ຈັບຊາຍຄົນໄທ ທີ່ເອົາເງິນກີບປອມ 24 ລ້ານ ມາໃຊ້ຈ່າຍຢູ່ລາວ

ຈາກເຫດການທີ່ມີຄົນນໍາເອົາເງິນກີບປອມ ປະເພດໃບ 50,000 ມາໃຊ້ຈ່າຍ ແລະຊື້ເຄື່ອງຢູ່ຕະຫລາດເມືອງນາແລ, ເຈົ້າຫນ້າທີ່ ປກສ ແຂວງຫລວງນ້ຳທາ ຈື່ງໄດ້ລົງເກັບກຳຂໍ້ມູນ ແລະ ຮູ້ວ່າແມ່ນ ນາງ ສືບ ເມືອງນາແລ ຊື່ງຜູ້ກ່ຽວໄດ້ໃຫ້ການວ່າ: ໄດ້ນຳເອົາເງິນ 1,500 ຢວນ ແລກປ່ຽນເງິນກີບນຳ ທ້າວ ວັນໄຊ ຄົນແຂວງບໍ່ແກ້ວ (ໂຊເຟີລົດ) ໄດ້ເງິນຈຳນວນ 5,550,000 ກີບ ໄດ້ໃຊ້ຈ່າຍ ແລະ
ຊື້ເຄື່ອງຢູ່ຕະຫລາດເມືອງນາແລ (ໃນເບື້ອງຕົ້ນຜູ້ກ່ຽວກໍບໍ່ຮູ້ເງິນທີ່ໄປແລກນັ້ນແມ່ນເງິນປອມ).
ມາຮອດວັນທີ 25 ມິຖຸນາ 2024 ເຈົ້າຫນ້າທີ່ ສາມາດກັກຕົວ ທ້າວ ວັນໄຊ ໄດ້ຢູ່ເມືອງຫ້ວຍຊາຍ ແຂວງບໍ່ແກ້ວ ແລະ ຜູ້ກ່ຽວກໍໄດ້ຊັກທອດຫາ ທ້າວ ພອນສະຫວັນ (ສັນຊາດໄທ) ຢູ່ແຂວງຊຽງລາຍ ປະເທດໄທ ແລະ ມາຮອດວັນວັນທີ 27 ມິຖຸນາ 2024 ສາມາດກັກຕົວ ທ້າວ ພອນສະຫວັນ ພ້ອມຂອງກາງເງິນກີບປອມ ຈໍານວນ 1 ລ້ານກີບ ມາດຳເນີນການສອບສວນ.
ພວກກ່ຽວທັງ 02 ທັງຮັບສາລະພາບວ່າ: ເງິນກີບປອມແມ່ນເອົາມາແຕ່ປະເທດໄທ ຈໍານວນ 24 ລ້ານກີບ ໄດ້ມາໃຊ້ຈ່າຍຢູ່ ແຂວງບໍ່ແກ້ວ ແລະ ແລກປ່ຽນເປັນເງິນຢວນ, ຈໍານວນໜຶ່ງໃຊ້ຈ່າຍ ຍັງເຫລືອ 6,550,000 ກີບ ໄດ້ແລກປ່ຽນເອົາເງິນຢວນນໍາ ນາງ ສືບ 1,500 ຢວນ ເປັນເງິນກີບ 5,550,000 ກີບ ແລະ ໄດ້ຮັກສາໄວ້ 1 ລ້ານກີບ.
ປັດຈຸບັນ ຄະດີດັ່ງກ່າວ, ກໍາລັງເກັບກໍາຂໍ້ມູນ ແລະ ຂະຫຍາຍຜົນຫາກຸ່ມແກ້ງ ເພື່ອນໍາມາດໍາເນີນຄະດີຕາມຂະບວນຍຸຕິທໍາ.

แชร์