ລັດຖະບານລາວ ຮ່ວມຮຸ້ນສ້າງຕັ້ງທະນາຄານຄຳ ສ້າງຄວາມເຂັ້ມແຂງໃຫ້ເງິນກີບ

ພິທີເຊັນສັນຍາຮ່ວມຮຸ້ນເພື່ອສ້າງຕັ້ງທະນາຄານຄຳລາວຈໍາກັດລະຫວ່າງລັດຖະບານ ແຫ່ງ ສປປ ລາວ ຕາງໜ້າເຊັນໂດຍທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ແລະທ່ານ ຈັນທອນ ສິດທິໄຊ ປະທານ ແລະ ຜູ້ກໍ່ຕັ້ງບໍລິສັດ PTL Holding ຈຳກັດ ໂດຍມີ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດໃຫ້ກຽດເຂົ້າຮ່ວມໄດ້ຈັດຂຶ້ນໃນວັນທີ 7 ສິງຫາ 2024 ທີ່ນະຄອນຫລວງວຽງຈັນ, ຈຸດປະສົງເພື່ອຮັບປະກັນຄວາມໝັ້ນຄົງ ແລະ ສ້າງສະຖຽນລະພາບດ້ານເສດຖະກິດຂອງປະເທດ ທີ່ຈະສາມາດປົດລັອກທ່າແຮງທາງດ້ານການເງິນ, ການຄັງ, ສ້າງຄວາມເຂັ້ມແຂງໃຫ້ສະກຸນເງິນກີບ, ການລະດົມທຶນ ແລະເສີມສ້າງສະພາບຄ່ອງ ເພື່ອເຂົ້າມາໝຸນໃຊ້ສ້າງສາພັດທະນາປະເທດຊາດໃຫ້ໄດ້ຢ່າງມີປະສິດທິພາບ ແລະ ເກີດຜົນປະໂຫຍດສູງສຸດຕໍ່ກັບເສດຖະກິດຂອງປະເທດ.

ການສ້າງຕັ້ງ ແລະໃຫ້ບໍລິການທະນາຄານຄຳນີ້ຈະສາມາດພັດທະນາຍົກລະດັບການຄຸ້ມຄອງບໍລິຫານຈັດການຄຳຂອງ ສປປ ລາວ ໃຫ້ໄດ້ມາດຕະຖານກາຍເປັນທີ່ຍອມຮັບ ແລະ ສາມາດແຂ່ງກັນໄດ້ກັບພາກພື້ນ ແລະສາກົນຜ່ານບັນດາກົນໄກການບໍລິການຕ່າງໆຂອງທະນາຄານຄຳເປັນຕົ້ນແມ່ນບັນຊີຝາກຄຳ, ສິນເຊື່ອການໃຫ້ກູ້ເງິນ ແລະ ຄຳ, ການຢັ້ງຢືນຮັບຮອງຍົກລະດັບມາດຕະຖານຄຸນນະພາບຄຳ ໃຫ້ເປັນລະດັບສາກົນ.

ສປປ ລາວ ເປັນໜຶ່ງໃນປະເທດອັນດັບຕົ້ນໆຂອງໂລກດ້ານການຂຸດຄົ້ນ ແລະ ຜະລິດຄຳ; ເປັນອັນດັບ 3 ຂອງ ASEAN ແລະ ອັນດັບ 6 ໃນທະວີບອາຊີ, ຜ່ານການສໍາຫຼວດເບື້ອງຕົ້ນ ເຊິ່ງຄາດຄະເນວ່າ ມີເເຮ່ຄໍາທີ່ຍັງບໍ່ໄດ້ຖືກຂຸດຄົ້ນ ປະມານ 500-1,000 ໂຕນ ແລະ ຫາກໄດ້ຮັບການອອກໃບຢັ້ງຢືນບົດລາຍງານເຊິ່ງຮັບຮອງຈາກສາກົນ ໂດຍສະເພາະໜ່ວຍງານສຶກສາສໍາຫຼວດບໍ່ແຮ່ທີ່ກ່ຽວຂ້ອງແລ້ວນັ້ນ, ຈະສາມາດປະເມີນມູນຄ່າມາເພີ່ມທະວີ ປະລິມານຄັງສຳຮອງພາຍໃນປະເທດໄດ້ເຖິງ 50 - 76 ຕື້ ໂດລາເພື່ອເພີ່ມສະພາບຄ່ອງດ້ານການເງິນ ແລະເປັນແຫລ່ງທຶນຮອນເຂົ້າມານຳໃຊ້ໃນການພັດທະນາບັນດາໂຄງການຍຸດທະສາດດ້ານພື້ນຖານໂຄງລ່າງ, ກະສິກຳ ແລະອຸດສາຫະກຳ ທີ່ສຳຄັນຈຳເປັນໃນການສ້າງພື້ນຖານທີ່ເຂັ້ມແຂງ ແລະຄວາມໝັ້ນຄົງໃຫ້ແກ່ລະບົບເສດຖະກິດຂອງປະເທດໃຫ້ນັບມື້ນັບຈະເລີນກ້າວໜ້າ.

แชร์