ປກສ ເມືອງຫຼວງນໍ້າທາ ກັກຜູ້ຖືກຫາ 4 ຄົນ ພ້ອມຢາບ້າ 212 ເມັດ

ທ້າຍເດືອນ ກໍລະກົດ 2024 ນີ້ເຈົ້າໜ້າທີ່ພະແນກຕໍາຫຼວດ ກອງບັນຊາການ ປກສ ເມືອງຫຼວງນໍ້າທາ ແຂວງຫຼວງນໍ້າທາ ໄດ້ຮັບແຈ້ງຈາກພົນລະເມືອງດີວ່າ: ມີກຸ່ມຄົນບໍ່ດີເຄື່ອນໄຫວ ຄ້າ-ຂາຍ ແລະ ມົ້ວສຸມຢາເສບຕິດ ຢູ່ຂອບເຂດ ບ້ານຫາດຍາວ, ບ້ານສົບຕຸດ ເມືອງ ແລະ ແຂວງຫຼວງນໍ້າທາ. ຫຼັງຈາກນັ້ນ, ທາງເຈົ້າໜ້າທີ່ພະແນກວິຊາສະເພາະ ກໍ່ໄດ້ລົງສົມທົບກັບ ປກສ ກຸ່ມບ້ານທົ່ງໄຈ້ ລົງກວດກາ ຕິດຕາມ ແລະ ສາມາດກັກຜູ້ຖືກຫາໄດ້ 04 ຄົນຄື: ທ້າວ ສຸກ ອາຍຸ 25 ປີ ປະຊາຊົນ ຢູ່ບ້ານນໍ້າດີ ພ້ອມຂອງກາງຢາເສບຕິດ ປະເພດຢາບ້າ ຈໍານວນ 87 ເມັດ; ທ້າວ ຄໍາສຸກ ອາຍຸ 30 ປີ ປະຊາຊົນ ຢູ່ ບ້ານສົບຕຸດ ພ້ອມຂອງຢາບ້າ 07 ເມັດ; ນາງ ນໍ້າ ອາຍຸ 40 ປີ ປະຊາຊົນ ຢູ່ ບ້ານສົບຕຸດ ພ້ອມຂອງກາງຢາບ້າ 111 ເມັດ ແລະ ໄດ້ກັກຕົວ ທ້າວ ບຸນປັນ ອາຍຸ 47 ປີ ປະຊາຊົນ ຢູ່ ບ້ານນາໂຮມ (ນໍ້າກ້ອຍ) ພ້ອມຂອງກາງຢາບ້າ 07 ເມັດ ພວກກ່ຽວທັງ 04 ຄົນ ແມ່ນຢູ່ ເມືອງຫຼວງນ້ຳທາ ແຂວງຫຼວງນໍ້າທາ.

ຜ່ານການສອບສວນຂອງເຈົ້າໜ້າທີ່ຕໍາຫຼວດ ພວກກ່ຽວທັງ 04 ຄົນ ໄດ້ຮັບສາລະພາບວ່າ: ຢາເສບຕິດທີ່ທາງເຈົ້າໜ້າທີ່ກວດພົບ ແມ່ນຂອງພວກກ່ຽວແທ້ ເຊິ່ງໄດ້ພົວພັນຊື້ນຳຄູ່ຮ່ວມຂະບວນການດຽວກັນ ເພື່ອນໍາມາເສບ ແລະ ຂາຍຍ່ອຍ. ປັດຈຸບັນ ພວກກ່ຽວທັງ 04 ຄົນ ພ້ອມຂອງກາງຢາບ້າ 212 ເມັດ ແມ່ນໄດ້ມອບໃຫ້ພາກສ່ວນທີ່ກ່ຽວຂ້ອງກອງບັນຊາການ ປກສ ແຂວງ ກັກຂັງໄວ້ຢູ່ ຄ້າຍຄຸມຂັງ-ດັດສ້າງ ປກສ ແຂວງ ເພື່ອສືບຕໍ່ສອບສວນຂະຫຍາຍຜົນຫາກຸ່ມແກ້ງ, ພັກພວກ ມາດຳເນີນຄະດີຕາມລະບຽບກົດໝາຍ.
ຂ່າວ: ປກສ ເມືອງຫຼວງນໍ້າທາ

แชร์