ກະຊວງ ຮສສ ແຈ້ງກ່ຽວກັບການກໍານົດ ແລະການເບີກຈ່າຍເງິນເດືອນ

ເພື່ອຄວາມເປັນເອກະພາບໃນການກໍານົດ ແລະການເບີກຈ່າຍເງິນເດືອນ ຫຼືຄ່າແຮງງານ ແລະນະໂຍບາຍອື່ນໃຫ້ແກ່ຜູ້ອອກແຮງງານຢູ່ທຸກຫົວໜ່ວຍແຮງງານໃນຂອບເຂດທົ່ວປະເທດ, ແນໃສ່ປົກປ້ອງສິດ ແລະຜົນ ປະໂຫຍດຂອງຜູ້ອອກແຮງງານ ແລະຜູ້ໃຊ້ແຮງງານໃຫ້ໄດ້ຮັບຄວາມເປັນທໍາຕາມກົດໝາຍ ແລະລະບຽບການ.

ລັດຖະມົນຕີ, ປະທານຄະນະກໍາມະການແຮງງານແຫ່ງຊາດ ອອກແຈ້ງການເລກທີ 2721/ຮສສ ລົງວັນທີ 13 ສິງຫາ 2024, ເລື່ອງ ການກໍານົດ ແລະ ການເບີກຈ່າຍເງິນເດືອນ ຫຼືຄ່າແຮງງານ ແລະນະໂຍບາຍອື່ນ ໃຫ້ແກ່ຜູ້ອອກແຮງງານ ຢູ່ ສປປ ລາວ. ຊຶ່ງມີລາຍອຽດດັ່ງນີ້:

1. ຫົວໜ່ວຍແຮງງານໃດທີ່ໄດ້ກໍານົດການເບີກຈ່າຍເງິນເດືອນ ຫຼືຄ່າແຮງງານ ແລະນະໂຍບາຍອື່ນໃຫ້ຜູ້ອອກແຮງງານຂອງຕົນເປັນສະກຸນເງິນຕາຕ່າງປະເທດ ແລ້ວຈ່າຍເປັນເງິນກີບແມ່ນໃຫ້ຄິດໄລ່ບໍ່ໃຫ້ຫຼຸດຕາມອັດຕາແລກປ່ຽນຂອງທະນາຄານທຸລະກິດໃດຫນຶ່ງທີ່ກໍານົດອອກຫຼ້າສຸດໃນວັນໃດໜຶ່ງ ພາຍໃນ 3 ວັນລັດຖະການ ກ່ອນວັນຄິດໄລ່ເງິນເດືອນເປັນພື້ນຖານໃນການຄິດໄລ່ ໂດຍສອດຄ່ອງກັບກົດໝາຍ ແລະ ລະບຽບການຂອງ ທະນາຄານແຫ່ງ ສປປ ລາວ ກໍານົດໃນແຕ່ລະໄລຍະ;
2. ສໍາລັບຫົວໜ່ວຍແຮງງານໃດ ທີ່ປະຕິບັດບໍ່ທັນສອດຄ່ອງ ແມ່ນໃຫ້ປັບປຸງແກ້ໄຂສັນຍາແຮງງານ ແລະກົດລະບຽບພາຍໃນຂອງຕົນໃຫ້ສໍາເລັດ ແລະ ສອດຄ່ອງກັບເນື້ອໃນແຈ້ງການສະບັບນີ້;

3. ຖ້າຫົວໜ່ວຍແຮງງານໃດ ເບີກຈ່າຍເງິນເດືອນ ຫຼືຄ່າແຮງງານ ແລະນະໂຍບາຍອື່ນໂດຍກໍານົດອັດຕາແລກປ່ຽນຕໍ່າກວ່າອັດຕາແລກປ່ຽນທີ່ທະນາຄານກໍານົດໄວ້ ແມ່ນຈະຖືກກ່າວເຕືອນ ແລະປະຕິບັດຕາມກົດໝາຍ ແລະລະບຽບການທີ່ກ່ຽວຂ້ອງ, ພ້ອມທັງຕ້ອງຄິດໄລ່ຄືນໃຫ້ແກ່ຜູ້ອອກແຮງງານ ເລີ່ມແຕ່ວັນທີ 1 ຕຸລາ 2024 ເປັນຕົ້ນໄປ;

4. ໃຫ້ຄະນະກໍາມະການແຮງງານແຫ່ງຊາດ, ກອງເລຂາຂອງຄະນະກໍາມະການແຮງງານແຫ່ງຊາດ, ຄະນະກໍາມະ ການແຮງງານຂັ້ນແຂວງ, ຫ້ອງການແຮງງານ ແລະສະຫວັດດີການສັງຄົມຂັ້ນເມືອງ, ເຈົ້າໜ້າທີ່ກວດກາແຮງງານ ໂຄສະນາ, ເຜີຍແຜ່, ຕິດຕາມ, ກວດກາ, ຊຸກຍູ້ ແລະແນະນໍາໃຫ້ຫົວໜ່ວຍແຮງງານປັບປຸງແກ້ໄຂໃຫ້ຖືກຕ້ອງຕາມແຈ້ງການສະບັບນີ້ຢ່າງເຂັ້ມງວດ.

แชร์