ລາວ-ໄທ ຮ່ວມມືກັນຕ້ານແລະສະກັດກັ້ນການກໍ່ຄວາມບໍ່ສະຫງົບຕາມບໍລິເວນຊາຍແດນ

ລະຫວ່າງວັນທີ 12-14 ສິງຫາ 2024 ນີ້, ທ່ານ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບປະຊາຊົນລາວ ພ້ອມຄະນະ ໄດ້ເດີນທາງຢ້ຽມຢາມ ແລະ ເຮັດວຽກຢູ່ຣາຊະອານາຈັກໄທ ໂດຍໃຫ້ການຕ້ອນຂອງທ່ານ ພົນເອກ ຊົງວິດ ໜຸນພັກດີ ຜູ້ບັນຊາການທະຫານສູງສຸດ ແຫ່ງຣາຊະອານາຈັກໄທ.

ພິທີຕ້ອນຮັບຢ່າງເປັນທາງການໄດ້ຈັດຂຶ້ນຢູ່ກອງບັນຊາການທະຫານສູງສຸດ ແຫ່ງຣາຊະອານາ ຈັກໄທ. ຈາກນັ້ນ, ກໍໄດ້ມີການພົບປະສອງຝ່າຍ ເພື່ອພ້ອມກັນຕີລາຄາຄືນໝາກຜົນການພົວພັນຮ່ວມມືໃນໄລຍະຜ່ານມາ ໂດຍສະເພາະແມ່ນການຮ່ວມມືກັນຕ້ານ ແລະ ສະກັດກັ້ນການກໍ່ຄວາມບໍ່ສະຫງົບຢູ່ຕາມບໍລິເວນຊາຍແດນຂອງສອງປະເທດ ເປັນຕົ້ນການສະກັດກັ້ນການລັກລອບເຂົ້າເມືອງຜິດກົດໝາຍ, ອາຊະຍາກໍາຂ້າມຊາດ, ການຄ້າຢາເສບຕິດ, ການຄ້າມະນຸດ, ການຄ້າຂາຍເຖື່ອນ, ການຄ້າອາວຸດ ແລະ ການກໍ່ອາຊະຍາກໍາຕ່າງໆ ທີ່ຜິດກົດໝາຍ.

ຕໍ່ບັນຫາດັ່ງກ່າວ,ທັງສອງຝ່າຍເຫັນດີພ້ອມກັນຈັດຕັ້ງປະຕິບັດ ແລະຜ່ານຜ່າບັນຫາສີ່ງທ້າທາຍຢູ່ບໍລິເວນຊາຍແດນ, ຮັບປະກັນໄດ້ຄວາມສະຫງົບ ແລະ ຄວາມໜັ້ນຄົງໃຫ້ແກ່ປະຊາຊົນສອງຊາດ, ຜ່ານການຮັດແໜ້ນການຮ່ວມມື, ສອງກອງທັບໄດ້ເອົາໃຈໃສ່ປ້ອງກັນ ແລະ ປະກອບສ່ວນເຂົ້າໃນຂົງເຂດເສດຖະກິດ-ສັງຄົມ ຂອງສອງປະເທດໄດ້ຮັບການພັດທະ ນາດີຂຶ້ນເປັນກ້າວໆ ມີຜົນສໍາເລັດເປັນຮູບປະທໍາຫລາຍດ້ານ.
ທີ່ມາ: ຂປລ

แชร์