ ການຈັດເກັບລາຍຮັບຢູ່ດ່ານສາກົນປາງມອນໃນ 6 ເດືອນ ຕົ້ນປີ 2024 ຕາມແຜນການມອບເໝົາມີທັງໝົດ 9 ຕື້ກວ່າກີບ ຜ່ານການຈັດຕັ້ງປະຕິບັດຕົວຈິງສາມາດເກັບລາຍໄດ້ທັງໝົດ 6,20 ຕື້ກວ່າກີບເທົ່າກັບ 68,92 % ການສົ່ງອອກສິນຄ້າກະສິກໍາມີທັງໝົດ 27,604 ໂຕນ ມູນຄ່າທັງໝົດ 2 ລ້ານ 4 ແສນ ກວ່າໂດລາ. ໃນນີ້ ມີໝາກເດືອຍ 446 ໂຕນ ມູນຄ່າ 87,740 ໂດລາ, ມັນຕົ້ນແຫ້ງ 22,450 ໂຕນ ມູນຄ່າ 1 ລ້ານ 6 ແສນ ກວ່າໂດລາ, ສາລີ 40,600 ໂຕນ ມູນຄ່າ 5 ແສນກວ່າໂດລາ, ຖົ່ວດິນ 30 ໂຕນ ມູນຄ່າ 12. ພັນໂດລາ, ດອກແຂມ 75 ໂຕນ ມູນຄ່າ 22.250 ໂດລາ ແລະ ປໍສາ 75 ໂຕນ ມູນຄ່າ 22.250 ໂດລາ. ທ່ານຍັງໃຫ້ຮູ້ຕື່ມວ່າ: ສ່ວນການນໍາເຂົ້າສິນຄ້າຜ່ານດ່ານສາກົນປາງມອນສ່ວນໃຫຍ່ຈະແມ່ນເຄື່ອງອຸປະໂພກບໍລິໂພກມີມູນຄ່າທັງໝົດ 1 ລ້ານ 1 ແສນກວ່າໂດລາ ແລະ ເບັ້ຍຢາງພາລາມູນຄ່າ 5 ພັນກວ່າໂດລາ.
ຂ່າວ+ພາບ: ບຸນທີ

แชร์