ບໍລິສັດ ເທີນ-ຫີນບູນ ພາວເວີ ຈໍາກັດ ສຳເລັດການປະຕິບັດພັນທະດ້ານສັງຄົມ

ວັນທີ 02 ສິງຫາ 2024 ທີ່ໂຮງແຮມເມືອງແທ່ງ ນະຄອນຫຼວງວຽງຈັນ ບໍລິສັດ ເທີນ-ຫີນບູນ ພາວເວີ ຈຳກັດ ຮ່ວມກັບ ຄະນະກຳມະການ ແລະ ກອງເລຂາທົດແທນຄ່າເສຍຫາຍ ແລະ ຈັດສັນຍົກຍ້າຍ ແຂວງຄໍາມ່ວນ ໄດ້ຈັດກອງປະຊຸມສະຫຼຸບຜົນສໍາເລັດການຈັດຕັ້ງປະຕິບັດພັນທະທາງດ້ານສັງຄົມຂອງໂຄງການ ເທີນ-ຫີນບູນ ພາກຂະຫຍາຍ ໂດຍການເປັນປະທານຂອງທ່ານ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ປະທານຄະນະກຳມະການທົດແທນຄ່າເສຍຫາຍ ແລະ ຈັດສັນຍົກຍ້າຍ ຂັ້ນແຂວງ, ມີທ່ານ ຈີຊົ່ງ ຈື່ຫວ່າໄຊກິ  ຜູ້ອຳນວຍການໃຫຍ່ບໍລິສັດ ເທີນ-ຫີນບູນ ພາວເວີ ຈຳກັດ, ມີຄະນະກຳມະການ, ກອງເລຂາຈາກແຂວງຄຳມ່ວນ, ເມືອງຄູນຄຳ,  ເມືອງຫີນບູນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມດັ່ງກ່າວ ຄະນະກຳມະການ ແລະ ກອງເລຂາທົດແທນຄ່າເສຍຫາຍ ແລະ ຈັດສັນຍົກຍ້າຍ ໃນນາມຕ່າງໜ້າໃຫ້ແກ່ລັດຖະບານໄດ້ຊົມເຊີຍ ແລະ ເຫັນດີເປັນເອກະພາບຕໍ່ບໍລິສັດ ເທີນ-ຫີນບູນ ພາວເວີ ຈຳກັດ ທີ່ໄດ້ຈັດຕັ້ງປະຕິບັດສຳເລັດ 100 % ຂອງບັນດາກິດຈະກໍາທີ່ເປັນພັນທະດ້ານສັງຄົມ ໂດຍສອດຄ່ອງຕາມພັນທະ ແລະ ເງື່ອນໄຂຂອງສັນຍາສໍາປະທານ ພ້ອມດຽວກັນນັ້ນ ກໍ່ໄດ້ຮັບຮອງເອົາຜົນສໍາເລັດ ແລະ ການສິ້ນສຸດການຈັດຕັ້ງປະຕິບັດພັນທະດ້ານສັງຄົມຂອງໂຄງການ ເທີນ-ຫີນບູນ ພາກຂະຫຍາຍ.

ການກໍ່ສ້າງໂຄງການເຂື່ອນໄຟຟ້າ ເທີນ-ຫີນບູນ ພາກຂະຫຍາຍ ໄດ້ເຮັດໃຫ້ມີການຍົກຍ້າຍຈຳນວນ 12 ບ້ານ, 630 ຄົວເຮືອນ ຊຶ່ງມີບ້ານເດີມຢູ່ລຽບຕາມອ່າງນໍ້າຍ້ວງຍົກຍ້າຍໄປຢູ່ 04 ບ້ານຍົກຍ້າຍຈັດສັນໃໝ່ ຂອງເມືອງຄຳເກີດ ແຕ່ປີ 2009-2011. ພ້ອມດຽວກັນນັ້ນ ຍັງໄດ້ມີການຍັບຍ້າຍ 22 ບ້ານຢູ່ລຽບຕາມລ່ອງນໍ້າໄຮ,  ນ້ຳຫີນບູນ ແລະ 01 ບ້ານ ທີ່ຢູ່ຕິດກັບເຮືອນຈັກຂອງເຂື່ອນນໍ້າຍ້ວງ ແຕ່ປີ 2010-2017.

ບໍລິສັດ ເທີນ-ຫີນບູນ ພາວເວີ ຈຳກັດ ໄດ້ເຮັດວຽກຮ່ວມກັບອໍານາດການປົກຄອງທຸກຂັ້ນຢ່າງໃກ້ຊິດ ເປັນເວລາ 10 ກວ່າປີຜ່ານມາ ເພື່ອວາງແຜນກິດຈະກໍາຮ່ວມກັນແຕ່ເບື້ອງຕົ້ນ ແລະ  ບໍລິສັດໄດ້ໃຊ້ງົບປະມານຫຼາຍກວ່າ 110 ລ້ານໂດລາ ສະຫະລັດ ເຂົ້າໃນການຈັດຕັ້ງປະຕິບັດພັນທະທາງດ້ານສັງຄົມ ແລະ ສິ່ງແວດລ້ອມ ໂດຍປະຕິບັດໃຫ້ສອດຄ່ອງຕາມເງື່ອນໄຂທີ່ກຳນົດໄວ້ໃນສັນຍາສຳປະທານ ເຊິ່ງບັນດາພັນທະທີ່ບໍລິສັດໄດ້ຈັດຕັ້ງປະຕິບັດປະກອບມີ  2 ໜ້າວຽກໃຫຍ່: 1. ວຽກທີ່ເປັນພັນທະດ້ານສັງຄົມຄື: ວຽກງານເກັບກຳຂໍ້ມູນ ແລະ ການຊົດເຊີຍຊັບສິນ, ການຍົກຍ້າຍຈັດສັນ, ກໍ່ສ້າງ ແລະ ສ້ອມແປງໂຄງລ່າງພື້ນຖານເປັນລາຍຄອບຄົວ ແລະ ຂອງລວມບ້ານ, ການຟື້ນຟູຊີວິດການເປັນຢູ່, ສົ່ງເສີມສຸຂະພາບ, ສົ່ງເສີມການສຶກສາ, ຊ່ວຍເຫຼືອຄອບຄົວດ້ອຍໂອກາດ  ແລະ ສ້າງຄວາມເຂັ້ມແຂງໃຫ້ແກ່ແມ່ຍິງ, ຊົນເຜົ່າ, ບົດບາດຍິງ-ຊາຍ ແລະ ອົງການປົກຄອງບ້ານໃນເຂດບ້ານຍົກຍ້າຍ ແລະ ຍັບຍ້າຍຈັດສັນ, ວຽກງານສຶກສາ ແລະ ສາທາລະນະສຸກ. ໂດຍມີຈຸດປະສົງ ເພື່ອສະໜອງສິ່ງອຳນວຍຄວາມສະດວກ ແລະ ການເຂົ້າເຖິງທາງເລືອກໃນການດຳລົງຊີວິດ ແລະ ການບໍລິຫານ, ຍົກລະດັບຊີວິດການເປັນຢູ່ ແລະ ສ້າງລາຍຮັບໃຫ້ປະຊາຊົນຜູ້ທີ່ໄດ້ຮັບຜົນກະທົບຈາກໂຄງການໃຫ້ດີຂຶ້ນເທື່ອລະກ້າວ, 2. ວຽກທີ່ເປັນພັນທະດ້ານສິ່ງແວດລ້ອມປະກອບມີ: ການຕິດຕາມຄຸນນະພາບນ້ຳ (ນໍ້າໜ້າດິນ, ນ້ຳໃຊ້ ແລະ ນ້ຳເປື້ອນ), ການຕິດຕາມການເຊາະເຈື່ອນ, ການຄຸ້ມຄອງສິ່ງເສດເຫຼືອຈາກການດຳເນີນງານ, ການຕິດຕາມອາຍແກ໊ສເຮືອນແກ້ວ, ການປົກປັກຮັກສາ ແລະ ຄຸ້ມຄອງຊີວະນາໆພັນຂອງປ່າປ້ອງກັນອ່າງນ້ຳຍ້ວງຕອນໃຕ້, ການຕິດຕາມ ແລະ ຄຸ້ມຄອງການປະມົງ, ບໍລິສັດໄດ້ເອົາໃຈໃສ່ຈັດຕັ້ງປະຕິບັດບັນດາອົງປະກອບດ້ານສິ່ງແວດລ້ອມຕາມທີ່ໄດ້ກຳນົດໃນສັນຍາສຳປະທານ ເພື່ອຈຳກັດ ແລະ ຄຸ້ມຄອງຄວາມສ່ຽງດ້ານສີ່ງແວດລ້ອມທີ່ອາດສົ່ງຜົນກະທົບຕໍ່ການດຳເນີນງານ.

ປະຈຸບັນ ບໍລິສັດ ເທີນ-ຫີນບູນ ພາວເວີ ຈຳກັດ ໄດ້ສຳເລັດການຈັດຕັ້ງປະຕິບັດທຸກໆ ອົງປະກອບພັນທະດ້ານສັງຄົມທີ່ລະບຸໃນສັນຍາສໍາປະທານ. ພ້ອມດຽກັນນັ້ນ ຄະນະກໍາມະການຍົກຍ້າຍຈັດສັນ ແລະ ຟື້ນຟູຊີວິດການເປັນຢູ່ຂອງປະຊາຊົນ ໄດ້ຮັບຮອງເອົາທັງໝົດ 46 ບ້ານທີ່ຖືກຜົນກະທົບຈາກໂຄງການ ເປັນບ້ານບັນລຸເປົ້າໝາຍລາຍຮັບຕາມເງື່ອນໄຂໃນສັນຍາສຳປະທານ ທີ່ລະບຸໄວ້ວ່າ: ເປົ້າໝາຍລາຍຮັບເປັນຕົວຊີ້ວັດຫຼັກຂອງການຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໂຄງການ.

ນອກຈາກສຸມໃສ່ບັນດາບ້ານຍົກຍ້າຍ ແລະ ຍັບຍ້າຍຈັດສັນຂອງໂຄງການແລ້ວ ບໍລິສັດ ຍັງໄດ້ຂະຫຍາຍການຊ່ວຍເຫຼືອໃຫ້ແກ່ບ້ານຢູ່ນອກເຂດຍົກຍ້າຍ ແລະ ຍັບຍ້າຍຈັດສັນ ຕື່ມອີກ ຊຶ່ງລວມມີ 24 ບ້ານ ທີ່ຕັ້ງຢູ່ລຽບຕາມແຄມນໍ້າໄຮ, ນ້ຳຫີນບູນຕອນລຸ່ມ ແລະ 6 ບ້ານທີ່ຢູ່ຕາມລຽບນໍ້າເທີນ ກໍ່ໄດ້ຮັບການສະໜັບສະໜູນຈາກບໍລິສັດເຊັ່ນດຽວກັນໂດຍອີງຕາມພັນທະ ແລະ ສັນຍາສຳປະທານ.

ພາຍຫຼັງສິ້ນສຸດການຈັດຕັ້ງປະຕິບັດກິດຈະກຳທີ່ເປັນພັນທະທາງດ້ານສັງຄົມ ແລະ ສິ່ງແວດລ້ອມໃນຊ່ວງໄລຍະເວລາຈັດຕັ້ງປະຕິດບັດການຍົກຍ້າຍຈັດສັນປີ 2017, ບໍລິສັດໄດ້ສ້າງແຜນປະຕິບັດງານການຄຸ້ມຄອງດ້ານສັງຄົມ ແລະ ສິ່ງແວດລ້ອມເປັນໄລຍະເວລາ 10 ປີ ( 2018-2027) ແລະ ຍັງຈະສືບຕໍ່ຈັດຕັ້ງປະຕິບັດບາງພັນທະດ້ານສິ່ງແວດລ້ອມຈົນກວ່າສັນຍາສຳປະທານຈະສິ້ນສຸດ ໃນປີ 2039.

ເພື່ອສືບຕໍ່ວຽກງານການຕິດຕາມ ແລະ ຄຸ້ມຄອງດ້ານສັງຄົມ ແລະ ສິ່ງແວດລ້ອມ ພ້ອມທັງສົ່ງເສີມ ແລະ ຊ່ວຍເຫຼືອບ້ານເປົ້າໝາຍດັ່ງກ່າວໃນການຈັດຕັ້ງປະຕິບັດວຽກການພັດທະນາຊຸມຊົນ ໂດຍແມ່ນຊຸມຊົນເປັນຜູ້ຄັດເລືອກບຸລິມະສິດຄວາມຕ້ອງການເອງ, ເພື່ອຍົກລະດັບມາດຕະຖານຊີວິດການເປັນຢູ່ຂອງຊຸມຊົນໃນທ້ອງຖິ່ນ ແລະ ສົ່ງເສີມຄວາມເປັນເຈົ້າການຄວາມຮັບຜິດຊອບໃນການຄຸ້ມຄອງດ້ານການພັດທະນາຂອງຕົນເອງ ແລະ ໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມຂອງລັດຖະບານ. ໃນນັ້ນ ໜຶ່ງໃນບັນດາວຽກງານທີ່ພົ້ນເດັ່ນແມ່ນ: ໂຄງການແຜນພັດທະນາບ້ານ, ເຊິ່ງໄດ້ເລີ່ມຈັດຕັ້ງປະຕິບັດໂຄງການດັ່ງກ່າວແຕ່ປີ 2018 ເປັນຕົ້ນມາລວມມີ 334 ໂຄງການໃຫ້ແກ່ 33 ບ້ານເປົ້າໝາຍ ແລະ ໄດ້ນໍາໃຊ້ງົບປະມານທັງໝົດ 20,560,574,000 ກີບ.

ກ່ອນໜ້ານີ້ທ່ານ ວັນນະຫົງ ທຳມະວົງສາ ຮອງເຈົ້າເມືອງຄູນຄຳ ແຂວງຄຳມ່ວນ ໄດ້ໃຫ້ສຳພາດຕໍ່ນັກຂ່າວໂທລະພາບແຂວງຄຳມ່ວນວ່າ: ໂຄງການ ເທີນ-ຫີນບູນ ພາກຂະຫຍາຍ ແມ່ນໜຶ່ງໃນໂຄງການພະລັງງານໄຟຟ້ານ້ຳຕົກທີ່ໄດ້ຮັບການອະນຸມັດໂດຍລັດຖະບານ ຂອບເຂດຂອງໂຄງການແມ່ນກວມເອົາເມືອງຄຳເກີດ (ແຂວງບໍລິຄຳໄຊ), ເມືອງຄູນຄຳ ແລະ ເມືອງຫີນບູນ (ແຂວງຄຳມ່ວນ), ໂຄງການດັ່ງກ່າວໄດ້ເລີ່ມລົງມືກໍ່ສ້າງໃນປີ 2009 ແລະ ສຳເລັດໃນປີ 2012 ໂດຍແມ່ນບໍລິສັດ ເທີນ-ຫີນບູນ ພາວເວີ ຈຳກັດ ເປັນເຈົ້າຂອງໂຄງການ. ການຮັບມື ແລະ ແກ້ໄຂບັນຫາສັງຄົມ ແລະ ສິ່ງແວດລ້ອມ ເປັນໜຶ່ງໃນບັນດາພັນທະທີ່ ບໍລິສັດ ເທີນ-ຫີນບູນ ພາວເວີ ຈຳກັດ (ທຫບ) ໃຫ້ຄວາມສຳຄັນໃນຕະຫຼອດໄລຍະດຳເນີນທຸລະກິດດ້ານພະລັງງານ ນັບແຕ່ປີ 1994 ເປັນຕົ້ນມາ ໂດຍສະເພາະໃນຊ່ວງເວລາທີ່ມີການກໍ່ສ້າງໂຄງການ ເທີນ-ຫີນບູນ ພາກຂະຫຍາຍ ຮອດປະຈຸບັນ.

ທ່ານ ນິພົນ ທຳມະວົງ ນາຍບ້ານພູຊາດ ເມືອງຄູນຄໍາ ເປັນບ້ານທີ່ຖືກຍົກຍ້າຍ ໄດ້ໃຫ້ສຳພາດວ່າ: ຂ້າພະເຈົ້າ  ແມ່ນມີຄວາມຮູ້ສຶກດີໃຈຫຼາຍ ທີ່ໄດ້ຍົກຍ້າຍຈາກບ່ອນທີ່ມີການພັດທະນາຍາກ ມາຢູ່ບ້ານໃໝ່ ທີ່ມີລະບົບໂຄງລ່າງພື້ນຖານ ທີ່ສະດວກສະບາຍ, ມີເສັ້ນທາງທີ່ທຽວໄດ້ທຸກລະດູ, ມີໂຮງຮຽນ, ໂຮງໝໍ, ລະບົບໄຟຟ້າ, ນໍ້າປະປາ ລວມເຖິງພື້ນຖານການຜະລິດ ແລະ ອື່ນໆ. ຊີວິດການເປັນຢູ່ຂອງພໍ່ແມ່ປະຊາຊົນກໍ່ມີການພັດທະນາດີຂຶ້ນຫຼາຍ ເມື່ອທຽບໃສ່ກັບເມື່ອກ່ອນ. ໃນນາມຕາງໜ້າໃຫ້ແກ່ອຳນາດການປົກຄອງບ້ານ ກໍ່ຄືພໍ່ແມ່ປະຊາຊົນ ຂໍສະແດງຄວາມຂອບໃຈມາຍັງການນຳ ພັກ-ລັດ ແລະ ບໍລິສັດເທີນ-ຫີນບູນ ພາວເວີ ຈຳກັດ ທີ່ໄດ້ໃຫ້ການສະໜັບສະໜູນຊ່ວຍເຫຼືອພໍ່ແມ່ປະຊາຊົນ ເຮັດໃຫ້ພໍ່ແມ່ປະຊາຊົນຊາວບ້ານພູຊາດ ມີໃບໜ້າໃໝ່, ມີຊີວິດຊີວາ ແລະ ຍິ້ມແຍ້ມແຈ່ມໃສ.

ບໍລິສັດ ເທີນ-ຫີນບູນ ພາວເວີ ຈຳກັດ ໄດ້ຮັບອະນຸຍາດໃຫ້ພັດທະນາໂຄງການເທີນຫີນບູນໃນປີ 1994 ແລະ ເລີ່ມທຳການຜະລິດໄຟຟ້າໃນປີ 1998. ເນື່ອງຈາກຄວາມຕ້ອງການທາງດ້ານພະລັງງານຢູ່ພາຍໃນ ແລະ ປະເທດອ້ອມຂ້າງເພີ່ມຂຶ້ນ, ບໍລິສັດ ຈຶ່ງໄດ້ເລີ່ມທຳການສຳຫຼວດໂຄງການເທີນ-ຫີນບູນ ພາກຂະຫຍາຍ ເຊິ່ງໄດ້ລົງມືກໍ່ສ້າງໃນປີ 2009 ແລະ ສຳເລັດໃນປີ 2012. ເລີ່ມແຕ່ການກໍ່ສ້າງໂຄງການ ເທີນ-ຫີນບູນ ພາກຂະຫຍາຍ ສຳເລັດເປັນຕົ້ນມາ ກຳລັງການຕິດຕັ້ງຂອງເຂື່ອນໄຟຟ້າ ເທີນ-ຫີນບູນ ເພີ່ມຂຶ້ນຈາກ 220 ເມກາວັດ ມາເປັນ 520 ເມກາວັດ.

ຂ່າວ-ພາບ: ກອງຄຳ

 

แชร์