ແກ້ວ, ເສດແກ້ວ ກາຍເປັນສິ່ງທີ່ມີຄ່າ ແລະສ້າງລາຍໄດ້ໃຫ້ປະຊາຊົນແຂວງອຸດົມໄຊ

ອົງການພັດທະນາ ແລະບໍລິຫານຕົວເມືອງ ແລະບໍລິສັດ ແພຣຄັລແລັດ ຈຳກັດ ໄດ້ຮ່ວມກັນລົງນາມ ເຊັນສັນຍາຮັບຊື້ - ຂາຍ ແກ້ວ, ເສດແກ້ວ ຢູ່ແຂວງອຸດົມໄຊ, ພິທີໄດ້ຈັດຂຶ້ນໃນວັນທີ 8 ສິງຫານີ້ ທີ່ແຂວງດັ່ງກ່າວ.

ຕາມເນື້ອໃນສັນຍາ ຝ່າຍ ອົງການພັດທະນາ ແລະບໍລິຫານຕົວເມືອງ ແມ່ນເປັນຜູ້ຈັດຫາແກ້ວ ແລະ ເສດແກ້ວ ຈາກແຫຼ່ງຕ່າງໆພາຍໃນແຂວງອຸດົມໄຊ ໂດຍໃຫ້ຄັດແຍກບໍ່ໃຫ້ມີສິ່ງເຈືອປົນຕ່າງໆຢູ່ນຳແກ້ວ ເກີນການກຳນົດຄຸນສົມບັດຕາມທີ່ກຳນົດໄວ້ ພ້ອມທັງແຍກສີຂອງແກ້ວເຊັ່ນ: ສີຂາວ, ສີຂຽວ, ສີແດງ, ທັບ ແລະ ບົດ ແລ້ວບັນຈຸລົງໃນພາຊະນະທີ່ກຳນົດໄວ້ ເພື່ອຂາຍໃຫ້ແກ່ບໍລິສັດ ພຽງຜູ້ດຽວເທົ່ານັ້ນ ດ້ວຍມູນຄ່າສັນຍາຮັບຊື້ ແມ່ນ ລາຄາ 1,000 ກີບ/ກິໂລກຣາມ ຫຼື 1,50ບາດ/ກິໂລກຣາມ ໂດຍໃຊ້ເງິນບາດໄທເປັນໂຕກຳນົດລາຄາ. ພ້ອມນີ້ ທາງບໍລິສັດຍັງໄດ້ສະໜັບສະໜູນໃຫ້ແກ່ ອົງການພັດທະນາ ແລະ ບໍລິຫານຕົວເມືອງ ໃນການລົງປະຊາສຳພັນ, ໂຄສະນາໃຫ້ປະຊາຊົນໃນທົ່ວແຂວງອຸດົມໄຊ ໃຫ້ຄັດແຍກແກ້ວ, ເສດແກ້ວ ທີ່ບໍ່ໃຊ້ງານ ນໍາມາຂາຍໃຫ້ພາກສ່ວນກ່ຽວຂ້ອງ ຢູ່ສະໜາມຖິ້ມຂີ້ເຫຍື້ອຫຼັກ 8 ຫຼື ຈຸດອື່ນໆທີ່ໄດ້ຕົກລົງກັນໃນຕໍ່ໜ້າ. ເຊິ່ງສັນຍາແມ່ນໄດ້ກໍານົດເວລາ 01 ປີ ນັບແຕ່ວັນລົງງລາຍເຊັນເປັນຕົ້ນໄປ.

ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ຜູ້ຊີ້ນຳວຽກງານອົງການພັດທະນາ ແລະ ບໍລິຫານຕົວເມືອງ ກ່າວວ່າ: ການເຊັນສັນຍາຮັບຊື້ - ຂາຍແກ້ວ, ເສດແກ້ວ ຢູ່ແຂວງອຸດົມໄຊຄັ້ງນີ້ ເປັນໂຄງການໜຶ່ງທີ່ມີຄວາມສຳຄັນ ເພື່ອແນໃສ່ອະນຸລັກສະພາບແວດລ້ອມ ໂດຍສະເພາະແມ່ນບັນດາເສດແກ້ວ ເຊິ່ງໄລຍະຜ່ານມາເປັນພຽງເສດຂີ້ເຫຍື້ອ ຫລື ສິ່ງເສດເຫຼືອຕາມບ້ານເຮືອນ ປັດຈຸບັນໄດ້ກາຍເປັນສິ່ງທີ່ມີຄຸນຄ່າ ສ້າງລາຍໄດ້ໃຫ້ແກ່ປະຊາຊົນ ທັງເປັນການກໍາຈັດ ສ້າງໃຫ້ສະພາບແວດລ້ອມດີຂຶ້ນ. ຂະນະດຽວກັນ ທ່ານຮອງເຈົ້າແຂວງຍັງໄດ້ເນັ້ນໃຫ້ທັງສອງຝ່າຍປະຕິບັດຕາມສັນຍາທີ່ໄດ້ລົງນາມຮ່ວມກັນຢ່າງເຂັ້ມງວດເພື່ອແນໃສ່ເຮັດໃຫ້ໄດ້ຮັບຜົນສຳເລັດຕາມຈຸດປະສົງເປົ້າໝາຍທີ່ສອງຝ່າຍໄດ້ລົງນາມຮ່ວມກັນ.ຂ່າວ: ໄມພອນ

แชร์