ປີ 2025 ການຜະລິດໄຟຟ້າທົດແທນທົ່ວໂລກ ຄາດວ່າຈະລື່ນກາຍພະລັງງານຖ່ານຫີນ
ຂ່າວສານຫວຽດນາມລາຍງານວ່າ: ອົງການພະລັງງານສາກົນ ຫຼື IEA ຄາດຄະເນວ່າໃນປີ 2025, ພະລັງງານທົດແທນຄາດວ່າຈະສະໜອງ 35% ຂອງການຜະລິດກະແສໄຟຟ້າທົ່ວໂລກ ແລະ ຈະເປັນຄັ້ງທຳອິດທີ່ໄຟຟ້າຈາກແຫຼ່ງພະລັງງານທົດແທນທີ່ຜະລິດໃນທົ່ວໂລກຈະລື່ນກາຍພະລັງງານໄຟຟ້າຖ່ານຫີນ.
ຂ່າວລະບຸວ່າ: ອີງຕາມ IEA, ພະລັງງານທົດແທນລວມທັງໄຟຟ້ານ້ໍາຕົກ, ແສງຕາເວັນ ແລະ ພະລັງງານລົມ, ຈະສະໜອງໄຟຟ້າທັງໝົດ 35% ໃນປີ 2025, ເມື່ອທຽບກັບ 30% ໃນປີ 2023. ໂດຍສະເພາະ, ພະລັງງານແສງຕາເວັນ ແລະ ພະລັງງານລົມ ຈະຕອບສະໜອງ 75% ຂອງຄວາມຕ້ອງການ.
ເຖິງວ່າປະລິມານໄຟຟ້າຈາກພະລັງງານທົດແທນຈະເພີ່ມຂຶ້ນ, ແຕ່ການຜະລິດໄຟຟ້າຈາກໂຮງໄຟຟ້າຖ່ານຫີນຄາດວ່າຈະຫຼຸດລົງຈາກປີ 2024, ເນື່ອງຈາກຄວາມຕ້ອງການຂອງຈີນ ແລະ ອິນເດຍ ເພີ່ມຂຶ້ນຢ່າງແຂງແຮງ.
ແນວໃດກໍຕາມ, IEA ຍັງຫວັງວ່າກຳລັງການຜະລິດໄຟຟ້ານ້ຳຕົກຂອງຈີນ ຈະເພີ່ມຂຶ້ນຢ່າງຫຼວງຫຼາຍ, ປະກອບສ່ວນຫຼຸດຜ່ອນອັດຕາສ່ວນຂອງຖ່ານຫີນທີ່ໃຊ້ໃນການຜະລິດກະແສໄຟຟ້າ, ສະນັ້ນ ການປ່ອຍອາຍພິດ CO2 ຈາກຂະແໜງໄຟຟ້າກໍຈະຫຼຸດລົງເຊັ່ນດຽວກັນ.
ອີງຕາມສະຖາບັນຄົ້ນຄວ້າ Ember ຂອງອັງກິດ, ສະຫະພາບ ເອີຣົບ ກໍາລັງພົບກັບການປີ້ນກັບກັນທີ່ບໍ່ເຄີຍມີມາກ່ອນ ແລະ ຈະເປັນຈຸດປ່ຽນແປງ. ເຖິງແມ່ນວ່າການຊົມໃຊ້ໄຟຟ້າໃນພາກພື້ນໄດ້ຟື້ນຕົວ 0,7% ໃນເຄິ່ງທໍາອິດຂອງປີ 2024 (+9 TWh), ແຕ່ການຜະລິດໄຟຟ້າພະລັງງານລົມ ແລະ ແສງຕາເວັນ ໄດ້ລື່ນກາຍການຜະລິດໄຟຟ້າເຊື້ອໄຟຟອດຊິວ ໃນ 6 ເດືອນທໍາອິດຂອງປີນີ້. ນີ້ສະແດງໃຫ້ເຫັນວ່າ, ການຜະລິດໄຟຟ້າພະລັງງານລົມ ແລະ ແສງຕາເວັນ ສືບຕໍ່ຂະຫຍາຍຕົວໃນເຄິ່ງທໍາອິດຂອງປີ 2024 ໃນພາກພື້ນນີ້.
