ສຊປລ ຊະນະ ເບ ສະຫວັນ 10-9 ເຕະບານ ນັດພິເສດ ມິດຕະພາບ

ທີມຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ຫຼື ສຊປລ ໄລ່ເອົາຊະນະ ສະໂມສອນ ເບ ສະຫວັນ ເອັບຊີ ໄປແບບສຸດມ່ວນ 10-9 ປະຕູ ໃນການແຂ່ງຂັນເຕະບານ ນັດພິເສດ ມິດຕະພາບ ເພື່ອຮັດແໜ້ນຄວາມສາມັກຄີຮັກແພງ ເນື່ອງໃນໂອກາດທີ່ ທ່ານ ບຸນມີ ຫຼ່ຽມໄຊຍະຈັກ ໄດ້ມອບເຄື່ອງກິລາ ຈຳນວນ 20 ຊຸດ ໃຫ້ແກ່ທີມບານເຕະ ສຊປລ ໄດ້ມີຄວາມສະດວກໃນການເຄື່ອນໄຫວກິດຈະກຳຮ່ວມກັບບັນດາພາກສ່ວນພາກລັດ ແລະ ເອກະຊົນ ເນື່ອງໃນໂອກາດວັນສຳຄັນຕ່າງໆຂອງຊາດ.

ພິທີມອບ-ຮັບເຄື່ອງ ແລະ ກິດຈະກຳເຕະບານມິດຕະພາບໃນຄັ້ງນີ້ ໄດ້ມີຂຶ້ນໃນວັນທີ 6 ສິງຫາ 2024 ທີ່ເດີ່ນບານຫຍ້າທຽມ ເບ ສະຫວັນ ເອັບຊີ ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ຕາງໜ້າກ່າວມອບໂດຍທ່ານ ເດດສົງຄາມ ທຳມະວົງ ເຈົ້າເມືອງສີສັດຕະນາກ ປະທານກິຕິມະສັກ ສະໂມສອນ ເບ ສະຫວັນ ເອັບຊີ ແລະ ກ່າວຮັບແມ່ນທ່ານ ບຸນຕາ ເທບພະວົງ ປະທານກຳມະທິການວັດທະນະທຳ-ສັງຄົມ ສະພາແຫ່ງຊາດ, ມີທ່ານ ທອງລີ ສີສຸລິດ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ທ່ານ ທອງຈັນ ພູມີພັນ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ແລະ ທ່ານ ບຸນມີ ຫຼ່ຽມໄຊຍະຈັກ ປະທານສະໂມສອນ ເບ ສະຫວັນ ເອັບຊີ ທັງເປັນເຈົ້າສະໜາມກິລາດັ່ງກ່າວ ພ້ອມດ້ວຍ ບັນດາພະນັກງານທັງສອງພາກສ່ວນເຂົ້າຮ່ວມເປັນສັກຂີພິຍານ.

ຫຼັງຈາກພິທີສຳເລັດລົງກໍໄດ້ມີການແຂ່ງຂັນເຕະບານ ນັດພິເສດມິດຕະພາບ ຜົນປະກົດວ່າ ທີມຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ໄລ່ເອົາຊະນະ ເບ ສະຫວັນ ເອັບຊີ ຫວຸດຫວິດ 10-9 ປະຕູ.

ຂ່າວ-ພາບໂດຍ: ສົງການ ພັນແພງດີ

แชร์