ເນື່ອງໃນໂອກາດວັນສ້າງຕັ້ງສື່ມວນຊົນ ແລະ ການພິມຈຳໜ່າຍທີ່ໝູນວຽນ ຄົບຮອບ 74 ປີ (13 ສິງຫາ 1950 - 13 ສິງຫາ 2024), ວັນທີ 8 ສິງຫາ 2024, ທ່ານ ປອ.ອາລຸນໄຊ ສູນນະລາດ ເຈົ້າແຂວງຈຳປາສັກ ພ້ອມຄະນະນຳແຂວງ, ການນໍາພະແນກການກ່ຽວຂ້ອງ ໄດ້ເຄື່ອນໄຫວພົບປະຢ້ຽມຢາມສະຖານີວິທະຍຸ, ໂທລະພາບ ແລະ ກອງສື່ສິ່ງພິມ ທີ່ຂຶ້ນພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງ ເພື່ອຊຸກຍູ້ຊີ້ນຳການຈັດຕັ່ງປະຕິບັດວຽກງານຂອງສື່ມວນຊົນໃຫ້ມີຜົນສໍາເລັດໃໝ່ໃຫຍ່ຫຼວງກວ່າເກົ່າ. ໃຫ້ກຽດຕ້ອນຮັບ ມີທ່ານ ປອ.ວັນນະໄຊ ຊາດຕະກຸນ ຫົວໜ້າພະແນກ ຖວທ ແຂວງ ພ້ອມດ້ວຍ ຄະນະນໍາ ຂະແໜງການຕ່າງໆພາຍໃນພະແນກ, ຄະນະນໍາ ແລະພະນັກງານວິຊາການກອງວິທະຍຸ - ໂທລະພາບ ແລະກອງສື່ສິ່ງພິມເຂົ້າຮ່ວມ.
ກ່ອນອື່ນ, ທ່ານ ປອ.ອາລຸນໄຊ ສູນນະລາດ ເຈົ້າແຂວງຈຳປາສັກພ້ອມຄະນະນຳແຂວງ,ການນໍາພະແນກການກ່ຽວຂ້ອງໄດ້ເຄື່ອນໄຫວຢ້ຽມຢາມຕິດຕາມເບີ່ງພື້ນຖານໂຄງລ່າງ, ອຸປະກອນເຕັກນິກ, ເຄື່ອງສົ່ງ, ຫ້ອງອ່ານຂ່າວ, ຫ້ອງຈັດລາຍການ, ຫ້ອງອອກອາກາດສົດ ແລະ ຫ້ອງເຕັກນິກ - ຈັດໜ້າຂອງກອງສື່ສິ່ງພິມ. ຈາກນັ້ນ, ກໍໄດ້ພົບປະໂອ້ລົມຄະນະນຳ ແລະ ພະນັກງານສື່ມວນຊົນ 3 ພາກສ່ວນຂອງແຂວງ ເຊິ່ງການພົບປະໂອ້ລົມຈັດຂຶ້ນຢູ່ຫ້ອງປະຊຸມສະຖານນີວິທະຍຸກະຈາຍສຽງແຂວງ. ໂອກາດນີ້, ທ່ານ ນະ ຂັນທະວົງ ຫົວໜ້າຄະນະບັນນາທິການກອງສື່ສິ່ງພິມ ໄດ້ຕາງໜ້າໃຫ້ການນໍາສື່ມວນຊົນແຂວງ ລາຍງານການເຄື່ອນໄຫວວຽກງານສື່ມວນຊົນໂດຍຫຍໍ້ ເຊິ່ງຍົກໃຫ້ເຫັນສະພາບລວມ, ດ້ານການຈັດຕັ້ງ ແລະການເຄື່ອນໄຫວວຽກງານວິຊາສະເພາະເຊິ່ງທັງຜົນງານດ້ານດີ, ດ້ານອ່ອນ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ ເພື່ອປັບປຸງແກ້ໄຂໃຫ້ດີຂຶ້ນໃນຕໍ່ໜ້າ.
ຕໍ່ມາ, ທ່ານ ປອ.ອາລຸນໄຊ ສູນນະລາດ ເຈົ້າແຂວງຈຳປາສັກ ກໍມີຄໍາເຫັນໂອ້ລົມ,ກ່ອນອື່ນທ່ານໄດ້ຫວນຄືນມູນເຊື້ອຂອງສື່ມວນຊົນລາວໂດຍຍົກໃຫ້ເຫັນປະຫວັດການເຄື່ອນໄຫວ, ມູນເຊື້ອອັນດີງາມຂອງສື່ມວນຊົນລາວ ແຕ່ອະດີດເຖິງປັດຈຸບັນ ຕິດພັນກັບຄວາມຈົງຮັກພັກດີ ແລະ ອຸດົມການທີ່ໜັກແໜ້ນ ພາຍໃຕ້ການນໍາພາຂອງພັກ ເພື່ອໃຫ້ການນໍາ ແລະ ພະນັກງານສື່ມວນຊົນແຂວງ ມີຄວາມຮັບຮູ້ເຂົ້າໃຈ ແລະ ເສີມຂະຫຍາຍມູນເຊື້ອອັນດີເລີດຂອງສື່ມວນຊົນລາວ ທັງເພີ່ມທະວີການປະຕິບັດໜ້າທີ່ຄວາມຮັບຊອບຂອງຕົນໃຫ້ສູງຂື້ນ ຕາມທີ່ພັກ - ລັດ ກໍຄືການຈັດຕັ້ງ ແລະ ປະຊາຊົນມອບໝາຍໃຫ້. ພ້ອມນີ້, ເຈົ້າແຂວງຍັງເນັ້ນໜັກໃຫ້ການນໍາສື່ມວນຊົນແຂວງ ເອົາໃຈໃສ່ຍົກສູງການນໍາພາວຽກງານດ້ານການເມືອງ - ແນວຄິດ, ສ້າງຄວາມເປັນແບບຢ່າງໃນການນໍາພາ - ຊີ້ນໍາ, ລົງໃກ້ສິດຕິດແທດກັບມະຫາຊົນ ແລະ ທ້ອງຖິ່ນຮາກຖານ ຕິດພັນກັບການແກ້ໄຂບັນຫາຕົວຈິງ ເພື່ອສ້າງໃຫ້ພະນັກງານພາຍໃນກົມກອງຂອງຕົນ ມີຄວາມເຊື່ອໝັ້ນຕໍ່ການນໍາພາ - ຊີ້ນໍາຂອງພັກ; ສືບຕໍ່ເພີ່ມທະວີຄວາມສາມັກຄີ ຕິດພັນກັບຄວາມເປັນເອກະພາບ ພາຍໃນຄະນະພັກ - ຕະນະນໍາ ໃຫ້ເປັນປຶກແຜ່ນແໜ້ນໜາ ໂດຍສະເພາະແມ່ນການກໍານົດທິດທາງໃນການເຄື່ອນໄຫວວຽກງານຕ່າງໆ ແລະ ການຈັດວາງບຸກຄະລາກອນ ກະກຽມໃຫ້ແກ່ກອງປະຊຸມໃຫຍ່ ຂອງພັກຂັ້ນຕົນ, ຄວາມເປັນເອກະພາບທາງດ້ານເສດຖະກິດ ຕ້ອງລະອຽດຈະແຈ້ງ, ເປີດເຜີຍ, ສາມາດກວດສອບໄດ້ ແລະ ມີຄວາມເປັນເອກະພາບໃນການຈັດວາງງົບປະມານ. ນອກນີ້ ກໍໃຫ້ເອົາໃຈໃສ່ເອົາໃຈໃສ່ປັບປຸງກົງຈັກການຈັດຕັ້ງ ໃຫ້ມີຄວາມໜັກແໜ້ນເຂັ້ມແຂງ. ສ່ວນວຽກງານວິຊາສະເພາະ ໃຫ້ເອົາໃຈໃສ່ບາງບັນຫາ, ໃນນັ້ນ, ວຽກງານກອງສື່ສິ່ງພິມ, ຕ້ອງມີຄໍລໍາມູນເຊື້ອຂອງສື່ມວນຊົນ, ການຈັດວາງໜ້າ ແລະ ຄໍລໍາໜັງສືພິມ, ແຍກຂ່າວທີ່ພົ້ນເດັ່ນໃນແຕ່ລະຂົງເຂດ ແລະ ຂອງທົ່ວສັງຄົມ, ຫົວໜ່ວຍທຸລະກິດ, ວຽກດີຄົນເດັ່ນ, ຄອບຄົວຕົວແບບ ເພື່ອນໍາສະເໜີຂ່າວ ໃຫ້ມີຄຸນນະພາບ ທັງດ້ານເນື້ອໃນ ແລະ ດ້ານຮູບການ ໃຫ້ອຸດົມສົມບູນ. ນອກນີ້ ກໍຊອກຄູ່ຮ່ວມງານໃນການຂຽນບົດ - ຂຽນຂ່າວ, ຊອກຫານັກຊີດນັກຂຽນທີ່ມາປະສົບການ, ມີຊື່ສຽງ ແລະ ມີຄວາມຊໍານານງານ ຂຽນຂ່າວບົດລໄງໜ້າໜັງສືພິມ ເພື່ອດຶງດູດຜູ້ອ່ານ. ການຂຽນຂ່າວ ຕ້ອງມີລັກສະນະວິເຄາະຂ່າວພ້ອມ, ສ້າງການຫັນປ່ຽນດ້ານເຕັກນິກໃນການຂຽນຂ່າວ. ສ່ວນສະຖານີວິທະຍຸ, ໃຫ້ເອົາໃຈໃສ່ເກັບກໍາຄື້ນຄວາມຖີ່ຂອງວິທະຍູກະຈາຍສຽງແຂວງ ກວມເອົາພື້ນທີ່ຂອງແຂວງຫຼາຍປານໃດ, ປັບປຸງລາຍການວິທະຍຸ ໃຫ້ມີລາຍການກ່ຽວກັບສຸຂະພາບ, ການຜະລິດ, ທຸລະກິດ, ລາຍການທໍາມະ ແລະ ລາຍການ ການນໍາພົບປະ ພໍ່ແມ່ປະຊາຊົນ, ຄົ້ນຄວ້າອຸປະກອນ, ເຕັກນິກ ແລະພາຫານະຮັບໃຊ້ ວຽກງານໃຫ້ພຽງພໍ.
ໂອກາດນີ້, ທ່ານເຈົ້າແຂວງຈຳປາສັກ ຍັງໄດ້ມອບເງິນ 220 ລ້ານກ່ວາກີບ ເເລະ ຄອມພິວເຕີ ໂນດບຸກ 1 ໜ່ວຍ ໃຫ້ສື່ມວນຊົນຄື: ວິທະຍຸ, ໂທລະພາບ ແລະໜັງສືພິມ ເພື່ອນຳໃຊ້ເຂົ້າໃນການປັບຸງພື້ນຖານເຕັກນິກ, ອຸປະກອບຮັບໃຊ້ ໃຫ້ສະດວກ, ວ່ອງໄວ ທັນສະໄໝ, ຕອບສະໜອງໄດ້ກັບຄວາມຮຽກຮ້ອງຕ້ອງການຂອງພັກ ໃນໄລຍະໃໝ່.
ໃນວັນດຽວກັນ, ຍັງມີກິດຈະກໍາແຂ່ງຂັນຟຸດຊໍມິດຕະພາບ ລະຫວ່າງ ການນໍາພະແນກ ຖວທ ແຂວງ ກັບ ບໍລິສັດ ເບຍລາວ ແຂວງຈໍາປາສັກ. ການແຊ່ງຂັນຈັດຂຶ້ນຢູ່ເດີ່ນຟຸດຊໍໂພນງານ ນະຄອນປາກເຊ ໂດຍການເຂົ້າຮ່ວມຂອງ ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ, ທ່ານ ປອ.ວັນນະໄຊ ຊາດຕະກຸນ ຫົວໜ້າພະແນກ ຖວທ ແຂວງ. ມີການນໍາ ແລະ ນັກກີລາທັງສອງຝ່າຍ ເຂົ້າຮ່ວມ. ຈຸດປະສົງ ກໍເພື່ອສ້າງຜົນງານ, ສ້າງຂະບວນການຕ້ອນຮັບວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ແຫ່ງຊາດລາວ ທີ່ໝູນວຽນ ຄົບຮອບ 74 ປີ (13 ສິງຫາ 1950 - 13 ສິງຫາ 2024) ໃຫ້ມີບັນຍາກາດຟົດຟື້ນ ແລະ ມີເນື້ອໃນຄວາມໝາຍເລິກເຊິ່ງ.
ຂ່າວ-ພາບ: ທູນທອງໃຈ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |