ເມືອງໄຊສະຖານ ເຊັນສັນຍາສົ່ງອອກຂີ້ກະເດືອນ ໄປ ສປ ຈີນ ເປັນເວລາ 10 ປີ

ວັນທີ 5 ສິງຫາ 2024 ນີ້ ເມືອງໄຊສະຖານ ແຊວງໄຊຍະບູລີ ໄດ້ຈັດພິທີເຊັນສັນຍາການສົ່ງເສີມລ້ຽງ ແລະເກັບຊື້ຂີ້ກະເດືອນລະຫວ່າງອົງການປົກຄອງເມືອງໄຊສະຖານ ຕາງໜ້າໂດຍຫ້ອງການແຜນການ ແລະ ການລົງທຶນເມືອງ ກັບບໍລິສັດ ເສີນຢາງ ຈໍາກັດຜູ້ດຽວ ຂຶ້ນຢ່າງເປັນທາງການຢູ່ທີ່ຫ້ອງປະຊຸມຫ້ອງການແຜນການ ແລະ ການລົງທຶນເມືອງ ພາຍໃຕ້ການເປັນປະທານຂອງທ່ານ ຄໍາຮັກ ສີດາພອນ ຮອງເຈົ້າເມືອງ ປະທານຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນເມືອງ, ມີສະມາຊິກສະພາປະຊາຊົນແຂວງປະຈໍາເມືອງ, ຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນເມືອງ, ຕາງໜ້າບໍລິສັດ ເສີນຢາງ ຈໍາກັດຜູ້ດຽວເຂົ້າຮ່ວມ.

ພິທີໃນຄັ້ງນີ້ພາຍຫຼັງທີ່ຈັດຕັ້ງພິທີໄດ້ສະເໜີຈຸດປະສົງແລ້ວທ່ານ ພອນແກ້ວ ຫຼວງສົມພັນ ວ່າການແທນຫົວໜ້າຫ້ອງການແຜນການ ແລະການລົງທຶນເມືອງ ໄດ້ຂຶ້ນຜ່ານຮ່າງສັນຍາວ່າດ້ວຍການສົ່ງເສີມການລ້ຽງ ແລະ ເກັບຊື້ຂີ້ກະເດືອນ ຈຸດປະສົງກໍ່ເພື່ອນໍາໃຊ້ຊັບພະຍາກອນ, ຊຸກຍູ້ສົ່ງເສີມໃຫ້ປະຊາຊົນລ້ຽງຂີ້ກະເດືອນເພື່ອປ້ອນໂຮງງານ ເຮັດໃຫ້ຊີວິດການເປັນຢູ່ດີຂຶ້ນ ແລະ ເສດຖະກິດຂອງເມືອງມີການຂະຫຍາຍຕົວຕໍ່ເນື່ອງ, ເພື່ອເປັນການລົງທຶນໃຫ້ປະຊາຊົນພາຍໃນເມືອງລ້ຽງ ແລະ ເກັບຊື້ຊີ້ກະເດືອນເພື່ອສົ່ງອອກໄປ ສປ ຈີນ ເຊິ່ງສັນຍາດັ່ງກ່າວມີທັງໝົດ 12 ມາດຕາ ໃນຂອບເຂດການສົ່ງເສີມລ້ຽງແລະ ເກັບຊື້ຂີ້ກະເດືອນໃນ 21 ບ້ານຂອງເມືອງໄຊສະຖານ ກໍານົດສັນຍາເປັນເວລາ 10 ປີ ເລີ່ມແຕ່ເດືອນກັນຍາ 2024 ຫາ ເດືອນກັນຍາ 2034 ໃນຮູບແບການລົງທຶນ ( 2+3 ). ຈາກນັ້ນປະທານກອງປະຊຸມຍັງໄດ້ມີຄໍາເຫັນເຈາະຈີ້ມກ່ຽວກັບຮ່າງສັນຍາດັ່ງກ່າວ ເພື່ອໃຫ້ບັນດາຜູ້ເຂົ້າຮ່ວມໄດ້ມີການປະກອບຄໍາຄິດຄໍາເຫັນ ໃສ່ຮ່າງສັນຍາດັ່ງກ່າວຢ່າງກົງໄປກົງມາ ເຮັດໃຫ້ຮ່າງສັນຍາສົມບູນ ຕາງໜ້າໂດຍ ຫ້ອງການແຜນການ ແລະ ການລົງທຶນເມືອງ ຝ່າຍ ( ກ ) ກັບ ບໍລິສັນ ເສີນຢາງ ຈໍາກັດຜູ້ດຽວ ເຊິ່ງຕາງໜ້າໂດຍທ່ານ ນາງ ບົວສອນ ພົມມະຂັນ ຝ່າຍ ( ຂ )

ພິທີໃນຄັ້ງນີ້ຜູ້ເຂົ້າຮ່ວມຍັງໄດ້ຮັບຟັງຄໍາເຫັນໂອ້ລົມຂອງທ່ານ ຄໍາຮັກ ສີດາພອນ ຮອງເຈົ້າເມືອງເຊີ່ງທ່ານໄດ້ຍ້ອງຍໍຊົມເຊີຍຕໍ່ກັບທາງບໍລິສັດດັ່ງກ່າວທີ່ໄດ້ເຂົ້າມາລົງທຶນສົ່ງເສີມການລ້ຽງ ແລະເກັບຊື້ຊີ້ກະເດືອນໃນຄັ້ງນີ້ ແລະ ທ່ານຍັງໄດ້ມີຄໍາເຫັນຊິ້ນໍາຕໍ່ກັບການລ້ຽງ ແລະການເກັບຊື້ຂີ້ກະເດືອນຈາກພໍ່ແມ່ປະຊາຊົນຢູ່ພາຍໃນເມືອງ ແລະ ບັນຫາອື່ນໆຕື່ມອີກ.
ຂ່າວ: ຖວທ ໄຊສະຖານ

แชร์