ທ່ານ ນາງ ທູນສະຫວັນ ສີຈັນທອງທິບ ໄດ້ຮັບລາງວັນເຄືອຂ່າຍຜູ້ປະກອບການແມ່ຍິງດີເດັ່ນອາຊຽນ
ບໍລິສັດ ຂົນສົ່ງສາກົນ ຈຳກັດ ຫຼື Inter Transport Co., Ltd ສ້າງຕັ້ງຂຶ້ນໃນປີ 2000 ພາຍໃຕ້ການນຳພາຂອງ ທ່ານ ນາງ ເດືອນດາລາ ວໍລະຈິດ ປະທານບໍລິສັດ ແລະ ທ່ານ ນາງ ທູນສະຫວັນ ສີຈັນທອງທິບ ຮອງປະທານ ແລະ ອຳນວຍການບໍລິສັດ, ມີສຳນັກງານໃຫຍ່ຕັ້ງຢູ່ ບ້ານຈອມແກ້ວ, ນະຄອນໄກສອນ ແຂວງ ສະຫວັນນະເຂດ. ນອກນັ້ນຍັງມີອີກ 4 ສາຂາທົ່ວປະເທດຄື: 1) ບ້ານ ດົງໂພສີ, ເມືອງ ຫາດຊາຍຟອງ, ນະຄອນຫຼວງວຽງຈັນ, 2) ບ້ານ ນາເຕີຍ, ເມືອງນໍ້າທາ, ແຂວງ ຫຼວງນໍ້າທາ, 3) ບ້ານນາຕາດ, ເມືອງ ທ່າແຂກ, ແຂວງຄຳມ່ວນ, 4)ບ້ານ ປາກຮາວໃຕ້, ເມືອງ ຫ້ວຍຊາຍ, ແຂວງ ບໍ່ແກ້ວ. ຈຸດປະສົງຫຼັກເພື່ອນຳໃຊ້ທ່າແຮງທາງດ້ານທີ່ຕັ້ງຂອງປະເທດ ລວມທັງຜັນຂະຫຍາຍແນວທາງຂອງພັກ ແລະ ນະໂຍບາຍຂອງລັດໃນການນຳໃຊ້ທາງຜ່ານໃຫ້ເກີດປະໂຫຍດສູງສຸດ ສ້າງຄຸນນະພາບທີ່ດີ ກ້າວເຂົ້າສູ່ມາດຕະຖານສາກົນ. ບໍລິສັດຂອງພວກເຮົາໄດ້ໃຫ້ບໍລິການຂົນສົ່ງສິນຄ້າທັງພາຍໃນ ແລະ ຂ້າມແດນ, ບໍລິການຍົກຍໍຄ່ຽນຖ່າຍຕູ້ຄອນເທນເນີ້, ບໍລິການແຈ້ງເອກະສານສົ່ງອອກ-ນຳເຂົ້າສິນຄ້າ ແລະ ໃຫ້ບໍລິການທີ່ປຶກສາດ້ານໂລຈີສຕິກທັງພາກລັດ-ເອກະຊົນ.
ນັບແຕ່ມື້ສ້າງຕັ້ງມາຮອດປະຈຸບັນ ບໍລິສັດຂອງພວກເຮົາມີການຂະຫຍາຍຕົວດີພໍສົມຄວນ. ຄຽງຄູ່ກັນນັ້ນ ໃນການດຳເນີນທຸລະກິດທີ່ຕິດພັນກັບຕ່ອງໂສ້ເຄືອຂ່າຍຫຼາຍປະເທດ ການຂົນສົ່ງຫຼາຍຮູບແບບ ເທັກໂນໂລຊີທີ່ທັນສະໄໝ ໄດ້ມີການປ່ຽນແປງທີ່ວ່ອງໄວ ຕິດພັນກັບບັນດາສົນທິສັນຍາຂອງສາກົນ ສິ່ງສຳຄັນຕ້ອງການຮີບຮ້ອນປັບປຸງບັນດາຂັ້ນຕອນການດຳເນີນການ ແລະ ບໍລິການໃຫ້ໄດ້ມາດຕະຖານຂອງສາກົນ ເຊິ່ງເປັນຂໍ້ຮຽງຮ້ອງທີ່ສຳຄັນຂອງບັນດາລູກຄ້າທີ່ຈະມາໃຊ້ບໍລິການ. ບໍລິສັດຂອງພວກເຮົາມີຂໍ້ທ້າທາຍທີ່ຕ້ອງໄດ້ປັບປຸງຂີດຄວາມສາມາດຂອງບຸກຄະລາກອນ ແລະ ຄຸນນະພາບຢ່າງຕໍ່ເນື່ອງດ້ວຍການສຶບຕໍ່ພັດທະນາອົງກ່ອນຢ່າງບໍ່ຢຸດຢັ້ງ.
ບໍລິສັດ ຂົນສົ່ງສາກົນ ຈຳກັດ ໄດ້ຮັບຄວາມໄວ້ວາງໃຈຈາກບັນດາໂຄງການຂະໜາດໃຫຍ່ໃຫ້ຂົນສົ່ງເຄື່ອງກົນຈັກໜັກ ສາຍສົ່ງໄຟຟ້າ, ໝໍ້ແປງໄຟຟ້າ ລວມໄປເຖິງສິນຄ້າອຸດສາຫະກຳ ແລະ ກະສິກຳ ໂດຍສະເພາະການຂົນສົ່ງໝາກຖົ່ວລຽນຈາກປະເທດເພື່ອນບ້ານ. ຈາກບັນດາຜົນງານດັ່ງກ່າວໃນວັນທີ 1 ສິງຫາ 2024 ຢູ່ໂຮງແຮມ Sofitel ນະຄອນພະນົມເປັນ ລາຊະອານາຈັກກຳປູເຈຍ, ເຄືອຂ່າຍຜູ້ປະກອບການແມ່ຍິງອາຊຽນ (AWEN) ໄດ້ມອບລາງວັນເຄືອຂ່າຍຜູ້ປະກອບການແມ່ຍິງດີເດັ່ນອາຊຽນໃຫ້ ທ່ານ ນາງ ທູນສະຫວັນ ສີຈັນທອງທິບ. ສຳລັບການເຂົ້າຮ່ວມຄັ້ງນີ້ ມີຜູ້ໄດ້ຮັບລາງວັນຈາກ 9 ປະເທດ ສະມາຊິກອາຊຽນ. ໃນນີ້ມີສະມາຊິກນັກທຸລະກິດຍິງ (ສທຍ) ຈຳນວນ 10 ທ່ານຈາກ ສປປລາວ ໄດ້ຮັບລາງວັນດັ່ງກ່າວ.
ໂອກາດດັ່ງກ່າວ ທ່ານ ນາງ ທູນສະຫວັນ ສີຈັນທອງທິບ ຮູ້ສຶກພາກພູມໃຈເປັນຢ່າງຍິ່ງ ແລະ ສະແດງຄວາມຂອບໃຈນຳທຸກໆພາກສ່ວນທີ່ກ່ຽວຂ້ອງ ທີ່ໄດ້ສຸມໃສ່ເຮັດວຽກຮ່ວມກັນຈົນໄດ້ຮັບລາງວັນ “ລາງວັນອັນຊົງກຽດນີ້ ບໍ່ແມ່ນຄວາມສຳເລັດຂອງຂ້າພະເຈົ້າຜູ້ດຽວ ແຕ່ຫາກເປັນລາງວັນແຫ່ງຜົນສຳເລັດຂອງການອອກເຫື່ອເທແຮງຂອງພະນັກງານທຸກຄົນ ທີ່ຮ່ວມກັນເຮັດວຽກຢ່າງເປັນຈິດໜຶ່ງໃຈດຽວກັນ. ລາງວັນນີ້ຊ່ວຍໃຫ້ຂ້າພະເຈົ້າມີແຮງພັກດັນທີ່ຈະຜ່ານຜ່າສິ່ງທ້າທາຍອຸປະສັກນາໆປະການເພື່ອ ຂັບເຄື່ອນຄວາມເຊື່ອໝັ້ນ ແລະ ສົ່ງມອບບໍລິການອັນເປັນເລີດ ໃຫ້ແກ່ລູກຄ້າທຸກທ່ານ”.
ເຖິງຢ່າງໃດກໍຕາມ ໃນໂອກາດດັ່ງກ່າວນີ້ ທ່ານ ນາງ ທູນສະຫວັນ ສີຈັນທອງທິບ ຍັງໄດ້ຂໍຄວາມຮ່ວມແຮງຮ່ວມໃຈນຳບັນດານັກທຸລະກິດ ແລະ ຜູ້ປະກອບການໃນ ສປປລາວ ໂດຍສະເພາະບັນດາແມ່ຍິງ ໃຫ້ຍົກສູງບົດບາດ ແລະ ສະໜັບສະໜູນຜູ້ປະກອບການຍິງ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ, ບັນດາຜູ້ປະກອບການຈົ່ງຊ່ວຍກັນສະແດງຄວາມສາມາດ ແລະ ສັກກະຍະພາບອອກມາໃຫ້ໂລກຮັບຮູ້. ສິ່ງສຳຄັນຂໍໃຫ້ຊ່ວຍສົ່ງເສີມບົດບາດຍິງ-ຊາຍ ຊຸກຍູ້ໃຫ້ບັນແມ່ຍິງນັບມື້ນັບມີບົດບາດຫຼາຍຂຶ້ນໃນຕຳແໜ່ງທີ່ສຳຄັນຂອງອົງກອນ ຊ່ວຍຫຼຸດກຳແພງກັ້ນລະຫວ່າງ ຍິງ-ຊາຍ ໃຫ້ທຸກຄົນມີສິດເທົ່າທຽມກັນ. ພ້ອມນັ້ນ, ຂໍເປັນກຳລັງໃຈໃຫ້ແກ່ບັນດາຜູ້ປະກອບການຜ່ານຜ່າສິ່ງທ້າທາຍ ແລະ ອຸປະສັກນາໆປະການ ນຳພາບັນດາທຸລະກິດໄປສູ່ຄວາມເປັນມືອາຊີບ ໄດ້ມາດຕະຖານສາກົນ ມີກຳໄລທີ່ໝັ້ນທ່ຽງຕໍ່ເນື່ອງ ປະກອບສ່ວນໃນການພັດທະນາເສດຖະກິດ-ສັງຄົມຂອງປະເທດເຮົາ.
