ລັດຖະບານລາວ ແລະ ຍີ່ປຸ່ນ ເສີມຂະຫຍາຍສາຍພົວພັນມິດຕະພາບ ແລະການຮ່ວມມື

ໃນວັນທີ 8 ສິງຫານີ້ ທີ່ຫ້ອງວ່າການສໍານັກງານນາຍົກລັດຖະມົນຕີ, ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ໄດ້ສົນທະນາທາງໂທລະສັບກັບ ພະນະທ່ານ ກິຊິດະ ຟຸມິໂອະ (KISHIDA Fumio) ນາຍົກລັດຖະມົນຕີ ແຫ່ງ ປະເທດຍີ່ປຸ່ນ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ, ຖານເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.

ໃນການພົບປະສົນທະນາທາງໄກຄັ້ງນີ້, ສອງຝ່າຍໄດ້ສະແດງຄວາມປິຕິຍິນດີທີ່ໄດ້ມີໂອກາດປຶກສາຫາລື ແລະ ແລກປ່ຽນຄຳຄິດເຫັນໃນການເສີມຂະຫຍາຍການພົວພັນຮ່ວມມືລະຫວ່າງສອງປະເທດ ຊຶ່ງສອງຜູ້ນຳໄດ້ເຫັນດີເປັນເອກະພາບຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ຍີ່ປຸ່ນ ໃນໄລຍະເກືອບ 70 ປີ ທີ່ສືບຕໍ່ໄດ້ຮັບການເພີ່ມພູນຄູນສ້າງເປັນກ້າວໆມາ ແລະ ເຫັນດີຈະຮ່ວມກັນຈັດບັນດາກິດຈະກຳຕ່າງໆ ເພື່ອສະເຫຼີມສະຫຼອງ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ແລະ ຄົບຮອບ 10 ປີ ແຫ່ງການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ໃນປີ 2025 ແລະ ສອງຝ່າຍ ຍັງໄດ້ປຶກສາຫາລືກັນ ເພື່ອສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນຂຶ້ນສູ່ລະດັບໃໝ່ໃນຕໍ່ໜ້າ, ສືບຕໍ່ຊຸກຍູ້ ແລະ ສົ່ງເສີມການພົວພັນຮ່ວມມືໃນຫຼາຍດ້ານ ເປັນຕົ້ນ ເສດຖະກິດ, ການຄ້າ, ການລົງທຶນ, ການທ່ອງທ່ຽວ ແລະ ສືບຕໍ່ຊຸກຍູ້ການເປີດຖ້ຽວບິນໂດຍກົງ (Charter flight) ເພື່ອສົ່ງເສີມການແລກປ່ຽນໄປມາຫາສູ່ຂອງປະຊາຊົນສອງຊາດ ໃຫ້ມີບັນຍາກາດຟົດຟື້ນ ໂດຍສະເພາະໃນໂອກາດປີທ່ອງທ່ຽວລາວ 2024, ທັງເປັນການເພີ່ມໂອກາດໃຫ້ນັກທຸລະກິດ-ນັກລົງທຶນ ຍີ່ປຸ່ນ ໄດ້ມາຊອກຫາຊ່ອງທາງການຮ່ວມມືທາງດ້ານເສດຖະກິດເພີ່ມຕື່ມ. ພ້ອມນີ້, ຝ່າຍລາວຍັງໄດ້ສະແດງຄວາມພ້ອມທີ່ຈະໄດ້ເປັນກຽດຕ້ອນຮັບ ພະນະທ່ານ ກິຊິດະ ຟຸມິໂອະ ພ້ອມດ້ວຍຄະນະຜູ້ແທນຂັ້ນສູງ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ແລະ ກອງປະຊຸມອື່ນໆທີ່ກ່ຽວຂ້ອງ ທີ່ນະຄອນຫຼວງວຽງຈັນ ໃນເດືອນຕຸລາ 2024 ນີ້, ພ້ອມທັງໃຫ້ການສະໜັບສະໜູນຕໍ່ຂໍ້ສະເໜີຂອງຝ່າຍຍີ່ປຸ່ນ ກ່ຽວກັບການຈັດກອງປະຊຸມສຸດຍອດຂອງປະຊາຄົມອາຊີ ເພື່ອຫຼຸດຜ່ອນການປ່ອຍອາຍພິດໃຫ້ເຫຼືອສູນ (Asia Zero Emission Community - AZEC) ຄັ້ງທີ 2 ໃນໂອກາດດຽວກັນກັບການຈັດກອງປະຊຸມສຸດຍອດອາຊຽນ ເດືອນຕຸລາ 2024 ຊຶ່ງຝ່າຍຍີ່ປຸ່ນ ເຫັນວ່າ ສປປ ລາວ ມີທ່າແຮງດ້ານການຜະລິດພະລັງງານທົດແທນ-ພະລັງງານສະອາດ ແລະ ຈະເປັນການດຶງດູດນັກລົງທຶນຕ່າງປະເທດເຂົ້າມາລົງທຶນໃນດ້ານນີ້ຢູ່ ສປປ ລາວ ຫຼາຍຂຶ້ນ. ໃນຂະນະດຽວກັນ, ຝ່າຍຍີ່ປຸ່ນໄດ້ເຊື້ອເຊີນພະນະທ່ານນາຍົກລັດຖະມົນຕີລາວ ເດີນທາງໄປຢ້ຽມຢາມ ປະເທດຍີ່ປຸ່ນ ໃນຕົ້ນປີ 2025 ເພື່ອເປັນການເປີດປີແຫ່ງການສະເຫຼີມສະຫຼອງສາຍພົວພັນການທູດລາວ ແລະຍີ່ປຸ່ນ ຄົບຮອບ 70 ປີ.

ການສົນທະນາຄັ້ງນີ້ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະສະໜິດສະໜົມກັນເປັນຢ່າງດີອັນໄດ້ສ່ອງແສງໃຫ້ເຫັນເຖິງສາຍພົວພັນມິດຕະພາບ ແລະການຮ່ວມມືອັນດີງາມທີ່ມີມາແຕ່ດົນນານກໍຄືການເປັນຄູ່ຮ່ວມຍຸດທະສາດຂອງສອງປະເທດ ສປປ ລາວແລະຍີ່ປຸ່ນທີ່ນັບມື້ໄດ້ຮັບການເພີ່ມພູນຄູນສ້າງໃຫ້ຂະຫຍາຍຕົວຢ່າງບໍ່ຢຸດຢັ້ງ.

ຂ່າວ-ພາບ: ກະຊວງການຕ່າງປະເທດ

แชร์