19 ປີ ໂຮງຮຽນອະນຸບານ-ປະຖົມ ຫຼວງປະເສີດ ເຕີບໃຫຍ່ພັດທະນາສ້າງບຸກຄະລາກອນ ມີຄຸນນະພາບ

ຕະຫຼອດໄລຍະ 19 ປີ ແຫ່ງການສ້າງຕັ້ງໂຮງຮຽນອະນຸບານ-ປະຖົມຫຼວງປະເສີດ ເປັນໂຮງຮຽນພາກເອກະຊົນ ທີ່ຈັດຕັ້ງການຮຽນການສອນຫຼັກສູດຂອງກະຊວງສຶກສາທິການ ແລະ ກິລາ (ສສກ) ໄດ້ມີການເຕີບໃຫຍ່ຂະຫຍາຍຕົວຢ່າງກວ້າງຂວາງ ແລະ ມີຄຸນນະພາບ ໂດຍສະເພາະຫຼາຍນ້ອງນັກຮຽນສາມາດສ້າງຜົນງານໄດ້ພົ້ນເດັ່ນດ້ວຍການຄວ້າ ຫຼຽນຄຳ ໃນສາຂາວິຊາ ຈິນຕະຄະນິດ ຫຼື ຄະນິດຄິດໄວ ໃນການແຂ່ງຂັນຊິງແຊ໋ມລະດັບນານາຊາດ ຈັດຂຶ້ນທີ່ປະເທດໄທ ເຖິງ 2 ຄັ້ງ ແລະ ຍັງສາມາດສອບເສັງນັກຮຽນເກັ່ງເປັນອັນດັບທີ 1 ທົ່ວເມືອງໄຊເຊດຖາອີກດ້ວຍ ຊຶ່ງໃນສົກຮຽນດັ່ງກ່າວ ໄດ້ສືບຕໍ່ມູນເຊື້ອແຜນຍຸດທະສາດຕ່າງໆ ໂດຍມີຄູສອນລະດັບສາກົນຈາກຕ່າງປະເທດ ຄຽງຄູ່ກັບການເປີດການຮຽນການສອນຫຼັກສູດ 3 ພາສາ ກໍຄືພາສາລາວ, ພາສາອັງກິດ ແລະພາສາຈີນ.

ເມື່ອວັນທີ 5 ສິງຫາ 2024, ທ່ານ ສົມມະໂນນຶກ ຫຼວງປະເສີດ ປະທານກຸ່ມໂຮງຮຽນອະນຸບານ-ປະຖົມ ຫຼວງປະເສີດ ທັງເປັນຜູ້ອໍານວຍການບໍລິສັດ ເອັດເຄ ສໍາຫຼວດອອກແບບ-ຮັບເໝົາກໍ່ສ້າງ ໄດ້ໃຫ້ສໍາພາດວ່າ: ໂຮງຮຽນອະນຸບານ-ປະຖົມ ຫຼວງປະເສີດ ກໍເປັນໂຮງຮຽນເອກະຊົນແຫ່ງໜຶ່ງທີ່ໄດ້ຮັບການສ້າງຕັ້ງຂຶ້ນ ແລະ ຈັດການຮຽນການສອນແຕ່ສົກຮຽນ 2005-2006 ເປັນຕົ້ນມາ ພາຍໃຕ້ການອະນຸມັດຂອງພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ຫ້ອງການສຶກສາທິການ ແລະ ກິລາ ເມືອງໄຊເສດຖາ ເພື່ອເປີດສອນຫຼັກສູດຊັ້ນອະນຸບານ ແລະ ປະຖົມ ທີ່ຕັ້ງຢູ່ບ້ານໂນນຄໍ້ເໜືອ, ເມືອງໄຊເສດຖາ, ນະຄອນຫຼວງວຽງຈັນ ໃນປັດຈຸບັນກ້າວເຂົ້າສູ່ປີທີ 19 ພໍດີ. ໃນເມື່ອກ່ອນໂຮງຮຽນຫຼັງນີ້ເປັນອາຄານຊັ້ນດຽວເປັນຮູບຕົວຢູ ມີເນື້ອທີ່ 1.730 ຕາແມັດ ເລີ່ມຕົ້ນເປີດຮຽນນັບແຕ່ຊັ້ນ ອະນຸບານ 1 ຮອດ ປ.3 ມີນັກຮຽນປະມານ 50 ນ້ອງ ແລະມາຮອດສົກຮຽນ 2007-2008 ຈຶ່ງສໍາເລັດການເປີດຮຽນຮອດ ປ.5 ເປັນປະຖົມສົມບູນ.

ມາເຖິງກາງປີ 2022 ທາງໂຮງຮຽນໄດ້ຕັດສິນໃຈເລີ່ມໂຄງການກໍ່ສ້າງອາຄານຮຽນຫຼັງໃໝ່ ແລະ ສໍາເລັດນໍາໃຊ້ອາຄານຮຽນຫຼັງໃໝ່ໃນຕົ້ນເດືອນສິງຫາ 2023 ແນ່ໃສ່ການພັດທະນາໂຮງຮຽນໃຫ້ກາຍເປັນໂຮງຮຽນທີ່ມີຄຸນນະພາບ, ເປັນບ່ອນຮຽນຮູ້ທີ່ທັນສະໄໝ, ປອດໄພ ແລະ ສະດວກສະບາຍ, ຕອບສະໜອງການພັດທະນາໃນຍຸກສະໄໝໃໝ່ຂອງການສຶກສາຊຶ່ງອາຄານຮຽນຫຼັງໃໝ່ນີ້ເປັນຕຶກອາຄານ 3 ຊັ້ນຖາວອນມີຫ້ອງຮັບໃຊ້ທັງໝົດ 26 ຫ້ອງ ແລະປັດຈຸບັນນຳໃຊ້ເປັນຫ້ອງຮຽນທັງໝົດ 17 ຫ້ອງ, ອະນຸບານ 7 ຫ້ອງ,ປະຖົມ 10 ຫ້ອງ ມີບຸກຄະລາກອນທັງໝົດ 36 ທ່ານ ເປັນຄູອາຈານທັງໝົດ 26 ທ່ານ ເປັນຍິງ 24 ທ່ານ, ມີນັກຮຽນທັງໝົດ 463 ນ້ອງ.

ທ່ານ ສົມມະໂນນຶກ ຫຼວງປະເສີດ ໃຫ້ຮູ້ອີກວ່າ: ໂຮງຮຽນຂອງພວກເຮົາແມ່ນໂຮງຮຽນສາມັນນໍາໃຊ້ຫຼັກສູດແຫ່ງຊາດຂອງກະຊວງ ສສກ, ຄຽງຄູ່ກັບການພັດທະນາການສຶກສາໃຫ້ມີຄວາມເຊື່ອມໂຍງກັບພາກພື້ນ ແລະ ສາກົນ ພວກເຮົາໄດ້ໃຫ້ຄວາມສຳຄັນເປີດກວ້າງການສຶກສາ ເພື່ອສົ່ງເສີມຄຸນນະພາບຂອງລູກ-ຫຼານນັກຮຽນເຮົາ ຊຶ່ງປັດຈຸບັນພວກເຮົາໄດ້ມີການພົວພັນຮ່ວມມືແລກປ່ຽນກັບສະຖາບັນຕ່າງປະເທດ ເຊັ່ນ: ປະເທດໄທ ແລະ ສປ ຈີນ. ໃນການຈັດການຮຽນການສອນຄຽງຄູ່ກັບຫຼັກສູດຂອງກະຊວງ ສສກ ກໍໄດ້ສົ່ງເສີມດ້ານພາສາຕ່າງປະເທດ ໃນນັ້ນ ພວກເຮົາໄດ້ນຳເອົາພາສາຈີນ ແລະ ພາສາອັງກິດ ປະກອບເຂົ້າໃນການຮຽນການສອນນັບແຕ່ຊັ້ນອະນຸບານຮອດປະຖົມ ປັດຈຸບັນກໍມີ ອາຈານຄົນລາວ, ອາຈານຄົນຈີນ, ອາຈານຄົນຝຣັ່ງ ແລະ ອາຈານຄົນຟີລິບປິນ ທີ່ເພີ່ນມີປະສົບການສູງຊ່ວຍສິດສອນໃນປັດຈຸບັນນີ້ ແລະ ເມື່ອຕົ້ນສົກຮຽນທີ່ຜ່ານມາ ພວກເຮົາກໍໄດ້ສຳເລັດໂຄງການທົດລອງ ແລະ ຮ່ວມມືກັບສະຖາບັນຈິນຕະຄະນິດປະເທດໄທ ໃນການທົດລອງຈັດຕັ້ງຫຼັກສູດຈິນຕະຄະນິດ ຫຼື ຄະນິດຄິດໄວ (ລູກຄິດຍີ່ປຸ່ນ) ເຂົ້າໃນການຈັດການຮຽນການສອນຂອງໂຮງຮຽນເຮົາ ກໍຖືວ່າໄດ້ຮັບໝາກຜົນເປັນຢ່າງດີ ທັງດ້ານວຽກງານວິຊາການ ແລະ ການເຄື່ອນ 5 ຫຼັກມູນການສຶກສາ.

ຜົນງານພົ້ນເດັ່ນຜ່ານມາທີ່ນ້ອງໆນັກຮຽນ ແລະຄູອາຈານພວກເຮົາພູມໃຈ ແລະ ດີໃຈກໍແມ່ນຜົນງານຈາກການເຂົ້າຮ່ວມແຂ່ງຂັນຈິນຕະຄະນິດຊີງແຊ໋ມພາກຕາເວັນອອກສຽງເໜືອ ຄັ້ງທີ 5 ຈັດຂຶ້ນທີ່ສູນປະຊຸມນານາຊາດຂອນແກ່ນປະເທດໄທ ໃນເດືອນກຸມພາ ໄດ້ນຳພານ້ອງນັກຮຽນເຂົ້າຮ່ວມທັງໝົດ 6 ນ້ອງຈາກ ປ.4/2 ແລະ ປ.5/4 ໃນນັ້ນ ສາມາດຍາດໄດ້ຂັນລາງວັນຊະນະເລີດ ຈຳນວນ 2 ນ້ອງ, ຮອງຊະນະເລີດ ຈໍານວນ 2 ນ້ອງ, ອັນດັບ 3 ຈໍານວນ 1 ນ້ອງ ແລະ ຫຼຽນຄຳ 1 ນ້ອງ ລວມ 6 ລາງວັນ ແລະ ການເຂົ້າຮ່ວມແຂ່ງຂັນຈິນຕະຄະນິດ ຊີງແຊ໋ມລະດັບນານາຊາດ ຄັ້ງທີ 2 ທີ່ຈັດຂຶ້ນໃນຕົ້ນເດືອນເມສາທີ່ຜ່ານມາ ພວກເຮົາກໍໄດ້ນຳພານ້ອງນັກຮຽນເຂົ້າຮ່ວມທັງໝົດ 8 ນ້ອງ ຈາກຊັ້ນອະນຸບານ 3, ປ.3, ປ.4 ແລະ ປ.5 ໃນນັ້ນ ກໍສາມາດຍາດໄດ້ຂັນລາງວັນຮອງຊະນະເລີດອັນ ຈຳນວນ 2 ນ້ອງ ແລະ ຫຼຽນຄໍາ 6 ນ້ອງ ລວມ 8 ລາງວັນ ແລະ ຜົນງານນັກຮຽນເກັ່ງຜ່ານມາ ພວກເຮົາກໍສາມາດສ້າງໄດ້ນັກຮຽນເກັ່ງຕິດອັນດັບທີ 1 ຂອງເມືອງໄຊເສດຖາ ວິຊາໂລກອອ້ມຕົວ ແລະ ຄະແນນ 38-39 ຫຼື 7 ຂຶ້ນ ເກືອບທຸກວິຊາໃນການສອບເສັງຈົບຊັ້ນແຕ່ລະສົກຮຽນ ໄດ້ຮັບການຍ້ອງຍໍຂັ້ນພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຂັ້ນເມືອງກໍມີຈຳນວນຫຼາຍພໍສົມຄວນໃນແຕ່ລະປີ.

ສ່ວນແຜນຮັບນັກຮຽນໃນສົກຮຽນ 2024-2025 ທີ່ຈະມາຮອດນີ້ ກໍໄດ້ກະກຽມຄວາມພ້ອມຂະຫຍາຍຫ້ອງຮຽນເພີ່ມອີກ 6 ຫ້ອງ ຊັ້ນປະຖົມ 4 ຫ້ອງ ແລະ ອະນຸບານ 2 ຫ້ອງ ເພື່ອກຽມຮອງຮັບຈໍານວນນັກຮຽນທີ່ລົງທະບຽນຈອງບ່ອນນັ່ງໄວ້ນັ້ນ ໃນເດືອນສິງຫານີ້ ກໍາລັງເປີດຮັບລົງທະບຽນນັກຮຽນໃໝ່ ຊຶ່ງຈໍານວນທີ່ພວກເຮົາຈະຮອງຮັບໄດ້ເພີ່ມອີກປະມານ 210 ນ້ອງ ປັດຈຸບັນກໍຖືວ່າມີນັກຮຽນທີ່ມາລົງທະບຽນແລ້ວເກືອບ 70% ແລະ ໃນທ້າຍເດືອນສິງຫາທີ່ຈະມາຮອດນີ້ ພວກເຮົາກໍກໍາລັງກະກຽມເປີດໂຮງຮຽນລ້ຽງເດັກ, ອະນຸບານ-ປະຖົມ ຫຼວງປະເສີດ ແຫ່ງທີ 2 ສາຂາເມືອງຫາດຊາຍຟອງ ຢ່າງເປັນທາງການ ຕັ້ງຢູ່ບ້ານນາໄຫ, ເມືອງຫາດຊາຍຟອງ ນະຄອນຫຼວງວຽງຈັນ.

ແນວໃດກໍດີ, ຄຽງຄູ່ກັບການຮຽນການສອນ ຫຼັກສູດ 3 ພາສາດັ່ງກ່າວ, ທາງໂຮງຮຽນຍັງມີນະໂຍບາຍໃຫ້ແກ່ນັກຮຽນຖ້າຈ່າຍເປັນເດືອນມີສ່ວນຫຼຸດ 10%, ຈ່າຍເຄິ່ງປີ ມີສ່ວນຫຼຸດ 15% ແລະຈ່າຍໝົດປີ ມີສ່ວນຫຼຸດ 20% ສະເພາະຜູ້ທີ່ມາລົງທະບຽນນັບແຕ່ມື້ນີ້ເຖີງ 29 ສິງຫາ 2024 ເປັນຕົ້ນໄປ.

ພາບ-ຂ່າວໂດຍ ສົງການ ພັນແພງດີ

แชร์