ທ່ານ ນາງ ສີອຳພອນ ອາມາດມົນຕີ ໄດ້ຮັບລາງວັນເຄືອຂ່າຍຜູ້ປະກອບການແມ່ຍິງດີເດັ່ນອາຊຽນ

ກຸ່ມບໍລິສັດ ສີອຳພອນ ຂາອອກ - ຂາເຂົ້າ ຈໍາກັດຜູ້ດຽວ ຖືວ່າຢູ່ລະດັບແຖວໜ້າ ນະຄອນປາເຊ ທີ່ເພິ່ນມີປະສົບການ,ການບໍລິຫານ ແລະ ທີ່ສຳຄັນເພິ່ນເນັ້ນເລື່ອງຄຸນນະພາບມາດຖານຊື່ສັດຈິ່ງໃຈຕໍ່ຄູ່ຮ່ວມທຸລະກິດ ທີ່ເພິ່ນສຸມໃສ່ການດໍາເນີນທຸລະກິດໃຫ້ມີການເຕີບໃຫຍ່ຂະຫຍາຍຕົວ,ຈິງໃຈຮັບໃຊ້ສັງຄົມ ແລະ ປະຊາຊົນ,ປະກອບສ່ວນໃນການພັດທະນາເສດຖະກິດຂອງຊາດຈົນກາຍເປັນທີ່ຍອມຮັບຈາກສັງຄົມພາຍໃນ ແລະຕ່າງປະເທດຫຼ້າສຸດເມື່ອບໍ່ດົນຜ່ານມາ ທ່ານ ນາງ ສີອຳພອນ ອາມາດມົນຕີ ສະມາຊິກ ສທຍ ແຂວງຈໍາປາສັກ ປະທານໂຮງງານ ສີອຳພອນ ແກັສ ຈຳກັດຜູ້ດຽວ ເປັນ 1 ໃນ 3 ທ່ານ ສະມາຊິກສະມາຄົມນັກທຸລະກິດແມ່ຍິງ (ສທຍ) ແຂວງຈໍາປາສັກ ທີ່ໄດ້ຮັບລາງວັນເຄືອຂ່າຍຜູ້ປະກອບການແມ່ຍິງດີເດັ່ນອາຊຽນ ປີ 2024 ຫຼື Outstanding ASEAN Women Entrepreneure Award (AWEN Award 2024).

ພິທີມອບລາງວັນດັ່ງກ່າວຈັດຂຶ້ນໃນວັນທີ 1 ສິງຫາ 2024 ທີ່ມາຜ່ານມາ ຢູ່ໂຮງແຮມ Sofitel ນະຄອນຫຼວງພະນົມເປັນ ຣາຊະອານາຈັກກຳປູເຈຍ, ມີຄະນະຜູ້ແທນຈາກບັນດາປະເທດສະມາຊິກອາຊຽນເຂົ້າຮ່ວມ. ສຳລັບ ສປປ ລາວ ກໍຄື ສະມາຄົມນັກທຸລະກິດແມ່ຍິງ ໃນນາມເປັນສະມາຊິກເຄືອຂ່າຍຜູ້ປະກອບກອບການແມ່ຍິງອາຊຽນ (AWEN) ນຳໂດຍທ່ານນາງ ມະໂນລາ ດາລາວົງ ປະທານທີ່ປຶກສາ ສະມາຄົມນັກທຸລະກິດແມ່ຍິງ ສປປ ລາວ (ສທຍ) ແລະ ທ່ານ ນາງ ທິພາພອນ ເພັດມະນີ ຄະນະ AWEN Focal Point ສປປ ລາວ ພ້ອມດ້ວຍຄະນະ, ສະມາຊິກ ສທຍ ແລະຜູ້ຕິດຕາມເຂົ້າຮ່ວ 41 ທ່ານ.

ສຳລັບການເຂົ້າຮ່ວມຄັ້ງນີ້ມີຜູ້ໄດ້ຮັບລາງວັນ ຈາກ 9 ປະເທດ ສະມາຊິກອາຊຽນ ຄື: ປະະເທດບູຣໄນ, ມຽນມາ, ກຳປູເຈຍ, ອິນໂດເນຍເຊຍ, ມາເລຍເຊຍ, ຟີລິບປິນ, ສິງກາໂປ, ໄທ ແລະ ປະເທດ ສປປ ລາວ, ໃນນີ້ມີສະມາຊິກ ສທຍ ຈາກ ສປປ ລາວ ໄດ້ຮັບລາງວັນດັ່ງກ່າວຈຳນວນ 10 ທ່ານ. ໃນນັ້ນ, ຈາກແຂວງຈຳປາສັກ 3 ທ່ານ ຄື: ທ່ານ ນາງ ສີອຳພອນ ອາມາດມົນຕີ ປະທານໂຮງງານ ສີອຳພອນ ແກັສ ຈຳກັດຜູ້ດຽວ, ທ່ານ ນາງ ຄຳໃບ ແກ້ວດວງດີ ຮອງປະທານ ບໍລິສັດ ດວງດີກໍ່ສ້າງ - ຂົວທາງ ຈຳກັດຜູ້ດຽວ ແລະທ່ານ ນາງ ສົມເລັດ ໂພສາລາດ ປະທານ ກຸ່ມບໍລິສັດ ຍິ່ງໂຊກໄຊ ຈຳກັດຜູ້ດຽວ.

ໂອກາດນີ້, ທ່ານ ນາງ ສີອຳພອນ ອາມາດມົນຕີ ປະທານໂຮງງານ ສີອຳພອນ ແກັສ ຈຳກັດຜູ້ດຽວ ກ່າວວ່າ: ລາງວັນເຄືອຂ່າຍຜູ້ປະກອບການແມ່ຍິງດີເດັ່ນອາຊຽນ ປີ 2024, ເປັນລາງວວັນໜຶ່ງທີ່ມີຄວາມສໍາຄັນສໍາລັບນັກທຸລລະກິດເພດຍິງ. ຍ້ອນແນວນັ້ນ, ຂ້າພະເຈົ້າຈິ່ງຮູ້ສຶກເປັນກຽດ ແລະພາກພູມໃຈຢ່າງຍິ່ງທີ່ໄດ້ຮັບລາງວັນດັ່ງກ່າວນີ້. ໂຮງງານ ສີອຳພອນ ແກັສ ແມ່ນກິດຈະການໜຶ່ງ ຂອງກຸ່ມບໍລິສັດ ສີອຳພອນ ຂາອອກ - ຂາເຂົ້າ ຈໍາກັດຜູ້ດຽວ. ນອກນີ້ຍັງມີກີດຈະການດ້ານການສຶກສາ ເຊິ່ງມີໂຮງຮຽນ ນານາຊາດລາວ ສາຂາປາກເຊ ແຂວງຈໍາປາສັກ; ກິດຈະການດ້ານກະສິກຳສະອາດ ໂດຍສະເພາະແມ່ນປຸ໋ຍຊີວະພາບ; ກິດຈະການດ້ານຄາເຟ ແລะ ຄາແຄຣ໌, ການຂົນສົ່ງສິນຄ້າພາຍໃນ ແລະ ລະຫວ່າງປະເທດ ແລະ ນໍາເຂົ້ານໍ້າມັນເຊື້ອໄຟ ໃນນາມບໍລິສັດ ໂລ້ປິໂຕຣລ້ຽມ ຈໍາກັດ ຜູ້ດຽວ ສາຂາຈໍາປາສັກ. ເຊິ່ງໃນຕໍ່ໜ້ານີ້ຈະສຸມໃສ່ການດໍາເນີນທຸລະກິດໃຫ້ມີການເຕີບໃຫຍ່ຂະຫຍາຍຕົວ, ຈິງໃຈຮັບໃຊ້ສັງຄົມ ແລະປະຊາຊົນ, ປະກອບສ່ວນໃນການພັດທະນາເສດຖະກິດຂອງຊາດ ກໍຄືຂອງແຂວງໃຫ້ນັບມື້ຈະເລີນຮຸ່ງເຮືອງ ແລະສາມາດຍາດໄດ້ລາງວັນຕ່າງໆຂອງນັກທຸລະກີດຍິງ ໃນລະດັບອາຊຽນຕື່ມອີກ.

แชร์