ທຫລ ມອບບັດໃຫ້ສະມາຊິກພັກ

  ອົງຄະນະພັກທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງການມອບ-ຮັບບັດ ສະມາຊິກພັກ ຄັ້ງທີ VII ໃຫ້ບັນດາສະມາຊິກພັກຜູ້ທີ່ມີເງື່ອນໄຂ, ມາດ ຖານຄົບຖ້ວນຂຶ້ນໃນວັນທີ 9 ເມສາ 2019 ທີ່ສະໂມສອນສະຖາບັນການທະນາຄານໂດຍການໃຫ້ກຽດມອບຂອງສະຫາຍ ນາງ ວັດທະນາ ດາລາລອຍ ຄະນະປະຈໍາພັກ, ຮອງຜູ້ວ່າການ ທຫລ ພ້ອມນີ້, ກໍ່ມີບັນດາຄະນະພັກ, ຄະນະພັກຮາກຖານ-ຄະນະໜ່ວຍພັກຮາກຖານ ແລະຕາງໜ້າບັນດາສະຫາຍສະມາຊິກພັກອົງຄະນະພັກ ທຫລ ເຂົ້າຮ່ວມ.

ສະຫາຍ ພານຸສັກ ແກ່ນວົງພະຈັນ ຄະນະພັກ-ຫົວໜ້າກົມຈັດຕັ້ງ ແລະພະນັກງານ ທຫລ ໄດ້ຜ່ານບົດສະຫຼຸບສະພາບການຈັດຕັ້ງປະຕິບັດວຽກງານການອອກບັດ-ມອບບັດໃຫ້ສະມາຊິກພັກສົມບູນຢູ່ອົງຄະນະພັກ ທຫລ ຄັ້ງທີ VII ຊຶ່ງເປັນການປະຕິບັດຕາມມະຕິຕົກລົງຂອງກົມການເມືອງສູນກາງພັກເລກທີ 020 ແລະ ແຈ້ງການຂອງຄະນະຈັດຕັ້ງສູນກາງພັກເລກທີ 02 ກ່ຽວກັບການຈັດຕັ້ງປະຕິບັດວຽກງານການອອກບັດ-ມອບບັດໃຫ້ສະມາຊິກພັກສົມບູນໂດຍສະເພ າະແມ່ນອີງໃສ່ການຈັດຕັ້ງປະຕິບັດວຽກງານການອອກບັດ-ມອບບັດໃຫ້ສະມາຊິກພັກສົມບູນຢູ່ອົງຄະນະພັກ ທຫລ ຄັ້ງທີ VII ຊຶ່ງທົ່ວອົງຄະນະພັກ ທຫລ ປະ ກອບດ້ວຍ 20 ໜ່ວຍພັກຮາກຖານ ແລະ 5 ຄະນະພັກຮາກຖານທີ່ມີ 32 ໜ່ວຍພັກຂຶ້ນກັບ; ມີສະມາຊິກພັກທັງໝົດ 850 ສະຫາຍ (ຍິງ358 ສະຫາຍ) ໃນນີ້ສໍາຮອງ 70 ສະຫາຍ (ຍິງ 34 ສະຫາຍ). ສຳລັບສະມາຊິກພັກສົມບູນທີ່ອອກບັດໃຫ້ແລ້ວກວມ 80,38% ຂອງຈໍານວນສະມາຊິກພັກສົມບູນທັງໝົດໃນຊຸດນີ້ໄດ້ນໍາສະເໜີຄະນະພັກຂັ້ນເທິງທີ່ກ່ຽວຂ້ອງອອກບັດໃຫ້ຈໍານວນ 209 ສະຫາຍ ແລະມາຮອດປະຈຸບັນຍັງມີສະມາຊິກພັກສົມບູນທີ່ຍັງບໍ່ທັນໄດ້ຮັບບັດ ກວມ 10,38% ຂອງຈໍານວນສະມາຊິກພັກສົມບູນທັງໝົດຍ້ອນວ່າຈໍານວນໜຶ່ງຫາກໍ່ເລື່ອນເປັນສະມາຊິກພັກສົມບູນ ແລະຍົກຍ້າຍມາຈາກບ່ອນອື່ນ.

  ສະຫາຍຫົວໜ້າກົມຈັດຕັ້ງ ແລະພະນັກງານ ທຫລ ຍັງໄດ້ຜ່ານຂໍ້ຕົກລົງຂອງຄະນະພັກ ທຫລ ວ່າດ້ວຍການຮັບຮອງສະມາຊິກພັກສົມບູນທີ່ມີມາດຖານຄົບ ຖ້ວນສະບັບເລກທີ 22/ຄພ. ທຫລ ໂດຍໄດ້ມີການຮັບຮອງສະມາຊິກພັກສົມບູນອ້ອມຂ້າງອົງຄະນະພັກ ທຫລ ໃນຄັ້ງນີ້ມີທັງໝົດຈໍານວນ 209 ສະຫາຍ, ຍິງ 106 ສະຫາຍທີ່ສັງກັດຢູ່ 24 ຮາກຖານພັກຈາກບັນດາ, ຄະນະພັກຮາກຖານ-ຄະນະໜ່ວຍພັກຮາກຖານຢູ່ບັນດາກົມຂອງ ທຫລ, 3 ສໍານັກງານ, ທະ ນາຄານທຸລະກິດ-ສະເພາະກິດຂອງລັດ ແລະ ຂອງເອກະຊົນ.

 ໃນໂອກາດດັ່ງກ່າວ, ສະຫາຍ ນາງ ວັດທະນາ ດາລາລອຍ ໄດ້ໃຫ້ການໂອ້ລົມ ແລະຊີ້ນໍາໃຫ້ບັນດາສະມາຊິກພັກສົມບູນທີ່ໄດ້ຮັບຮອງສະມາຊິກພັກສົມບູນໃນຄັ້ງນີ້ຈົ່ງພ້ອມກັນສືບຕໍ່ເສີມຂະຫຍາຍຜົນງານທີ່ຕັ້ງໜ້າເຂົ້າໃນການຈັດຕັ້ງປະຕິບັດໜ້າທີ່ການເມືອງຂອງຕົນເຮັດໃຫ້ວຽກງານວິຊາສະເພາະມີການຂະຫຍາຍຕົວຢ່າງບໍ່ຢຸດຢັ້ງ ແລະໃນຂະນະດຽວກັນ; ກໍ່ຕ້ອງແກ້ໄຂສິ່ງຄົງຄ້າງແນໃສ່ເຮັດໃຫ້ວຽກງານມີການຫັນປ່ຽນດີຂຶ້ນຕາມແນວທາງຂອງພັກ ແລະລັດຖະບານກໍ່ຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກ ທຫລ ໃຫ້ປາກົດຜົນເປັນຈິງ.

ຂ່າວ: ຣັດສະໝີ ດວງສັດຈະ

แชร์