ກອງປະຊຸມຜູ້ບໍລິຫານການສຶກສາ ວິທະຍາສາດ ແລະ ກິລາ ປະຈຳສົກຮຽນ

ກອງປະຊຸມຜູ້ບໍລິຫານການສຶກສາ ວິທະຍາສາດ ແລະ ກິລາ ປະຈຳສົກຮຽນ 2023-2024 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 9 ສິງຫາ 2024 ທີ່ສູນຝຶກອົບຮົມ ICTC ນະຄອນຫຼວງວຽງຈັນ ໂດຍໃຫ້ກຽດເປັນປະທານຂອງທ່ານ ຮສ.ປອ ພຸດ ສິມມາລາວົງ ກຳມະການສູງກາງພັກ, ລັດຖະມົນຕີ ກະຊວງສຶກສາທິການ ແລະກິລາ, ມີທ່ານ ບຸນຕາ ເທບພະວົງ ປະທານກຳມະທິການວັດທະນະທຳ-ສັງຄົມ ສະພາແຫ່ງຊາດ ແລະທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ ພ້ອມດ້ວຍປະທານສະມາຄົມການສຶກສາພາກເອກະຊົນ, ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ 17 ແຂວງ ຕະຫຼອດຮອດຜູ້ບໍລິຫານການສຶກສາ, ວິທະຍາສາດ ແລະກິລາ ໃນຂອບເຂດທົ່ວປະເທດເຂົ້າຮ່ວມທັງເຊິ່ງໜ້າ ແລະ ລະບົບອອນລາຍ.

ໂອກາດນີ້, ທ່ານ ຮສ.ປອ ພຸດ ສິມມາລາວົງ ກ່າວວ່າ: ກອງປະຊຸມໃນເທື່ອນີ້ ຈະໄດ້ສຸມໃສ່ການຕີລາຄາການຈັດຕັ້ງປະຕິບັດສົກຮຽນ 2023-2024, ການຜັນຂະຫຍາຍມະຕິກອງປະຊຸມຄົບຄະນະຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ Xl ແລະ ພ້ອມກັນເອກະພາບວາງແຜນການຈັດຕັ້ງປະຕິບັດ ແນໃສ່ແກ້ໄຂບັນຫາການເຂົ້າຮຽນ, ການປະລະການຮຽນ, ການຂາດແຄນຄູສອນ ແລະ ປັບປຸງຄຸນນະພາບການສຶກສາ ໂດຍລວມແລ້ວການຈັດຕັ້ງປະຕິບັດສົກຮຽນຜ່ານມາ ເຖິງແມ່ນວ່າຈະດຳເນີນໄປໃນສະພາບທີ່ພວກເຮົາມີຄວາມຫຍຸ້ງຍາກທາງດ້ານເສດຖະກິດ-ການເງິນ, ງົບປະມານທີ່ຈັດໃຫ້ຂະແໜງການແມ່ນເທົ່າເກົ່າທຽບກັບປີຜ່ານມາ ອັດຕາເງິນເຟີ້ເພີ່ມຂຶ້ນ ເຮັດໃຫ້ການດຳລົງຊີວິດຂອງພະນັກງານ ຄູອາຈານໄດ້ຮັບຜົນກະທົບ ແຕ່ພວກເຮົາຍັງສາມາດຈັດຕັ້ງການຮຽນການສອນ ແຕ່ການສຶກສາກ່ອນໄວຮຽນ ເຖິງການສຶກສາຊັ້ນສູງໄດ້ເປັນປົກກະຕິ, ໄດ້ແກ້ໄຂບັນຫາການຂາດຄູ ໂດຍການໃຫ້ເງິນອຸດໜູນແກ່ຄູອາສາສະໝັກ, ຈຳນວນຫ້ອງຮຽນ ແລະ ຜູ້ຮຽນການສຶກສາກ່ອນໄວຮຽນໃນເຂດຕົວເມືອງເພີ່ມຂຶ້ນ, ຝຶກອົບຮົມຄູປະຈຳເພີ່ມຂຶ້ນ ໂດຍສະເພາະແມ່ນການນຳໃຊ້ຫຼັກສູດໃໝ່ຊັ້ນປະຖົມສຶກສາ, ຂະຫຍາຍຫ້ອງຮຽນສາມັນວິຊາຊີບໄປໂຮງຮຽນສາມັນກິນນອນຊົນເຜົ່າເປັນຕົ້ນ. ເຖິງຢ່າງໃດກໍຕາມ, ສົກຮຽນ 2023-2024 ຍັງສືບຕໍ່ປະເຊີນໜ້າກັບສິ່ງທ້າທາຍຫຼາຍຢ່າງ ເປັນຕົ້ນແມ່ນ ທ່າອ່ຽງຂໍອອກພັກອຸດໜູນເທື່ອດຽວເພີ່ມຂຶ້ນ, ບັນຫາການປະລະການຮຽນໃນຂັ້ນສາມັນສຶກສາ, ການເຂົ້າຮຽນໃນສະຖານອາຊີວະສຶກສາ ແລະ ການສຶກສາຊັ້ນສູງພາຍໃນປະເທດ, ສັງຄົມເລັ່ງທວງໃຫ້ປັບປຸງຄຸນນະພາບການສຶກສາ ແລະ ບັນຫາອື່ນໆ.

ສຳລັບກອງປະຊຸມຜູ້ລິຫານການສຶກສາ, ວິທະຍາສາດ ແລະ ກິລາ ປະຈຳສົກຮຽນ 2023-2024 ນີ້ ຈະໄດ້ດຳເນີນເປັນເວລາ 1 ວັນເຕັມ ຊຶ່ງຜູ້ແທນໃນກອງປະຊຸມຈະໄດ້ຮັບຟັງບົດສະຫຼຸບການຈັດຕັ້ງປະຕິບັດແຜນພັດທະນາຂະແໜງການສຶກສາແລະກິລາ ປະຈຳສົກຮຽນ 2023-2024 ແລະແຜນການປະຈຳສົກຮຽນ 2024-2025, ລາຍງານຜົນການຈັດຕັ້ງປະຕິບັດ ມະຕິກອງປະຊຸມຜູ້ບໍລິຫານການສຶກສາ ວິທະຍາສາດ ແລະ ກິລາ ປະຈຳສົກຮຽນ 2023-2024, ຮັບຟັງການປະກອບຄຳຄິດຄຳເຫັນຂອງກົມວິຊາການ ເພື່ອເນັ້ນໜັກການປະຕິບັດວຽກງານຈຸດສຸມສົກຮຽນ 2024-2025 ທີ່ເປັນຮູບປະທຳ ແລະ ໄດ້ຮັບຟັງຄຳເຫັນຂອງທ່ານປະທານກຳມະທິການວັດທະນະທຳ-ສັງຄົມ ສະພາແຫ່ງຊາດ. ນອກຈາກນີ້, ບັນດາຜູ້ບໍລິຫານການສຶກສາ, ວິທະຍາສາດ ແລະກິລາ ທົ່ວປະເທດ ຍັງຈະໄດ້ຮັບຟັງການໂອ້ລົມຈາກການນຳຂັ້ນສູງ ສປປ ລາວ ອີກດ້ວຍ.

ພາບ-ຂ່າວ ໂດຍ ສົງການ ພັນແພງດີນຈຸດສຸມສົກຮຽນ 2024-2025 ທີ່ເປັນຮູບປະທຳ ແລະ ໄດ້ຮັບຟັງຄຳເຫັນຂອງທ່ານປະທານກຳມະທິການວັດທະນະທຳ-ສັງຄົມ ສະພາແຫ່ງຊາດ. ນອກຈາກນີ້, ບັນດາຜູ້ບໍລິຫານການສຶກສາ, ວິທະຍາສາດ ແລະ ກິລາ ທົ່ວປະເທດ ຍັງຈະໄດ້ຮັບຟັງການໂອ້ລົມຈາກການນຳຂັ້ນສູງ ສປປ ລາວ ອີກດ້ວຍ.

ພາບ-ຂ່າວ ໂດຍ ສົງການ ພັນແພງດີ

แชร์