ຫາລືການຈັດຫາງານ ເພື່ອສ້ອມບໍາລຸງຮັກສາໂຮງໄຟຟ້າ ປະຈໍາປີ

ອົງການປົກຄອງເມືອງຫົງສາ ແຂວງໄຊຍະບູລີ ຮ່ວມກັບ ບໍລິສັດ ໄຟຟ້າຫົງສາ ຈໍາກັດ, ບໍລິສັດຜູ້ຈ້າງງານ ແລະ ຜູ້ສະໜອງແຮງງານ ໄດ້ຈັດກອງປະຊຸມປຶກສາຫາລື ສ້າງຄວາມເຂົ້າໃຈໃນການຈັດຫາງານ ເພື່ອສ້ອມບໍາລຸງຮັກສາໂຮງໄຟຟ້າ ປະຈໍາປີຂຶ້ນ, ທີ່ຫ້ອງປະຊຸມຫ້ອງວ່າການເມືອງ ໃນຕອນເຊົ້າຂອງວັນທີ 12 ສິງຫານີ້, ໂດຍການເປັນປະທານຮ່ວມຂອງທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ, ທ່ານ ຢຸທະນາ ຈຸ່ນພານທອງ ຜູ້ອໍານວຍການຝ່າຍສື່ສານອົງກອນ ບໍລິສັດໄຟຟ້າຫົງສາ ຈໍາກັດ, ມີພາກສ່ວນທີ່ກ່ຽວຂ້ອງຂອງເມືອງ, ຕາງໜ້າບໍລິສັດໄຟຟ້າຫົງສາ ຈໍາກັດ, ບໍລິສັດຜູ້ຈ້າງງານ, ບັນດາຜູ້ຈັດຫາງານຢູ່ພາຍໃນເມືອງເຂົ້າຮ່ວມ.

ໃນກອງປະຊຸມບັນດາຜູ້ເຂົ້າຮ່ວມແມ່ນໄດ້ຄົ້ນຄວ້າປຶກສາຫາລື ແລະ ໄດ້ຕົກລົງເປັນເອກະພາບກັນຫຼາຍບັນຫາເຊັ່ນ: ອົງການປົກຄອງເມືອງ ແລະ ບໍລິສັດໄຟຟ້າຫົງສາ ຈໍາກັດ ເຫັນດີໃຫ້ມີຕົວແທນຂອງເມືອງ ໃນການຈັດຫາງານ ເພື່ອສ້ອມບໍາລຸງຮັກສາໂຮງໄຟຟ້າປະຈໍາປີ ເພື່ອແກ້ໄຂບັນຫາການຄຸ້ມຄອງແຮງງານໃຫ້ຖືກຕ້ອງ, ສອດຄ່ອງກັບລະບຽບກົດໝາຍ ພ້ອມທັງຮັບປະກັນໃຫ້ມີແຮງງານພຽງພໍ, ໄດ້ແຮງງານທີ່ມີຄຸນນະພາບ, ແຮງງານໄດ້ຮັບສະຫວັດດີການ ທີ່ຄົບຖ້ວນ ແລະ ຖືກຕ້ອງຕາມກົດໝາຍ ທີ່ກໍານົດໄວ້ ໂດຍມອບໃຫ້ບໍລິສັດ ນິກສິງ ຂາອອກ-ຂາເຂົ້າ ຈໍາກັດຜູ້ດຽວ ທີ່ໄດ້ຮັບສິດ ຕາມຂໍ້ຕົກລົງຂອງທ່ານເຈົ້າແຂວງ ສະບັບເລກທີ 1471/ຈຂ.ຊຍ, ລົງວັນທີ 11 ຕຸລາ 2023 ເປັນຕົວແທນອົງການປົກຄອງເມືອງ, ບໍລິສັດໄຟຟ້າຫົງສາຈໍາກັດ ແລະ ບັນດາບໍລິສັດທີ່ຕ້ອງການນໍາໃຊ້ແຮງງານ ເພື່ອສະໜອງແຮງງານ ໃຫ້ແກ່ການສ້ອມບໍາລຸງຮັກສາໂຮງງານໄຟຟ້າຄັ້ງນີ້; ສໍາລັບບໍລິສັດ ອີແກັດ ໃນນາມຜູ້ຮັບຜິດຊອບຮັບເອົາບໍລິສັດຜູ້ຮັບ ເໝົາ ແລະ ແຮງງານເຂົ້າມາສ້ອມບໍາລຸງ ແມ່ນເຫັນດີໃຫ້ຮັບເອົາແຮງງານທີ່ມີຄວາມຖືກຕ້ອງຕາມລະບຽບກົດໝາຍ ທີ່ໄດ້ຮັບການຢັ້ງຢືນຈາກອົງການປົກຄອງເມືອງ ແລະ ບໍລິສັດທີ່ເປັນຕົວແທນຈັດຫາງງານ. ສຳລັບບັນດາຜູ້ສະໜອງແຮງງານໃນໄລຍະຜ່ານມາທີ່ຍັງບໍ່ທັນຜ່ານລະບົບຢ່າງຖືກຕ້ອງ ແມ່ນເຫັນດີເປັນເອ ກະພາບໃຫ້ເຂົ້າຮ່ວມກຸ່ມກັບບໍລິສັດ ນິກສິງ. ສ່ວນການຄຸ້ມຄອງ, ການແບ່ງປັນຜົນ ແມ່ນໃຫ້ໄປປຶກສາຄົ້ນ ຄວ້າສ້າງເປັນເອກະພາບກັນ ແລະ ລາຍງານໃຫ້ເມືອງຮັບຊາບນໍາ ເພື່ອບໍ່ໃຫ້ມີຜົນກະທົບຕໍ່ກິດຈະການ ແລະ ປະກົດການຫຍໍ້ທໍ້ຕ່າງໆ.

ທັງນີ້, ເພື່ອຮັບປະກັນການສະໜອງແຮງງານໃນການສ້ອມແປງບໍາລຸງຮັກສາໂຮງງານໄຟຟ້າປະຈໍາປີໃຫ້ພຽງພໍ ແລະ ເປັນລະບົບ, ຄຸ້ມຄອງບັນດາຫົວໜ່ວຍການຈັດຫາແຮງງານໃຫ້ດໍາເນີນກິດຈະການຖືກ ຕ້ອງຕາມລະບຽບກົດໝາຍ, ສາມາດຕິດຕາມກວດກາໄດ້ຢ່າງຈະແຈ້ງ, ຊັດເຈນ ແລະ ຈັດເກັບພັນທະຕ່າງໆໃຫ້ແກ່ລັດໄດ້ຢ່າງຄົບຖ້ວນ, ພ້ອມທັງຮັບປະກັນການປົກປ້ອງສິດຜົນປະໂຫຍດຂອງຜູ້ອອກແຮງງານ ແລະ ທຸກໆຝ່າຍຕ່າງໄດ້ຮັບຜົນປະໂຫຍດຮ່ວມກັນ.
(ຂ່າວ-ພາບ: ກິດຕິສັກ ບົວໄລ)

แชร์