ພື້ນຖານເສດຖະກິດ ຝຣັ່ງ ໄດ້ຮັບຜົນປະໂຫຍດຈາກງານກິລາໂອແລັມປິກ ປາຣີ 2024

ຂ່າວສານຫວຽດນາມລາຍງານວ່າ: ອີງຕາມສະຖາບັນສະຖິຕິ ແລະ ການຄົ້ນຄວ້າເສດຖະກິດແຫ່ງຊາດຝຣັ່ງ (INSEE), ງານກິລາໂອແລັມປິກປາຣີ 2024 ຄາດວ່າຈະຊ່ວຍເພີ່ມການຂະຫຍາຍຕົວຂອງ ລວມຍອດຜະລິດຕະພັນພາຍໃນປະເທດ (GDP) ຂອງຝຣັ່ງ 0,3% ໃນໄຕມາດທີ 3 ຂອງປີ 2024. ຊ່ວຍໃຫ້ອັດຕາການເຕີບໂຕເສດຖະກິດໃນໄລຍະນີ້ບັນລຸ 0,5%.
INSEE ກ່າວວ່າ: ລາຍໄດ້ຈາກການຂາຍປີ້ ແລະ ການອອກອາກາດແມ່ນມີຜົນທາງບວກຕໍ່ກິດຈະກໍາເສດຖະກິດຂອງຝຣັ່ງໃນໄຕມາດທີສາມຂອງປີ 2024 ຊຶ່ງປະກອບສ່ວນ 0,25% ຕໍ່ການເຕີບໂຕຂອງ GDP. ໃນຂະນະດຽວກັນ, ນັກທ່ອງທ່ຽວກໍແມ່ນປັດໄຈໜຶ່ງທີ່ໄດ້ປະກອບສ່ວນໃນທາງບວກເຂົ້າໃນການຂະຫຍາຍຕົວໃນໄລຍະນີ້.
ບັນດາອົງການຄົ້ນຄວ້າຝຣັ່ງໃຫ້ຂໍ້ສັງເກດວ່າ, ງານກິລາໂອແລັມປິກ ຄາດວ່າຈະຊຸກຍູ້ເສດຖະກິດຝຣັ່ງໃນໄລຍະສັ້ນ, ແຕ່ຍັງບໍ່ທັນມີຜົນໃນໄລຍະຍາວ.
ອີງຕາມ INSEE, ການເພີ່ມຂຶ້ນຂອງນັກທ່ອງທ່ຽວຈະຊ່ວຍຊຸກຍູ້ການຈະລາຈອນການຂົນສົ່ງ ແລະ ມີຜົນດີຕໍ່ອຸດສາຫະກໍາການບໍລິການໂຮງແຮມ ແລະ ຮ້ານອາຫານຂອງຝຣັ່ງ.

แชร์