ເຊັນບົດບັນທຶກ ວ່າດ້ວຍການສ້າງຕະຫຼາດແລກປ່ຽນເງິນຕາຕ່າງປະເທດທີ່ລວມສູນ

ພິທີເຊັນບົດບັນທຶກຄວາມເຂົ້າໃຈວ່າດ້ວຍການສ້າງຕະຫຼາດແລກປ່ຽນເງິນຕາຕ່າງປະເທດທີ່ລວມສູນ ລະຫວ່າງ ທະນາຄານແຫ່ງ ສປປ ລາວ (ທຫລ) ແລະ ທະນາຄານທຸລະກິດ (ທທກ) ໄດ້ຈັດຂຶ້ນໃນຕອນແລງຂອງ ວັນທີ 05 ສິງຫາ 2024 ທີ່ໂຮງແຮມສຸພັດຕາ ໂດຍການໃຫ້ກຽດເຂົ້າຮ່ວມເປັນສັກຄີພະຍານ ຂອງ ທ່ານ ນ. ວັດທະນາ ດາລາລອຍ ຮັກສາການຜູ້ວ່າການ ທຫລ, ພ້ອມດ້ວຍບັນດາທ່ານຮອງຜູ້ວ່າການ ທຫລ, ທ່ານ ພຸດທະໄຊ ສີວິໄລ ປະທານສະມາຄົມ ທະນາຄານລາວ, ຄະນະກົມກ່ຽວຂ້ອງຂອງ ທຫລ, ຄະນະຜູ້ບໍລິຫານຂອງ ບັນດາທະນາຄານທຸລະກິດ ແລະ ແຂກທີ່ຖືກ ເຊີນເຂົ້າຮ່ວມ ທີ່ມີຄວາມສົນໃຈສຶກສາ ແລະ ປະເມີນຜົນຄວາມເປັນໄປໄດ້ ໃນການລົງທຶນ ແລະພັດທະນາໂຄງການ ສ້າງຕະຫຼາດແລກປ່ຽນເງິນຕາຕ່າງປະເທດທີ່ລວມສູນ. ໃນພິທີເຊັນບົດບັນທຶກດັ່ງກ່າວຕາງໜ້າ ທຫລ ໂດຍແມ່ນທ່ານ ຫົວໜ້າຫ້ອງການ ທຫລ ແລະ ບັນດາທະນາຄານທຸລະກິດ ໂດຍແມ່ນທ່ານຜູ້ອຳນວຍການ ຂອງ ທະນາຄານກ່ຽວຂ້ອງ ຈໍານວນ 15 ແຫ່ງ.

ໃນພິທີ ທ່ານ ສຸລິສັກ ທຳນຸວົງ ຫົວໜ້າກົມນະໂຍບາຍເງິນຕາ, ທຫລ ຕາງໜ້າຄະນະຄົ້ນຄວ້າສ້າງຕັ້ງຕະຫຼາດແລກປ່ຽນເງິນຕາຕ່າງປະເທດທີ່ລວມສູນໄດ້ນໍາສະເໜີກ່ຽວກັບສະພາບ ແລະ ຄວາມເປັນມາຂອງການພັດທະນາລະບົບຕະຫຼາດແລກປ່ຽນເງິນຕາທີ່ລວມສູນ ໂດຍໃຫ້ຮູ້ວ່າ: ຈາກບັນຫາຄວາມບໍ່ສົມດຸນລະຫວ່າງຄວາມຕ້ອງການ ແລະການສະໜອງເງິນຕາຕ່າງປະເທດໃນລະບົບເສດຖະກິດເນື່ອງຈາກຄວາມຕ້ອງການເງິນຕາເພື່ອຊຳລະຄ່າສິນຄ້າ ແລະບໍລິການຈາກຕ່າງປະເທດ ແລະ ພັນທະໜີ້ສິນຕໍ່ຕ່າງປະເທດທີ່ຍັງຢູ່ໃນລະດັບສູງ ຈຶ່ງເຮັດໃຫ້ອັດຕາແລກປ່ຽນອ່ອນຄ່າ ແລະ ອັດຕາເງິນເຟີ້ ຍັງຢູ່ໃນລະດັບສູງ ຊຶ່ງກະທົບຕໍ່ກັບຊີວິດການເປັນຢູ່ຂອງພໍ່ແມ່ປະຊາຊົນລາວຢ່າງຫຼີກລ່ຽງບໍ່ໄດ້. ການແລກປ່ຽນເງິນຕາຢູ່ຕະຫຼາດນອກລະບົບພາໃຫ້ມີຄວາມຫຍຸ້ງຍາກໃນການຕິດຕາມກວດກາ ແລະການເກັບກຳຂໍ້ມູນ ທຸລະກຳຢູ່ນອກລະບົບ ຊຶ່ງເປັນອຸປະສັກໃນການດໍາເນີນນະໂຍບາຍຂອງ ທຫລ.

ສະນັ້ນ, ເພື່ອຮັກສາສະຖຽນລະພາບເງິນຕາແຫ່ງຊາດ ແລະຄຸ້ມຄອງອັດຕາແລກປ່ຽນໃຫ້ກ້າວເຂົ້າສູ່ຄວາມໝັ້ນທ່ຽງເທື່ອລະກ້າວ ແລະເປັນການຊຸກຍູ້ໃຫ້ສັງຄົມຫັນມາແລກປ່ຽນໃນລະບົບເພີ່ມຂຶ້ນ, ທຫລ ຈຶ່ງມີແນວຄວາມຄິດ ຕ້ອງການສ້າງຕະຫຼາດແລກປ່ຽນເງິນຕາຕ່າງປະເທດທີ່ລວມສູນ ເປັນ Platform ຊື້-ຂາຍເງິນຕາ ທີ່ອະນຸຍາດໃຫ້ ບຸກຄົນ ແລະ ນິຕິບຸກຄົນ ສາມາດເຂົ້າຮ່ວມການຊື້-ຂາຍເງິນຕາ ໄດ້ຢ່າງສະດວກ, ສອດຄ່ອງກັບການດໍາເນີນທຸລະກິດ ແລະ ສາມາດຕິດຕາມກວດກາໄດ້ ພອ້ມດຽວກັນນີ້, ທ່ານ ພຸດທະໄຊ ສີວິໄລ ປະທານສະມາຄົມທະນາຄານລາວ ກໍ່ໄດ້ເນັ້ນ ໜັກຕື່ມຕໍ່ການຈັດຕັ້ງປະຕິບັດໂດຍສະເພາະ ໃນໄລຍະທົດລອງການນໍາໃຊ້ລະບົບນີ້, ສະມາຄົມທະນາຄານລາວຈະປະສານສົມທົບກັບບັນດາກົມກ່ຽວຂ້ອງຂອງ ທຫລ ສ້າງແຜນຝຶກອົບຮົມ ແລະຄູ່ມືການນໍາໃຊ້ລະບົບໃຫ້ແກ່ບັນດາທະນາຄານທຸລະກິດທີ່ເຂົ້າຮ່ວມເຊັນບົດບັນທຶກຄວາມເຂົ້າໃຈໃນຄັ້ງນີ້ ເພື່ອໃຫ້ກຳໄດ້ ແລະເຂົ້າໃຈໃນການຈັດຕັ້ງ ປະຕິບັດຕົວຈິງ.

ປະຈຸບັນ, ທຫລ ໄດ້ສໍາເລັດການຄົ້ນຄວ້າຮູບແບບແນວຄວາມຄິດ (Concept) ຂອງການສ້າງຕະຫຼາດດັ່ງກ່າວ, ໄດ້ສໍາເລັດການຈັດກອງປະຊຸມເພື່ອປຶກສາຫາລື ແລະ ລະດົມຄວາມຄິດ ໃນການສ້າງຕະຫຼາດແລກປ່ຽນເງິນຕາ ຮ່ວມ ກັບບັນດາທະນາຄານທຸລະກິດ ທີ່ມີເງື່ອນໄຂເຂົ້າເປັນຜູ້ຖືຮຸ້ນໃນການຕັ້ງເປັນນິຕິບຸກຄົນ, ທຫລ ໄດ້ກຳນົດຈຸດປະສົງ ວາງ ຂອບແນວຄວາມຄິດ, ເງື່ອນໄຂການສ້າງຕັ້ງ ແລະ ຮູບແບບການດໍາເນີນທຸລະກຳຜ່ານຕະຫຼາດ ເພື່ອເປັນບ່ອນອີງໃນການ ຄົ້ນຄວ້າ ແລະ ປະກອບການຕັດສິນໃຈໃນການເຂົ້າຮ່ວມເປັນຜູ້ສ້າງຕະຫຼາດຊື້-ຂາຍເງິນຕາ ລະຫວ່າງ ທຫລ ກັບ ທະນາຄານທຸລະກິດທີ່ສົນໃຈເຂົ້າຮ່ວມການສ້າງຕັ້ງຕະຫຼາດແລກປ່ຽນເງິນຕາຕ່າງປະເທດທີ່ລວມສູນ ໃຫ້ສຳເລັດ, ໃນນັ້ນ ມີ 15 ທະນາຄານ ແຈ້ງເຈດຈຳນົງ ເຂົ້າຮ່ວມເຊັນບົດບັນທຶກຄວາມເຂົ້າໃຈວ່າດ້ວຍການສ້າງຕະຫຼາດແລກປ່ຽນ ເງິນຕາຕ່າງປະເທດທີ່ລວມສູນ; ພາຍຫຼັງເຊັນ MOU ແລ້ວ, ທຫລ ແລະບັນດາທະນາຄານທຸລະກິດຈະສຸມໃສ່ຄົ້ນຄວ້າ ແລະພັດທະນາລະບົບໃຫ້ໄວສ້າງຕັ້ງນິຕິບຸກຄົນ ເພື່ອເລີ່ມເປີດໃຫ້ບໍລິການໃນໄວໆນີ້.
ທີ່ມາ: Bank of Laos

แชร์