ທົບທວນຄືນການຊຸກຍຸ້ສົ່ງເສີມລ້ຽງໄກ່ລາດ ຢູ່ແຂວງສາລະວັນ

ກອງປະຊຸມ ປຶກສາຫາລືກແລກປ່ຽນຄວາມຄິດເຫັນ ແລະທົບທວນຄືນການຈັດຕັ້ງປະຕິບັດການຊຸກຍູ້ສົ່ງເສີມການລ້ຽງໄກ່ລາດ ຢູ່ເມືອງຄົງເຊໂດນ, ເມືອງລະຄອນເພັງ, ເມືອງເລົ່າງາມ ແລະ ເມືອງຕຸ້ມລານ ແຂວງສາລະວັນ ຈັດຂຶ້ນໃນວັນທີ 5 ສິງຫາ 2024 ຢູ່ຫ້ອງວ່າການເມືອງຄົງເຊໂດນ ໂດຍມີ ທ່ານ ສະໄໝ ໂພທິສານ ເຈົ້າເມືອງຄົງເຊໂດນ, ທ່ານນາງ ສອນທິດາ ອຸນາພົມ ຜູ້ອໍານວຍການ ບໍລິສັດ ພັດທະນາແຫລ່ງທ່ອງທ່ຽວຕາດເຍືອງ ຫລັກ 40 ເມືອງປາກຊ່ອງຈໍາກັດ, ມີຄະນະນໍາຈາກ ເມືອງລະຄອນເພັງ, ພ້ອມດ້ວຍພາກສ່ວນກຽວຂ້ອງ ແລະ ກຸ່ມການຜະລິດລ້ຽງໄກ່ລາດຂອງເມືອງຄົງເຊໂດນ ເຂົ້າຮ່ວມ ແລະ ແລກປ່ຽນຄວາມຄິດເຫັນຫລາຍບັນຫາ ທີ່ກ່ຽວ ຂ້ອງ, ຮັບຟັງຄວາມຄິດເຫັນ, ຄວາມຕ້ອງການ ຂອງອໍານາດການປົກຄອງບ້ານ ແລະ ປະຊາຊົນ ໂດຍເບື້ອງຕົ້ນໄດ້ເປັນເອກະພາບໃຫ້ອົງການປົກຄອງບ້ານ ນໍາເອົາເນື້ອໃນຈິດໃຈ ການຊຸກຍູ້ການລ້ຽງໄກ່ລາດ ຂອງບໍລິສັດໄປເຜີຍແຜ່ໃຫ້ປະຊາຊົນທີ່ບໍ່ໄດ້ເຂົ້າຮ່ວມໃຫ້ຮັບຮູ້.

ສະເພາະຢູ່ເມືອງຄົງເຊໂດນ, ບໍລິສັດ ພັດທະນາແຫລ່ງທ່ອງທ່ຽວ ຕາດເຍືອງ ຫລັກ 40 ເມືອງປາກຊ່ອງຈໍາກັດ ໄດ້ສົ່ງເສີມ, ຍົກລະດັບການລ້ຽງໄກ່ລາດ ເຊິ່ງຜ່ານການຈັດຕັ້ງປະຕິບັດໃນໄລຍະຜ່ານມາ ເຫັນວ່າ ການນຳຂັ້ນເມືອງໄດ້ລົງປຶກສາຫາລືກັບບັນດາບ້ານເປົ້າໜາຍທີ່ຈະລ້ຽງໄກ່ 5 ບ້ານຄື: ບ້ານໂນນຄໍ້ ມີ 5 ຄອບຄົບ, ບ້ານສົມສະອາດ 8 ຄອບຄົວ, ບ້ານກຸດມີໄຊ 8 ຄອບຄົວ, ບ້ານໜອງສະຟັງ 6 ຄອບຄົວ ແລະ ບ້ານທົ່ງຈະເລີນ 6 ຄອບຄົວ. ນອກນັ້ນ, ກໍໄດ້ເອົາບ້ານທີ່ມີຄວາມພ້ອມເຂົ້າຮັບຟັງແຜນການຕ່າງໆຂອງການນຳຂັ້ນເມືອງ, ນະໂຍບາຍຕ່າງໆຂອງບໍລິສັດ ແລະ ຂອງທະນະຄານທີ່ຈະສະໜອງທຶນລ້ຽງໄກ່ລາດ, ເຫັນວ່າຫລາຍຄອບຄົວຫ້ຄວາມສົນໃຈກັບນະໂຍ ບາຍ ແລະ ຮູບແບບໃນການຈັດຕັ້ງປະຕິບັດຂອງບໍລິສັດ.

ມາຮອດປັດຈຸບັນ, ພາກສ່ວນກ່ຽວຂ້ອງຂອງເມືອງ ກໍາລັງສຸມໃສ່ໃນການຊຸກຍູ້ສົ່ງເສີມພໍ່ແມ່ປະຊາຊົນໃຫ້ລ້ຽງໄກ່ລາດ ເພື່ອຕອບສະໜອງຄວາມຕ້ອງການວັດຖຸດິບ(ໄກ່ລາດ) ໃຫ້ແກ່ການຜະລິດປິ້ງໄກ່ນາປົ່ງ ເຊິ່ງເປັນຜະ ລິດຕະພັນທີ່ເປັນເອກະລັກ ແລະ ມີຊື່ສຽງຂອງແຂວງສາລະວັນ ໂດຍບໍລິສັດຈະໃຫ້ການສະໜັບສະໜູນ ດ້ານເຕັກນິກວິຊາການ, ຊຸກຍູ້ສົ່ງເສີມໃຫ້ພໍ່ແມ່ປະຊາຊົນທັງ 5 ບ້ານ. ທັງນີ້ ກໍເພື່ອສົ່ງເສີມອາຊີບທີ່ເປັນມູນເຊື້ອ, ສ້າງວຽກເຮັດ ແລະ ສ້າງລາຍໄດ້ໃຫ້ປະຊາຊົນ ໄປຄຽງຄູ່ກັບການເຊື່ອມໂຍງ ວົງຈອນການທ່ອງທ່ຽວ ລະຫວ່າງ ແຂວງພາກໃຕ້ ຈໍາປາສັກ-ສາລະວັນ ແລະ ກະກຽມຄວາມພ້ອມ ຮອບດ້ານ ໃນການຕ້ອນຮັບນັກທ່ອງທ່ຽວ ທັງພາຍໃນ ແລະຕ່າງປະເທດ ທີ່ຈະເດີນທາງມາທ່ອງທ່ຽວ ສປປ ລາວ ກໍຄື ບັນດາແຂວງພາກໃຕ້.

ພ້ອມກັນນີ້,ຢູ່ເມືອງລະຄອນເພັງ, ເມືອງເລົ່າງາມ ແລະເມືອງຕຸ້ມລານ ກໍໄດ້ສຸມໃສ່ໃນການຊຸກຍູ້ສົ່ງເສີມພໍ່ແມ່ປະຊາຊົນໃຫ້ລ້ຽງໄກ່ລາດ, ເພາະພັນໄກ່, ການສະໜອງແນວພັນ ເພື່ອຕອບສະໜອງຄວາມຕ້ອງການວັດຖຸດິບ (ໄກ່ລາດ) ໃຫ້ແກ່ການຜະລິດປິ້ງໄກ່ນາປົ່ງໃຫ້ຫລາຍຂຶ້ນກວ່າເກົ່າ. ທັງເປັນການຟື້ນຟູຄືນຕົ້ນກໍາເນີດໄກ່ພື້ນເມືອງທີ່ເປັນເອກະລັກແບບຍືນຍົງ ແລະຊ່ວຍໃຫ້ປະຊາຊົນມີອາຊີບທີ່ແນ່ນອນ ແລະມີລາຍຮັບທີ່ໝັ້ນຄົງ.

แชร์