ລັດຖະມົນຕີ, ຫົວໜ້າ ຫສນຍ ລົງຊຸກຍູ້ວຽກງານແກ້ໄຂບັນຫາເຄັ່ງຮ້ອນທາງດ້ານເສດຖະກິດ ຢູ່ແຂວງບໍ່ແກ້ວ

ວັນທີ 5 ສິງຫາ 2024, ທ່ານ ບົວຄົງ ນາມມະວົງ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຫົວໜ້າກອງເລຂາຄະນະສະເພາະກິດ 19/ກມສພ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ ແລະ ຊຸກຍູ້ວຽກງານການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ຢູ່ແຂວງບໍ່ແກ້ວ, ໂດຍໄດ້ຮັບຟັງລາຍງານກ່ຽວກັບການແກ້ໄບັນຫາເຄັ່ງຮ້ອນທາງດ້ານເສດຖະກິດ-ການເງິນ ໂດຍສະເພາະ ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ອື່ນໆ.

ທ່ານ ເຄືອນເພັດ ວົງຈັນ ຮອງເຈົ້າແຂວງບໍ່ແກ້ວ ລາຍງານວ່າ: ຜ່ານການຈັດຕັ້ງປະຕິບັດການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ສູ່ວຽກງານຕົວຈິງ ເຮັດໃຫ້ວຽກງານແຕ່ລະດ້ານມີການຫັນປ່ຽນດີຂຶ້ນເປັນກ້າວໆ, ເສດຖະກິດພາຍໃນແຂວງ ຂະຫຍາຍຕົວລະດັບ 4% ຮອດວັນທີ 26 ກໍລະກົດ 2024, ລວມຍອດຜະລິດຕະພັນພາຍໃນ GDP 1,747 ຕື້ກີບ, ການເ

ກັບລາຍຮັບປະຕິບັດໄດ້ຫຼາຍກວ່າ 471 ຕື້ກີບ ເທົ່າກັບ 78.59% ຂອງແຜນປີ, ລາຍຈ່າຍປະຕິບັດໄດ້ 213.64 ຕື້ກີບ ເທົ່າກັບ 54.76% ຂອງແຜນປີ.
ໂອກາດນີ້, ທ່ານ ລັດຖະມົນຕີ, ຫົວໜ້າ ຫສນຍ ໄດ້ຊີ້ນຳໃຫ້ແຂວງ ແລະ ພາກສ່ວນກ່ຽວຂ້ອງສືບຕໍ່ເອົາໃຈໃສ່ຈັດຕັ້ງຜັນຂະຫຍາຍມະຕິຂອງກອງປະຊຸມລັດຖະບານ ເປີດກວ້າງຄັ້ງທີ I ປີ 2024; ສຸມໃສ່ແກ້ໄຂບັນຫາເງິນເຟີ້, ອັດຕາແລກປ່ຽນ ແລະ ການຄຸ້ມຄອງລາຄາສິນຄ້າທີ່ຍັງເປັນບັນຫາຄົງຄ້າງໃຫ້ດີຂຶ້ນດ້ວຍມາດຕະການຕ່າງໆຢ່າງເໝາະສົມ ເພື່ອປະກອບສ່ວນເຮັດໃຫ້ເສດຖະກິດມະຫາພາກມີສະຖຽນລະພາບ;ຕິດຕາມ ແລະຄຸ້ມຄອງການນໍາເຂົ້າທຶນຕົວຈິງຂອງບັນດາໂຄງການລົງທຶນຜ່ານລະບົບທະນາຄານຢ່າງເຂັ້ມງວດ; ແກ້ໄຂບັນຫາຢາເສບຕິດ ແລະ ບັນດາປະກົດການຫຍໍ້ທໍ້ຢູ່ພາຍໃນແຂວງ; ສົ່ງເສີມການຜະລິດພາຍໃນໃຫ້ຫລາຍຂຶ້ນ, ຄົ້ນຄວ້າໂຄງປະກອບລາຄາສິນຄ້າທີ່ຈໍາເປັນເພື່ອຊອກຮູ້ປັດໃຈຕົ້ນຕໍທີ່ເປັນຜົນກະທົບຕໍ່ລາຄາສິນຄ້າ ແລະກໍານົດອັດຕາຂາຍໃນແຕ່ລະຂອດໃຫ້ເໝາະສົມ; ຄຸ້ມຄອງ, ກວດກາການນໍາເຂົ້າ-ສົ່ງອອກສິນຄ້າ ຢູ່ບັນດາດ່ານຊາຍແດນໃຫ້ເຄື່ອນໄຫວຢ່າງຖືກຕ້ອງ, ຈຳ ກັດໄດ້ຊ່ອງຫວ່າງການສວຍໂອກາດຕ່າງໆ; ຕິດຕາມໂຄງການລົງທຶນດ້ານແຮ່ທາດ ເພື່ອປະເມີນການຈັດຕັ້ງປະຕິບັດບັນດາໂຄງການແລ້ວສະເໜີລັດຖະບານພິຈາລະນາ ຕໍ່ໂຄງການທີ່ບໍ່ມີຄວາມຄືບໜ້າ ແລະ ບໍ່ປະຕິບັດຕາມສັນຍາ; ສືບຕໍ່ເອົາໃຈໃສ່ແກ້ໄຂການນຳເຂົ້າສິນຄ້າທີ່ພາຍໃນແຂວງສາມາດຜະລິດໄດ້, ແກ້ໄຂການຄ້າຂາຍອອນລາຍ, ການນຳເຂົ້າພາຫະນະລາຍຍ່ອຍ; ພາຫະນະທີ່ນຳໃຊ້ ແລະ ນຳເຂົ້າ ບໍ່ຖືກຕ້ອງຕາມກົດໝາຍ ແລະລະບຽບການຢ່າງເຂັ້ມງວດ ແລະເຮັດໃຫ້ສໍາເລັດໂດຍໄວ.

แชร์