ສະຫວັນ ຮັບຮອງນິຕິກຳການຄຸ້ມຄອງກອງທຶນໄພພິບັດ ແລະນິຕິກຳການຄຸ້ມຄອງການນຳໃຊ້ທີ່ດິນກະສິກຳ

ສະພາປະຊາຊົນແຂວງສະຫວັນນະເຂດ ໄດ້ຮັບຮອງຢ່າງເປັນເອກະສັນເອົານິຕິກໍາການຄຸ້ມຄອງກອງທຶນໄພພິບັດ ແລະນິຕິກໍາການຄຸ້ມຄອງນໍາໃຊ້ທີ່ດິນກະສິກໍາໃນໂອກາດ ດໍາເນີນກອງປະຊຸມສະໄໝ ສາມັນເທື່ອທີ 7 ສະພາປະຊາຊົນ ແຂວງສະຫວັນນະເຂດ ຊຸດທີ II ໃນລະຫວ່າງ ວັນທີ 24-26 ກໍລະ ກົດ 2024 ທີ່ຫໍວັດທະນະທໍາໄກ ສອນ ພົມວິຫານ. ຊຶ່ງບັນດາສະມາຊິກສະພາແຫ່ງຊາດເຂດເລືອກ ຕັ້ງທີ 13 ແລະສະມາຊິກສະພາປະ ຊາຊົນແຂວງປະຈໍາເຂດເລືອກຕັ້ງເມືອງ-ນະຄອນຕ່າງກໍ່ໄດ້ ພ້ອມກັນຄົ້ນຄວ້າປະກອບຄໍາຄິດ, ຄໍາເຫັນຢ່າງກົງໄປກົງມາລະອຽດຄົບຖ້ວນນີ້ກໍ່ເພື່ອເປັນການຈັດຕັ້ງປະຕິບັດມີປະສິດທິຜົນຊຶ່ງ ສສຊ/ສສຂໄດ້ຕັດສິນໃຈພິຈາລະນາ ລົງຄະແນນສຽງຢ່າງເປັນເອກະສັນ.

ຜ່ານຈາກການລົງຄະແນນສຽງໃນກອງປະຊຸມສະພາ ປະກົດວ່າ ສສຊ/ສສຂ ເຫັນດີຢ່າງເປັນເອກະພາບກັບເນື້ອໃນ ແລະກໍ່ສາມາດຮັບຮອງເອົາໄດ້ກ່ຽວກັບນິຕິກໍາໃຕ້ກົດໝາຍຂອງອົງການປົກຄອງແຂວງ ໃນນັ້ນຄື:ຮ່າງຂໍ້ຕົກລົງຂອງທ່ານເຈົ້າແຂວງສະຫວັນນະເຂດວ່າດ້ວຍການຄຸ້ມຄອງກອງທຶນໄພພິບັດຊຶ່ງໄດ້ນໍາເອົາຂຶ້ນມາສະເໜີ ໂດຍ ທ່ານ ນາງພາວັນ ບົວຫຼວງລາດ ຫົວໜ້າພະແນກແຮງງານສະຫວັດດີການສັງຄົມແຂວງດ້ວຍ ສສຊ/ສສຂ ທັງໝົດ 49 ທ່ານ ໃນນັ້ນເຫັນດີ 44 ທ່ານ. ກວມ 89,80% ແລະບໍ່ເຫັນດີ 4 ທ່ານ.ແລະຮ່າງນິຕິກໍາໃຕ້ກົດໝາຍ ຂໍ້ຕົກລົງວ່າດ້ວຍການຄຸ້ມຄອງແລະນໍາໃຊ້ທີ່ດິນກະສິກໍາ ຊຶ່ງທ່ານຮອງຫົວໜ້າພະແນກກະສິກໍາ ແລະປ່າໄມ້ແຂວງນໍາຂຶ້ນມາສະເໜີປະກົດວ່າຮັບຮອງຢ່າງເປັນເອກະສັນ ໃນນີ້ເຫັນດີ 41 ທ່ານ ກວມ 83,67%,ບໍ່ເຫັນດີ 7 ທ່ານ ຊຶ່ງຮ່າງນິຕິກໍານີ້ປະກອບມີ 9 ໝວດ ມີ 26 ມາດຕາ ເປັນອັນວ່າທັງສອງນິຕິກໍາແມ່ນອົງການປົກຄອງແຂວງໂດຍທ່ານເຈົ້າແຂວງສະຫວັນນະເຂດຈະລົງລາຍເຊັນ ແລະປະກາດໃຊ້ຢ່າງເປັນທາງການໃນອີກບໍ່ຊ້ານີ້. ຊຶ່ງພາຍຫຼັງທີ່ຈະລຽບລຽງຄໍາສັບແລະເນື້ອໃນບາງຄໍາຕື່ມເພື່ອສ້າງຄວາມເຂົ້າໃຈໃນສັງຄົມແຂວງສະຫວັນນະເຂດ.

แชร์